ރައްޔިތުންގެ މަޖިލީހުގެ ދާއިމީ ކޮމިޓީތަކުގެ އެކުލެވުމަށް ގެންނަން ޖެހޭ ބަދަލުގެ ރިޕޯޓް އިސްލާހު ކުރަން ޖެހޭތީ ކަމަށް ބުނެ، އެޖެންޑާގައި ހުރި ކަންކަން ކުރިއަން ގެންދަން ރިޔާސަތުން ބޭނުން ނުވާތީ، މިއަދުގެ ޖަލްސާ ހުއްޓާލައިފި އެވެ.
މަޖިލީހުގެ ދައުރުން ބޭރު ޖަލްސާއެއް މިއަދަށް ތާވަލުކުރީ މަޖިލީހުގެ މެޖޯރިޓީ ޕާޓީ، އެމްޑީޕީން އެދިގެންނެވެ. ޖަލްސާ ފެއްޓެވުމަށް ފަހު ރިޔާސަތުން ވިލުުފުށި ދާއިރާގެ މެމްބަރު ހަސަން އަފީފު ވިދާޅުވީ ބައެއް މެމްބަރުން ތަމްސީލު ކުރެއްވި ޕާޓީން ވަކިވެވަޑައިގެންފައި ވާތީ ކޮމިޓީތަކަށް ގެންނަން ޖެހޭ ބަދަލުގެ ރިޕޯޓް އަލުން ބަދަލުކުރަން ޖެހިފައިވާ ކަމަށާއި ދެން ޖަލްސާއެއް ބާއްވާނީ އެ ބަދަލާ އެކު މެމްބަރުންނާ ރިޕޯޓް ހިއްސާކޮށްފައިވާ ކަމަށެވެ.
އޭނާ އެ ވިދާޅުވި ދެ މެމްބަރުންނަކީ ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ހިތަދޫ މެދު ދާއިރާގެ މެމްބަރު އަހުމަދު ރަޝީދެވެ. އެ ދެބޭފުޅުން ވެސް ވަނީ މަޖިލީހުގެ މެޖޯރިޓީ އޮންނަ އެމްޑީޕީން ވަކިވެވަޑައިގެންފަ އެވެ.
"އެހެންވީމާ މިހާރު މި އައިސްފައިވާ ބަދަލާ އެކު އަނެއްކާ ރިޕޯޓް އަލުން މެމްބަރުންނަށް ސާކިއުލޭޓްކުރުމަށް ފަހު މި ޖަލްސާ އަނެއްކާ ކުރިއަށް ގެންދެވޭނީ،" އަފީފު ވިދާޅުވި އެވެ.
މިއަދުގެ ޖަލްސާ އެގޮތަށް ކުއްލިއަކަށް ހުއްޓައިލުމުން އެމްޑީޕީގެ މެމްބަރުން ގެންދަވަނީ ކަންބޮޑުވުން ފާޅުކުރައްވަމުންނެވެ.
މިހާރު ހިނގަމުންދާ 19 ވަނަ މަޖިލީހުގައި ދައުރުން ބޭރުން ބާއްވަން ހުށަހެޅި ފުރަތަމަ ޖަލްސާއަކީ މިއަދުގެ ޖަލްސާއެވެ. މި ޖަލްސާ ބާއްވަން ހުށަހެޅީ ދެ ވަނަ ދައުރު ނިންމާލިއިރު، އެޖެންޑާގައި މުހިންމު ކަންކަންތަކެއް ހުރެ އެކަންކަން ކުރިއަށް ގެންދިއުމަށް އެމްޑީޕީން އެދުމުން ވެސް ކުރިއަށް ނުގެންގޮސް ދައުރު ނިންމާލުމުންނެވެ.
ދައުރު ނިންމާލިއިރު އެޖެންޑާގައި، މަޖިލީހުގެ ރައީސް މުހައްމަދު ނަޝީދާއި ނައިބު ރައީސް އީވާ އަބްދުﷲ އަދި އިދިކޮޅުން ހުށަހަޅާފައިވާ އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތްކަމުގެ މައްސަލަ އޮތެވެ. އެ މައްސަލަތައް ރިޔާސަތުން ހުއްޓުވީ މަޖިލީސް ބެހިފައިވާ ގޮތަށް ބަދަލު އައުމާއެކު ކޮމިޓީތަކަށް އެ ބަދަލު ގެންނަންޖެހޭ ކަމަށް ބުނެފަ އެވެ. ނަމަވެސް ކޮމިޓީތައް އެކުލަވާލުން ކުރިއަށް ނުގެންދެ އެވެ.
