ވަގުތީ ލިސްޓުގައި މައްސަލަ އުޅޭނެ ކަމަށާއި އެކަންކަން ދާއިމީ ލިސްޓުގައި އިސްލާހު ވާނެ ކަމުގެ ޔަގީންކަން ގެދޮރުވެރިޔާ ކޮމެޓީގެ ޗެއާ އަދި ހައުސިން މިނިސްޓަރީގެ ސްޓޭޓް މިނިސްޓަރު، އަކްރަމް ކަމާލުއްދީން ދެއްވައިފި އެވެ.
ދާދި ފަހުން ދިވެއްސަކަށްވި މީހެއްގެ ނަން ގޯތި ލިބުމަށް ޝަރުތު ހަމަވާ މީހުންގެ ލިސްޓުގައި އޮތުމާ ގުޅިގެން "އަދަދު" ނޫހުން ކުރި ސުވާލަކަށް ޖަވާބުދެއްވަމުން އަކްރަމް ވިދާޅުވީ ވަގުތީ ލިސްޓުގައި އަބަދުވެސް މައްސަލަ އުޅޭނެ ކަމަށާއި، ވަގުތީ ލިސްޓެއް އާންމުކޮށް، ޝަކުވާ ހުށަހެޅުމުގެ ފުރުސަތު ހުޅުވާލުމުގެ ބޭނުމަކީ ވެސް އެއީ ކަމަށެވެ.
"ވަގުތީ ލިސްޓެއް އާންމު ކުރުމުގެ ބޭނުމަކީ ވެސް އެއީ، ޝަކުވާއަށް ހުޅުވާލުމަށްފަހު އެހެން ހުންނަ ކަންކަން ދެނެގަނެ، އިސްލާހު ކުރުން، ދެމަފިރިންނަށް ވެސް ހުރެދާނެ ގޯތި ދެވިފައި، އެކަންކަން ދާއިމީ ލިސްޓުގައި އިސްލާހު ވާނެ،" އޭނާ ވިދާޅުވި އެވެ.
މީގެ ކުރިން، ހިޔާ ފުލެޓުތައް ލިބޭ މީހުންގެ ވަގުތީ ލިސްޓަށް ޝަކުވާ ހުށަހެޅުމަށް ހުޅުވާލި ފުރުސަތުގައި ވެސް 3068 ޝަކުވާ ހުށަހަޅާފައިވެ އެވެ. ދާއިމީ ލިސްޓު އާންމު ކުރީ އެ ޝަކުވާތައް ބެލުމަށްފަހު އެވެ.
މާލެ ސަރަހައްދުގައި އޮތް ބޯހިޔާވަހިކަމުގެ މައްސަލައަށް ހައްލެއް ހޯދައިދިނުމަށް ސްކީމެއް ތައާރަފުކުރައްވައި ގޯއްޗަށާއި ފުލެޓަށް އެދި ހުށަހެޅުމަށް ހުޅުވާލި ފުރުސަތުގެ ދަށުން ގޯއްޗަށް އެދި ހުށަހެޅި މީހުންގެ ތެރެއިން ގޯތި ލިބޭ މީހުންގެ ވަގުތީ ލިސްތު އާންމުކުރީ މިދިޔަ ހޯމަ ދުވަހު އެވެ.
އެ ލިސްޓަށް ޝަކުވާ ހުށަހެޅުމުގެ ފުރުސަތު އަންނަ ޖުލައި މަހުގެ 15 ވަނަ ދުވަހާ ހަމައަށް ވަނީ ހުޅުވައިލާފަ އެވެ. ދާއިމީ ލިސްޓު އިއުލާނު ކުރާނީ އެ ޝަކުވާތައް ބެލުމަށްފަހު އެވެ.
އަކްރަމް ވިދަޅުވީ މިހާރުވެސް މައްސަލަތަކެއް ފާހަގަވެފައިވާ ކަމަށާއި އެކަންކަން އިސްލާހު ކުރުމުގެ މަސައްކަތް ކުރަމުންދާ ކަމަށެވެ.
"އެ މައްސަލަ އެކަންޏެއް ނޫން، އިތުރު މައްސަލަތައް ވެސް އެބަހުރި ފާހަގަކުރެވިފައި، އެކަންކަން އިސްލާހު ކުރުމުގެ މަސައްކަތް މިދަނީ ކުރަމުން،" އިންޑިއާ މީހަކަށް ގޯތި ދިންކަމަށް ބުނެ ފެތުރިފައިވާ ވާހަކައަށް އިޝާރާތް ކުރައްވައި އޭނާ ވިދާޅުވި އެވެ.
މާލެ ސަރަހައްދުން ގޯތި ދޫކުރުމަށް މިދިޔަ އަހަރު ސަރުކާރުން ހުޅުވާލިއިރު، ގޯއްޗަށް އެދި ހުށަހަޅާ މީހުންނަކީ މާލެ މީހުންކަން ކަށަވަރު ކުރުމުގައި ބަލާނީ އެއްވެސް އިރެއްގައި މާލެ ފިޔަވައި އެހެން ރަށެއްގެ ރަށްވެހިކަން ނެތް އަދި އަބަދުވެސް މާލޭގެ ރަށްވެހިކަން އޮތް ފަރާތްތަކަށް ކަމަށް އޭރު ކުރި އިއުލާނުގައި ބުނެފައިވެ އެވެ.
މިހާރު ފެންމަތިވެގެން އުޅޭ މއ. މަލިކުވިއު، ހަބީބު ރަހިމާން މުހައްމަދު ހަނީފާ ގޯތި ލިބުމަށް ޝަރުތުހަމަވާ ކަމަށް އޮތް އޮތުމާއި އެ ނޫން ވެސް އެފަދަ މައްސަލަތައް ދާއިމީ ލިސްޓުގައި ބަދަލުވެގެންދާނެ ކަމަށް އަކްރަމް ވިދާޅުވި އެވެ. އަދި އެނޫން މައްސަލަތައް ވެސް ދާއިމީ ލިސްޓު އިއުލާނު ކުރާއިރު ހުންނާނީ ހައްލުވެފައި ކަމަށް އޭނާ ވިދާޅުވި އެވެ.
