ދި ޑިމޮކްރެޓްސްގެ ނަމުގައި ސިޔާސީ ޕާޓީއެއް އުފެއްދުމުގެ ހުއްދަ އިލެކްޝަންސް ކޮމިޝަނުން ދީފި އެވެ.
އިލެކްޝަންސް ކޮމިޝަނުގެ ނައިބު ރައީސް އިސްމާއީލް ހަބީބު މިއަދު ވިދާޅުވީ "ދި ޑިމޮކްރެޓްސް" ގެ ނަމުގައި ސިޔާސީ ޕާޓީއެއް އުފެއްދުމަށް، ޖަލްސާ ބޭއްވުމުގެ ހުއްދަ، އެ ޕާޓީ އުފެއްދުމުގެ ހުއްދަ އަށް އެދިވަޑައިގަތް، ހަސަން ލަތީފަށް އެ ކޮމިޝަނުން މިއަދު ދީފައިވާ ކަމަށެވެ.
ޑިމޮކްރެޓްސް އުފައްދަން އީސީން ހުއްދަ ދީފައިވަނީ, އެ ޕާޓީ އުފެއްދުމުގެ ހުއްދަ އީސީން ހިފަހައްޓާފައިވާ ކަމަށް ބުނެ, މައްސަލަ ސިވިލް ކޯޓަށް ހުށަހަޅާފައި އޮއްވަ އެވެ.
އެ މައްސަލަ ކޯޓަށް ހުށަހެޅީ, އުފައްދަން ބޭނުންވާ 3000 މެންބަރުންގެ ފޯމު ޖޫން 1، ވަނަ ދުވަހު އީސީއަށް ހުށަހެޅުމަށްފަހު އެ ފޯމުތައް ވެރިފައި ކުރުމުގެ ކަންކަން އީސީން ދެ ހަފްތާ ތެރޭގައި ނިންމުމަށްފަހު އުފެއްދުމުގެ ހުއްދަ ނުދީ ހިފަހައްޓާފައިވާ ކަމަށް ތުހުމަތުކޮށެވެ.
އެ މައްސަލާގައި ހަސަން ލަތީފް ވިދާޅުވީ, އުފެއްދުމުގެ ހުއްދަ ދިނުމަށް ގާނޫނުން އީސީއަށް ދޭ ތިން މަހަކީ އެއީ ފޯމުތައް ވެރިފައި ކުރުމަށް ދޭ މުއްދަތެއް ކަމަށެވެ. އެހެންކަމުން, އެ މަސައްކަތް ނިމުމުން, އިތުރަށް ޕާޓީ އުފެއްދުމުގެ ހުއްދަ ނުދީ ހިފެހެއްޓޭނެ ގާނޫނީ ހަމައެއް ނެތް ކަމަށެވެ.
ނަމަވެސް އޭނާ މިހެން ވިދާޅުވީ, އީދު ބަންދަށްފަހު އަންނަ ފުރަތަމަ ރަސްމީ ދުވަހު, ޕާޓީ އުފެއްދުމުގެ ހުއްދަ ދޭން އީސީން ނިންމާފައިވާކަން އެ ކޮމިޝަނުގެ ނައިބު ރައީސް އިއުލާންކުރައްވާފައި ވަނިކޮށެވެ.
ޑިމޮކްރެޓްސްއަށް ހުއްދަ ދޭން ނިންމީ, އެކަމަށް އީސީން ބާއްވަން ޖެހޭ ބައްދަލުވުން ކޯރަމް ހަމަނުވެގެން ނުބޭއްވިގެން މައްސަލަ ހޫނުވެފައި ވަނިކޮށް އޮންލައިންކޮށް އެ ކޮމިޝަނުގެ މެންބަރުންނަށް ގުޅާ މަޝްވަރާ ކުރުމަށްފަހު އެވެ.
ދި ޑިމޮކްރެޓްސް އުފައްދަން ހުށަހެޅީ ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީން ކެނޑުނު، ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ތާއީދު ކުރާ މަޖިލީހުގެ މެމްބަރުންތަކެކެވެ. ޕާޓީ އުފައްދަން ބޭނުންވާ 3000 މީހުންގެ ސޮއި ހަމަކޮށް ކޮމިޝަނަށް ހުށަހެޅީ ޖޫން 1، ގަ އެވެ. އޭގެ ފަހުން ނަޝީދު ވެސް ދަނީ މިދިޔަ ހަފުތާގައި އެމްޑީޕީން ވަކިވެވަޑައިގެންފަ އެވެ.
