ޕްރެޝަރު ބޮޑުވެ ކެނެޑާގެ ބޮޑުވަޒީރު ޖަސްޓިން ޓްރޫޑޯ އޭނާ ނިސްބަތްވާ ލިބެރަލް ޕާޓީގެ ލީޑަރު ކަމުން މިއަދު އިސްތިއުފާ ދެއްވައިފި އެވެ.
ނޫސްވެރިންނަށް މައުލޫމާތު ދެއްވަމުން ޓްރޫޑޯ ވިދާޅުވީ ޕާޓީގެ ލީޑަރުކަމަށް ބޭފުޅަކު އައްޔަނު ކުރެވެންދެން ބޮޑުވަޒީރުކަމުގައި ހުންނަވާނެ ކަމަށެވެ.
ނަމަވެސް އެ މަގާމަށް ބޭފުޅަކު އައްޔަނު ކުރުމާ އެކު ބޮޑުވަޒީރުގެ މަގާމުން ވެސް އިސްތިއުފާ ދެއްވާނެ ކަމަށް ޓްރޫޑޯ ވިދާޅުވި އެވެ.
"އަހަރެން ގަސްތުކުރަނީ ޕާޓީގެ ލީޑަރުކަމުން އިސްތިއުފާ ދޭން. ބޮޑުވަޒީރުކަމުން އިސްތިއުފާ ދޭނީ ޕާޓީގެ ލީޑަރަކަށް ބޭފުޅަކު އައްޔަނު ކުރުމުން. އަހަރެން މިހާރު ވާނީ ލިބެރަލް ޕާޓީގެ ރައީސަށް ވެސް ޕްރޮސެސް ކުރިއަށް ގެންދަން ދަންނަވާފައި،" ކެނެޑާގެ ރައީސް ވިދާޅުވި އެވެ.
އަންނަ އޮކްޓޯބަރު، 20 ގައި ކެނެޑާގެ އާންމު އިންތިހާބު ބާއްވާކަން ފާހަގަކުރައްވާ ޓްރޫޑޯ ވިދާޅުވީ އެ އިންތިހާބުގައި އޭނާއަކީ އެންމެ ރަނގަޅު ޗޮއިސްއަށް ނުވެދާނެ ކަމަށް ގަބޫލުކުރާ ކަމަށެވެ.
ޓްރޫޑޯއަށް ޕާޓީ ތެރެއިން ވެސް ޕްރޮޝަރު ބޮޑުވާން ފެށީ މިދިޔަ ޑިސެމްބަރުގައި އެ ގައުމުގެ ބޮޑުވަޒީރުގެ ނައިބު ކްރިސްޓިއާ ފްރީލޭންޑް އޭނާއާ ހިޔާލު ތަފާތުވެ މަގާމުން އިސްތިއުފާ ދެއްވުމާ ގުޅިގެންނެވެ.
ކްރިސްޓިއާ އިސްތިއުފާ ދެއްވުމާ ގުޅިގެން ކެނެޑާގެ ކެބިނެޓަށް ޓްރޫޑޯ ގެންނެވި ބޮޑެތި ބަދަލުތަކާ ގުޅިގެން ވެސް ލިބެރަލް ޕާޓީގެ މެންބަރުންގެ މެދުގައި އޮތީ ހިޔާލުތަފާތުވުންތަކެއް އުފެެދިފަ އެވެ.
ޓްރޫޑޯ ކެނެޑާގެ އާންމު އިންތިހާބު 2015 ގައި ފުރަތަމަ ފަހަރަށް ކާމިޔާބު ކުރެއްވުމަށްފަހު، 2019 ގެ އިތުރުން 2021 ގައި ވެސް އިންތިހާބު ކާމިޔާބުކޮށް މަގާމު ދިފާއު ކުރެއްވި އެވެ.
