އިދިކޮޅު ޕީޕީއެމް/ޕީއެންސީ ކޯލިޝަން އަދި ދި ޑިމޮކްރެޓްސް ގުޅިގެން މަސައްކަތްތަކެއް ކުރުމަށް އެއްބަސްވި ނަމަވެސް ރިޔާސީ އިންތިހާބުގެ ފުރަތަމަ ބުރުގައި ދެ ޕާޓީން ވަކިން ވާދަކުރާނެ ކަމަށް މިއަދު ބުނެފި އެވެ.
ޕީޕީއެމް/ޕީއެންސީގެ ރިޔާސީ ކެންޑިޑޭޓަކީ، މިހާރު 11 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ ކުރީގެ ރައީސް އަބްދުﷲ ޔާމީނެވެ. ކުރީގެ ރައީސް މުހައްމަދު ނަޝީދުގެ އިރުޝާދުގެ ދަށުން އުފައްދަވާ ޑިމޮކްރެޓްސް އިން ވެސް ކެންޑިޑޭޓެއް ނެރޭނެ ކަމަށް މީގެ ކުރިން ވަނީ ބުނެފަ އެވެ.
ނަމަވެސް ގުޅިގެން މަސައްކަތް ކުރަން މަޝްވަރާތަކެއް ކުރެއްވުމަށް މީގެ ކުރިން ދެ ފަހަރަކު ބައްދަލުކުރި އެވެ. މިއަދު އޯޝަން ލައިބުރަރީގައި ތިންވަނަ ފަހަރު ބައްދަލުކުރިއިރު، ނަޝީދު ނެރުއްވާ "އޯޝަން ވީކްލީ" މަޖައްލާގައި ދެ ޕާޓީން އެއްބަސްވެވޭ ކެންޑިޑޭޓެއް ނެރުމާ މެދު ހިޔާލު ފާޅުކޮށް ލިޔުމެއް ޝާއިއުކޮށްފަ އެވެ.
އެ މަޖައްލާގެ ލިޔުމުގައި ޝާއިއުކޮށްފައިވާ ގޮތުން، އެއީ ޕީޕީއެމުން ކެންޑިޑޭޓެއްގެ ގޮތުގައި ކަނޑައަޅާފައިވާ ޔާމީން އަދި ޑިމޮކްރެޓްސް އުފެއްދެވުމުގައި ހުންނެވި ނަޝީދު ފިޔަވައި އެހެން ކެންޑިޑޭޓަކަށް ވުން މުހިންމެވެ.
މިއަދުގެ މަޝްވަރާތަކަށް ފަހު ބޭއްވި ޕްރެސް ކޮންފެރެންސްގައި ނޫސްވެރިންގެ ގިނަ ސުވާލުތައް ވެސް އަމާޒުކުރީ، އެ ކަމާ ގުޅޭ ގޮތުންނެވެ.
ޕީޕީއެމް/ޕީއެންސީ ކޯލިޝަންގެ ފަރާތުން ކޮންފެރެންސްގައި ބައިވެރިވެވަޑައިގެންނެވި ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވީ އެއްބަސްވެވޭ އެއް ކެންޑިޑޭޓަކު ނެރުމާ ގުޅޭ ގޮތުން އަދި އެއްވެސް މަޝްވަރާއެއް ނުކުރައްވާ ކަމަށެވެ.
"އަޅުގަނޑުމެން މި އަންނަނީ ވަކި އެޖެންޑާއެއް ހިފައިގެން، ކޮމަން ކެންޑިޑޭޓަކާ ގުޅޭ މަޝްވަރާއެއް އަދި އަޅުގަނޑުމެންގެ ޓޭބަލްއަކަށް އެޖެންޑާއެއް ނުކުރޭ، ކޮމަން ކެންޑިޑޭޓަކާ ހަމައަށް އައިމަ އެއަށް އަޅުގަނޑުމެން ތިޔަށް ޖަވާބު ދޭނަން،" ހުޅުމާލެ ދާއިރާގެ ކައުންސިލަރު ޝުޖާއު ވިދާޅުވި އެވެ.
ޑިމޮކްރެޓްސްގެ ފަރާތުން ކޮންފެރެންސްގައި ބައިވެރިވެވަޑައިގެންނެވި ހުސައިން އަމްރު ވިދާޅުވީ ރިޔާސީ އިންތިހާބުގެ ފުރަތަމަ ބުރަށް އެ ޕާޓީގެ ކެންޑިޑޭޓެއް ދައްކާނެ ކަމަށެވެ. އަދި ރައީސް އިބްރާހިމް މުހައްމަދު ސޯލިހަށް ދެ ވަނަ ދައުރެއް ދިނުމަށް ރިޔާސީ އިންތިހާބުގައި މަސައްކަތް ނުކުރައްވާނެ ކަމަށެވެ.
"ކޮމަން ކެންޑިޑޭޓެއް ދައްކަން ޖެހޭ ހިސާބަށް ދިޔައިމަ، އެއްބަސްވެވޭ އެ ކެންޑިޑޭޓަކަށް ޑިމޮކްރެޓްސް ވެސް ތައީދު ކުރާނަމޭ، އެހެންވިޔަކަސް އަޅުގަނޑުމެންގެ ކެންޑިޑޭޓެއް ހުންނާނެއޭ ތަކުރާރުކޮށް މި ދަންނަވަނީ،" މި ސަރުކާރުގައި އެސްޓީއޯގެ މެނޭޖިން ޑިރެކްޓަރަކަށް ހުންނެވި އަމްރު ވިދާޅުވި އެވެ.
ބެލެވޭ ގޮތުގައި އަމްރު އިޝާރާތް ކުރެއްވީ ފުރަތަމަ ބުރުގައި ޑިމޮކްރެޓްސް އިން ވާދަކުރާނެ އެވެ. ނަމަވެސް ދެވަނަ ބުރަކަށްދާ ހާލަތުގައި އެ ޕާޓީގެ ކެންޑިޑޭޓަށް އެ ހިސާބަށް ނުދެވި އަދި ރައީސް ސޯލިހަށް ދެވިއްޖެނަމަ ރައީސް ސޯލިހަށް ތާއީދުނުކުރައްވާނެ ކަމެވެ.
މީގެ ކުރިން ރައީސް ޔާމީނަށް ތުހުމަތުކޮށް ޑިމޮކްރެޓްސްގެ އިސް ބޭފުޅުން ދެއްކެވި ވާހަކަތަކާ ގުޅުވައި ނޫސްވެރިން ސުވާލު އަމާޒު ކުރުމުން، އަމްރު އަދި ޝުޖާއު ވެސް ގެންދެވީ ނޫސްވެރިން ކުރާ ސުވާލުތަކުގެ ޖަވާބު ނުދީ އޭގެ ބަދަލުގައި ނޫސްވެރިންނަށް ސަރުކާރުން ފައިސާ ނެގި ކަމުގެ ތުހުމަތުކޮށް އެކި ވާހަކަތައް ދައްކަވަމުންނެވެ.
އެ ވާހަކަތައް ދޮގުކޮށް ނޫސްވެރިން ގެންދިޔައީ އަލުން ސުވާލު ތަކުރާރު ކުރަމުންނެވެ. އަދި އިތުރު ތުހުމަތުތައް ނޫސްވެރިންނަށް ކުރުމުގެ ބަދަލުގައި ސުވާލަށް ޖަވާބު ދިނުމަށް ވެސް ނޫސްވެރިންގެ ފަރާތުން އެދުނެވެ.
