މެޑްރިޑް (ޖުލައި 2) - ސްޕެއިންގެ ގައުމީ ޓީމުގެ ކުރީގެ މިޑްފީލްޑަރު ސެސް ފަބްރެގާސް ކުޅުން ހުއްޓާލައިފި އެވެ.
ފަބްރެގާސް، 36، ވަނީ ސްޕެއިންގެ ގައުމީ ޓީމާ އެކު 2010 ވަނަ އަހަރުގެ ފީފާ ވޯލްޑް ކަޕާއި 2008 އަދި 2012 ވަނަ އަހަރު ޔޫރޯ ކާމިޔާބުކޮށްފަ އެވެ.
މީގެ އިތުރުން ޗެލްސީއާ އެކު ޕްރިމިއާ ލީގުގެ ޗެމްޕިއަންކަން ދެ ފަހަރު ހޯދިއިރު، ބާސެލޯނާއާ އެކު ސްޕެއިން ލީގު ވެސް ކާމިޔާބުކުރިއެވެ.
"ކުޅުން ހުއްޓާލަން ނިންމިކަން އަހަރެން މިއަދު މި އިއުލާންކުރީ ހިތާމައާއެކު،" ފަބްރެގާސް އޭނާގެ ސޯޝަލް މީޑިއާގައި ލިޔެފައިވެ އެވެ.
"އަހަރެންގެ ކެރިއަރުގެ މަތިން ދުވަހަކު ވެސް ހަނދާން ނުނެތޭނެ."
ބާސެލޯނާގެ އެކެޑަމީ ދޫކޮށް، އުމުރުން އެންމެ 16 އަހަރުގައި ފަބްރެގާސް އާސެނަލް އަށް ބަދަލުވީ 2003 ވަނަ އަހަރެވެ. އާސެނަލް ދޫކޮށް، އެނބުރި ބާސެލޯނާ އަށް ފަބްރެގާސް ބަދަލުވީ 2011 ވަނަ އަހަރެވެ. ބާސާގައި ތިން އަހަރު ހޭދަކުރުމަށް ފަހު، އޭނާ ދެން ބަދަލުވީ ޗެލްސީ އަށެވެ.
ޗެލްސީ ދޫކޮށް 2019 ވަނަ އަހަރު ފަބްރެގާސް ވަނީ ފްރާންސްގެ މޮނާކޯ އަށް ބަދަލުވެފަ އެވެ. ކުޅުން ހުއްޓާލިއިރު، އޭނާ ކުޅެމުންދިޔައީ އިޓަލީގެ ދެ ވަނަ ޑިވިޝަންގެ ކްލަބެއް ކަމަށްވާ ކޮމޯ އަށެވެ. ކުޅުން ހުއްޓާލިޔަސް، ފަބްރެގާސް ކޮމޯގެ ޔޫތު ޓީމުތަކާއި ރިޒާވް ޓީމުތަކުގެ ކޯޗެއްގެ ގޮތުގައި މަސައްކަތްކުރާ ގޮތަށް ވަނީ ހަމަޖެހިފަ އެެވެ.
ފަބްރެގާސް ބުނީ ކޮމޯ އަކީ އޭނާ ވަރަށް މަސައްކަތްކުރާ ހިތްވާ ކްލަބެއް ކަމަށާއި އެ ކްލަބާއެކު ކުރިއަށްދާން ބޭނުްނވާ ކަމަށެވެ.
