އޮޓާވާ، ކެނެޑާ (ޖޫން 24) - ޓައިޓޭނިކް ކައިރިއަށް ދަތުރު ކުރަނިކޮށް ގެއްލުނު ސަބްމެރީން ގޮވަން މެދުވެރިވި ސަބަބު ތަހުގީގު ކުރާނެ ކަމަށް ކެނެޑާއިން ބުނެފި އެވެ.
އޯޝަންގޭޓް އެކްސްޕެޑިޝަން ކުންފުނީ ޓައިޓަން ސަބްމެރީން ފަސް މީހުންނާ އެކު ގެއްލުނީ އާދީއްތަ ދުވަހު އެވެ. އެ އުޅަނދު "އިމްޕްލޯޑްވެފައިވާ" ކަމަށް އިދާރާތަކުން ބުނީ ބުރާސްފަތި ދުވަހު އެވެ.
ޓައިޓަން ދަތުރު ފެށީ ކެނެޑާގެ ދިދަ ނަގާފައިވާ ޕޯލާ ޕްރިންސް ކާގޯ އުޅަނދުގެ އެހީގަ އެވެ. ދަތުރު ފެށިތާ ދެ ގަޑިއިރެއްހާ އިރު ތެރޭގައި އެ އުޅަނދާ ޓައިޓަންއާ ގުޅުން ކެނޑުނެވެ.
ކެނެޑާއިން ބުނީ ސަބްމެރީންގެ ސަޕޯޓް އުޅަނދުގައި ހުރީ އެ ގައުމުގެ ދިދައަކަށް ވާތީ، އެކަމާ ގުޅޭ ތަހުގީގު އެ ގައުމުން ހިންގާނެ ކަމަށެވެ.
ކަނޑުއަޑީގައި ސަބްމެރީން ގޮވައި ފަސް މީހުން މަރުވި ކަމަށް ނިންމި އިރު، ޓައިޓޭނިކްއާ 1600 ފޫޓު ދުރުން ކަނޑުގެ އަޑިން ސަބްމެރީންގެ ބައިތައް ވެސް ފެނުނެވެ.
އިންގްލޭންޑުން ނިއުޔޯކަށް ކުރި ޓައިޓޭނިކްގެ ފުރަތަމަ ދަތުރުގައި 1912 ވަނަ އަހަރު ގަނޑުފެންގަނޑެއްގައި ޖެހި ބޯޓު އަޑިއަށް ދިޔުމުން 1500 އަށް ވުރެ ގިނަ މީހުން މަރުވި އެވެ.
ޓައިޓޭނިކް އޮންނަނީ އެމެރިކާގެ މަސަޗޫސެޓްސްގެ ކޭޕް ކޮޑްގެ އިރުން 900 މޭލު ދުރުން އެޓްލާންޓިކް ކަނޑު އަޑީގަ އެވެ. އެ ބޯޓު ބަލާލަން ދިޔުމަކީ ގިނަ ބަޔަކު ޝައުގުވެރިވާ ކަމެކެވެ.
އޯޝަންގޭޓް ކުންފުނިން ޓައިޓޭނިކް ބަލަން ދާން މީހެއްގެ އަތުން 250،000 ޑޮލަރު ނަގަ އެވެ. ގެއްލުނު ބޯޓުގައި ތިބީ އިނގިރޭސި ބިލިއަނަރަކާއި، ޕާކިސްތާނަށް އުފަން އިނގިރޭސި މަހުޖަނަކާއި އޭނާގެ ފިރިހެން ދަރި އަދި ފްރާންސްގެ އޯޝަނޮގްރާފަރަކާއި އޯޝަންގޭޓްގެ ފައުންޑަަރެވެ.
