ދި ޑިމޮކްރެޓްސް އުފެއްދުމުގެ ހުއްދަ ދިނުމާމެދު އިލެކްޝަންސް ކޮމިޝަނަށް ގޮތެއް ނުނިންމި، މެމްބަރުންގެ ތެރޭގައި މައްސަލަ ޖެހިފައި އޮތުމަށްފަހު އެ ޕާޓީ އުފެއްދުމުގެ ހުއްދަ ދޭން މިއަދު ކޮމިޝަނުގެ މެމްބަރުން އިއްތިފާގުވެއްޖެ އެވެ.
"އަދަދު" އާ ވާހަކަ ދައްކަވަމުން ހަބީބު ވިދާޅުވީ ދި ޑިމޮކްރެޓްސްގައި 3000 މެމްބަރުން ހަމަވެއްޖެ ކަމަށް ހުރިހާ މެމްބަރުންނަށް ވެސް އެއްބަސްވެވޭ ކަމަށާއި ހުއްދަ ދޭން ހުރިހާ މެމްބަރުން އެއްބަސްވާ ކަމަށެވެ.
ޑިމޮކްރެޓްސްއަށް ހުއްދަ ދޭން ނިންމީ މިއަދު އޮންލައިންކޮށް ހުރިހާ މެމްބަރުންނަށް ގުޅުމަށްފަހު ކަމަށާއި މިވަގުތު މައްކާގައި ހުންނެވި އެ ކޮމިޝަނުގެ މެމްބަރު ޑރ. މުހައްމަދު ޒާހިރަށް ވެސް އޮންލައިންކޮށް ކޮމިޝަނުން ގުޅި ކަމަށް ހަބީބު ވިދާޅުވި އެވެ.
ހަބީބް ވިދާޅުވީ ޕާޓީ އުފެއްދުމުގެ ހުއްދައަށް އެދިވަޑައިގަތް ހަސަން ލަތީފަށް, ޕާޓީ އުފެއްދުމުގެ ހުއްދަ ދޭން ނިންމާފައިވާކަން ކޮމިޝަނުން މިހާރު އަންގާފައިވާ ކަމަށެވެ.
ޑިމޮކްރެޓްސް އުފެއްދުމުގެ ހުއްދަ ދޭން ނިންމާފައި މި ވަނީ އެ ޕާޓީ އުފެއްވުމުގެ ހުއްދަ ދޭން އިލެކްޝަން ކޮމިޝަނުން ބާއްވަންޖެހޭ ބައްދަލުވުމެއް ނުބޭއްވިގެން އުޅޭ މައްސަލަ ހޫނުވެފައިވަނިކޮށެވެ.
އިލެކްޝަންސް ކޮމިޝަނުގެ ފަސް މެމްބަރުންގެ ތެރެއިން މިވަގުތު ރާއްޖޭގައި ތިއްބެވީ ހަތަރު މެމްބަރުންނެވެ. ޑިމޮކްރެޓްސް ރަޖިސްޓްރީ ކުރަން ޖޫން 18، ގައި ބޭއްވި ޖަލްސާގައި ދެކޮޅަށް ވޯޓު ހަމަހަމަވެގެން ގޮތެއް ނުނިންމުނެވެ. އޭގެ ފަހުން ޖޫން 21، ގައި ޖަލްސާއަކަށް ގޮވާލުމުން ކޯރަމް ހަމަނުވެގެން އެ ޖަލްސާ ނުބޭއްވުނެވެ.
ޖޫން 18، ގައި ބޭއްވި ޖަލްސާގައި އެ ކޮމިޝަނުގެ މެމްބަރު އަލީ ނަޝާތާއި މުހައްމަދު އާސިފް ހުށަހެޅުއްވީ ޑިމޮކްރެޓްސްގެ ފޯމުތައް އަލުން ފާސް ކުރުމަށެވެ. އޭގެ ފަހުން ޖޫން 21، ގެ ޖަލްސާއަށް ގޮވާލީ ފޯމުތައް އަލުން ޗެކް ކުރުމަށްފަހެވެ. އެ ޖަލްސާއަށް ނަޝާތާއި އާސިފް ވަޑައެއްނުގަންނަވަ އެވެ.
ދި ޑިމޮކްރެޓްސް އުފައްދަން ހުށަހެޅީ ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީން ކެނޑުނު، ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ތާއީދު ކުރާ މަޖިލީހުގެ މެމްބަރުންތަކެކެވެ. ޕާޓީ އުފައްދަން ބޭނުންވާ 3000 މީހުންގެ ސޮއި ހަމަކޮށް ކޮމިޝަނަށް ހުށަހެޅީ ޖޫން 1، ގަ އެވެ. އޭގެ ފަހުން ނަޝީދު ވެސް ދަނީ މިދިޔަ ހަފުތާގައި އެމްޑީޕީން ވަކިވެވަޑައިގެންފަ އެވެ.
