ސާފް ބަންގުބަންދު ޗެމްޕިއަންޝިޕް 2023 ގައި ކުޅުނު ފުރަތަމަ ދެ މެޗުން ބަލިވެ، މުބާރާތުން ކެޓުމުގެ ޒިންމާނަގާ ކަމަށް ބުނެ، ނޭޕާލް ކޯޗުގެ މަގާމުގައި ދެމިނުހުންނާނެ މޭރުމަކުން އެ ޓީމާ ހަވާލުވެ ހުރި އިޓަލީގެ ކޯޗު ވިންޗެންޒޯ އަލްބާޓޯ ވާހަކަ ދައްކައިފި އެވެ.
މިދިޔަ މާޗް މަހު، ނޭޕާލާ ހަވާލުވި ކޯޗު ވިންޗެންޒޯގެ އިރުޝާދުގެ ދަށުން މި ފަހަރުގެ ސާފް ބަންގުބަންދު ޗެމްޕިއަންޝިޕްގައި ނޭޕާލް ކުޅުނު ފުރަތަމަ މެޗުން ވަނީ ކުވެއިތު އަތުން 3-1 އިން ބަލިވެފަ އެވެ. ދެ ވަނަ މެޗުގައި ރޭ އިންޑިއާ އަތުން 2-0 އިން ބަލިވެ، ނޭޕާލް ވަނީ މުބާރާތުން ކަޓައިފަ އެވެ.
ރޭގެ މެޗަށް ފަހު ބޭއްވި ނޫސްވެރިންގެ ބައްދަލުވުމުގައި ވިންޗެންޒޯ ބުނީ ފުރަަތަމަ ހާފުގައި ނޭޕާލުން ވަރަށް ރަނގަޅަށް ކުޅުނު ކަމަށާއި ގޯލު ޖަހާނެ ދެ ފުރުސަތެއް ވެސް ހޯދައި، އެކަން ނުކުރެވުނީ ކަމަށެވެ. އަދި ދެ ވަނަ ހާފުގައި ނޭޕާލްގެ މެދުން ކުޅެމުން އައި، އަންޖަން ބިސްޓާ ބަދަލުކުރަން ޖެހުނު ހިސާބުން އެ ޓީމު ކުޅެމުން އައި ގޭމަށް ބަދަލެއް ގެންނަން ޖެހި އެ ހިސާބުން އިންޑިއާ އަށް މޮޅުވާން ފުރުސަތު ފަހިވީ ކަމަށް ވިންޗެންޒޯ ފާހަގަކުރި އެެވެ.
މުބާރާތުން ކެޓުމުގެ ޒިންމާ ނަގަންތޯ ވިންޗެންޒޯ ގާތުގައި ނޭޕާލްގެ ނޫސްވެރިއަކު ސުވާލުކުރުމުން އޭނާ ބުނީ އެ މަގާމުގައި ހުންނައިރު، ނުކުންނަ ކޮންމެ ނަތީޖާއެއްގެ ވެސް ޒިންމާ ނަގާނެ ކަމަށެވެ.
"މެއި 15 ގައި އަހަރެން ކަލްކަތާގައި ހުރީ. އޭރު އިންޑިއާ އިން ދިޔައީ ޓީމުގެ ތައްޔާރީތަކުގެ ކޭމްޕެއް ފަށަމުން. މާނަ އަކީ މަހަކަށް ވުރެ ގިނަ ދުވަސްކުރިން އިންޑިއާގެ ތައްޔާރީތައް ފަށައިފިއޭ، އަހަންނަށް ޓީމު (ނޭޕާލް ޓީމު) ލިބުނީ މި މަހު 11 ގައި، އެއިރު، ރޯހިތު ޗާންދު ނުލިބޭ، އޭނަ ހުރީ އިންޑޮނޭޝިއާގައި، ތައްޔާރީ ފަށައިގެން ރިކަވަރީއާ އެހެނިހެން ކަންކަމަށް ބަލައި، ފިލިޕީންސް މެޗު ވެސް ކުޅެފައި، ފުލް ޓްރެއިނިން ލިބުނީ ހަތަރު ވަރަކަށް ސެޝަން،" ވިންޗެންޒޯ ބުންޏެވެ.
"މިސާލަކަށް ވިސްނާލަބަލަ އަހަންނަށް މި ޓީމު އެއް މަސް ކުރިން ލިބުނު ނަމަ މިރޭ (ރޭ) އިންޑިއާ ކޮންކަހަލަ ޓީމަކާ ވާދަކުރަން ޖެހޭނީ،"
ކުރިން އިންޑިއާގެ އައި ލީގުގެ ގޯކުލަމް ކެރަލާ އަށް ދެ ސީޒަނުގައި ކޯޗުކޮށްދިނުމަށް ފަހު ފަހުން، އިންޑިއާގެ ސުޕަ ލީގުގެ ނޯތު އީސްޓް ޔުނައިޓެޑަށް އިރުޝާދުދިން ވިންޗެންޒޯ ހޯދަން އައި ލީގާއި ސުޕަ ލީގުގެ ޓީމުތަކުން އަންނަނީ ވާހަަކަ ދައްކަމުންނެވެ.
މި ފަހަރުގެ ސާފް ޗެމްޕިއަންޝިޕަކީ ވިންޗެންޒޯ ނޭޕާލާ އެކު ފެންނާނެ ފަހު ފަހަރަށް ވެދާނެތޯ އެހުމުން، އޭނާ ބުނީ މިއީ ޓްރާންސްފާގެ ދުވަސްވަރު ކަމަށާއި ކޯޗުންނާ އަބަދުވެސް ޓީމުތަކުން ވާހަކަ ދައްކާނެ ކަމަށެވެ. އެ ގޮތުން އޭނާ އަށް ވެސް ހުށަހެޅުންތަކެއް ލިބިފައިވާ ކަމަށާއި އޭގެ ވާހަކަ ދެކެވޭ ކަަމަށް ވިންޗެންޒޯ ވަނީ ބުނެފަ އެވެ.
"އަހަންނަކީ ކޮންމެ މަސައްކަތެއް ކުރިޔަސް މޮޅުވާން ބޭނުންވާ މީހެއް، އެއީ އަހަރެންގެ މިޒާޖުގައި ހުރި ކަމެއް. މޮޅުނުވެވެންޏާ އަހަންނަށް އެންމެ ރަނގަޅު މަަސައްކަތެއް ނުކުރެވޭނެ. ދެން ތި ކުރި ސުވާލަށް ޖަވާބު ދޭ ކަމަށް ވަންޏާ ބުނެވޭނީ ނޭނގެއޭ ސީދާ ވާނެ ގޮތެއް ބުނަން، އަހަންނަކީ މޮޅުވާން މަސައްކަތް ކުރާ މީހެއް،" ބެލީޒް ކޯޗެއްގެ ގޮތުގައި ވަގުތީ ގޮތުން މަސައްކަތްކޮށްްފައިވާ ވިންޗެންޒޯ ބުނެފައިވެ އެވެ.
ވިންޗެންޒޯ ވަނީ ނޭޕާލްގައި ތިބި ޒުވާން ކުޅުންތެރިންނަށް ފުޓްބޯޅައިން ކުރިމަގެއް ހޯދައިދޭން އިންޑިއާ އައި ލީގުގެ ކްލަބްތަކާ ވާހަކަ ދައްކަމުން އަންނަ ކަމަށް ބުނެފަ އެވެ. މާލީ ހާލަތު ގޯސް ފައްތަރެއްގައި އޮތުމުން ނޭޕާލްގައި ހުނަރުވެރި ފުޓްބޯޅަ ކުޅުންތެރިން ފުޓްބޯޅަ ރަސްމީކޮށް ނުކުޅެ، ގިނަ ލާރި ލިބޭ އެހެން މަސައްކަތެއް ކުރަން ފަށާ ކަމަށް ވިންޗެންޒޯގެ ވާހަކައިގައި ވަނީ ފާހަގަކޮށްފަ އެވެ.
ގްރޫޕް ސްޓޭޖުގައި ނޭޕާލަށް ބާކީ އޮތީ ޕާކިސްތާން މެޗެވެ. އަންގާރަ ދުވަހު ހަވީރު ކުޅޭ އެ މެޗާ ބެހޭގޮތުން ވިންޗެންޒޯ ބުނީ ބޭނުންވަނީ ރަނގަޅު ރޫހެއްގައި އެ މެޗު ކުޅެ، ނޭޕާލް ސަޕޯޓަރުންނަށް އުފާވެރިކަމެއް މި މުބާރާތުން ގެެނެސްދިނުމަށް ކަމަށެވެ.
