ސްވިޑަންގެ ސްޓޮކްހޯމްގެ މިސްކިތެއްގެ ކުރިމަތީގައި ހިޔާލު ފާޅުކުރުމުގެ ގޮތުން ކަމަށް ބުނެ، ކީރިތި ގުރުއާންގެ އާޔަތްތައް ލިޔެފައިވާ ހަތިމެއްގެ ސަަފްހާތަކުގައި ރޯކޮށްފި އެވެ.
އެކަމަށް ހުއްދަ ދިނީ ސްވިޑަންގެ ފުލުހުންނެވެ. އެކަމަކު އެ އަމަލު ހިންގަން ނިންމި މީހާގެ ތަހުގީގެއް ވެސް ފެށި އެވެ. އެކަން ކުރީ އިރާގުން ސްވިޑަންއަށް ހިޖުރަ ކުރި ސަލްވާން މޮމިކާ ކިޔާ މީހެކެވެ.
ސްވިޑަންގައި ހިންގި އެ އަމަލު ތުރުކީއިން ވަނީ ކުށްވެރިކޮށްފަަ އެވެ. ސްވިޑަން ނޭޓޯއާ ގުޅުމަށް ކުރަމުންދާ މަސައްކަތަށް ހުރަސް އެޅެނީ ތުރުކީގެ ރުހުން ނުލިބިގެންނެވެ.
މީގެ ކުރިން ތުރުކީ އެމްބަސީ ބޭރުގައި ގުރުއާން އެންދުމުން ވެސް ތުރުކީއިން ނުރުހުން ފާޅުކުރި އެވެ. އަނެއްކާވެސް މި ހިންގީ އިސްލާމްދީނަށް ފުރައްސާރަ ކުރުމުގެ އަމަލެއް ކަމަށް ތުރުކީއިން ބުންޏެވެ.
މިސްކިތުގެ ބޭރުގައި ހަތިމުގެ ސަފްހާތަކުގައި ރޯކުރަމުން ދިޔަ އިރު، އެކަމާ ދެކޮޅަށް އަޑުއުފުލަން ބައެއް މީހުން އެ ހިސާބަށް ޖަމާވި އެވެ.
ފުލުހުން ބުނީ އެ ތަނުގައި އެއްވެސް ހަމަނުޖެހުމެއް ނުހިނގި ނަމަވެސް، ވަކި ދީނެއްގެ ބަޔަކާ ދެކޮޅު ވިސްނުން އުފައްދަން މަސައްކަތް ކުރުމުގެ ތުހުމަތުގައި މޮމިކާގެ މައްސަލަ ބަލާނެ ކަމަށެވެ.
ފުލުހުން އޭނާއަށް އެ ތުހުމަތު ކުރަނީ މިސްކިތަކާ އެހާ ކައިރީގައި ކީރިތި ގުރުއާންގެ ސަފްހާތައް އަންދަަން ނިންމުމުންނެވެ.
