ދަހްރަން، ސައުދީ އަރަބިއްޔާ (ޖޫން 24) - ސައުދީ އަރަބިއްޔާގައި ބޮޑު ޕެޓްރޯކެމިކަލް ފެކްޓްރީއެއް އެޅުމަށް އެ ގައުމުގެ އަރަމްކޯ އާއި ފްރާންސްގެ ޓޯޓަލްއެނާޖީޒްއާ ދެމެދު 11 ބިލިއަން ޑޮލަރުގެ އެއްބަސްވުމެއްގައި ސޮއިކޮށްފި އެވެ.
އަމީރަލް ކޮމްޕްލެކްސްގެ ނަމުގައި އަޅާ ފެކްޓްރީގެ އިންޖިނިއަރިން އާއި ޕްރޮކިޔުމަންޓް އަދި އިމާރާތް ކުރުމަށް ބެހޭ އެއްބަސްވުންތަކުގައި ސޮއިކުރީ ސައުދީ އަރަބިއްޔާގެ އިރުމަތީ ޕްރޮވިންސްގެ ދަހްރަންގައި ހުންނަ އަރަމްކޯގެ މައި އޮފީހުގަ އެވެ.
އެ ތަން އިމާރާތް ކުރުމުގެ މަސައްކަތް ހަވާލުކުރީ ހަތް ކުންފުންޏަކާ އެވެ. ކޮމްޕްލެކްސް ހުންނާނީ ސައުދީ އަރަބިއްޔާގެ އިރުމަތީ އައްސޭރިފަށުގައި ޖުބައިލްގަ އެވެ. އަރަމްކޯ އާއި ޓޯޓަލްއެނާޖީޒްއިން ރާވާފައި ވަނީ 2027 ގައި އެ ތަން ބޭނުންކުރަން ފެށުމަށެވެ.
އެ ދެ ކުންފުނި ގުޅިގެން ނެރުނު ބަޔާނެއްގައި ބުނީ މިއީ ޕެޓްރޯކެމިކަލް ދާއިރާގައި ގުޅުން ފުޅާކުރުމަށް ލިބުނު ފުރުސަތެއް ކަމަށެވެ. އަރަމްކޯގެ ރައީސް އަމީން ނާސިރް ވިދާޅުވީ މިއީ ކުންފުނި ފުޅާކުރުމުގެ ސްޓްރެޓެޖީގެ މުހިއްމު ބައެއް ކަމަށެވެ.
ދެހާސް އަށާރަ ވަނަ އަހަރު އިއުލާން ކުރި 11 ބިލިއަން ޑޮލަރުގެ މަޝްރޫއުގެ ދަށުން އެކި ކަހަލަ ގޭސްތައް، އެއަށްވުރެ އަގުހުރި ކެމިކަލްއަށް ބަދަލުކުރުމުގެ މަސައްކަތް ކުރެވޭނެ އެވެ.
