ރައްޔިތުންގެ މަޖިލީހަށް ހުށަހަޅާފައިވާ ބައެެއް މުހިއްމު މައްސަލަތައް ނިންމާފައި ނޫނީ ޗުއްޓީއަށް ނުދާން މަޖިލީހުގެ މެޖޯރިޓީ އޮންނަ އެމްޑީޕީން އެދިފައި ވަނިކޮށް މަޖިލީހުގެ ދައުރު ނުސީދާކޮށް ނިންމާލައި ޗުއްޓީއަށް ދާން ރިޔާސަތުން ރައީސް މުހައްމަދު ނަޝީދު މިއަދު ނިންމަވައިފި އެވެ.
މީގެ ކުރިން މަޖިލީހުގެ ފަހު ދައުރެއް ނިމޭ އިރު، ކުރެވުނު މަސައްކަތްތަކުގެ ތަފާސާސް ހިސާބުތައް ދެއްވައި، ޗުއްޓީގެ ދިގުމިން ވެސް އެމަނިކުފާނު ހާމަކުރައްވަ އެވެ. މަޖިލީހުގެ ޗުއްޓީ ފެށޭކަން ރަސްމީކޮށް އިއުލާނުވެސް ކުރައްވަ އެވެ. އޭގެ ބަދަލުގައި މިއަދު ވިދާޅުވީ "މިދައުރުގެ ފަހު ޖަލްސާ ނިމުނީ" ކަމަށެވެ.
"ދެހާސް ތޭވީސް ވަނަ އަހަރުގެ ދެވަނަ ދައުރުގެ ފަހު ޖަލްސާ ނިމުނީ،" ނަޝީދު ވިދާޅުވި އެވެ.
ނަޝީދާއި މަޖިލީހުގެ ނައިބު ރައީސް އީވާ އަބްދުﷲގެ އިތުބާރު ނެތްކަަމަށް ކަނޑައަޅަން އެމްޑީޕީން ހުށަހެޅުމުން، ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާ ކަމަށް ވިދާޅުވެ، ދުވަސްކޮޅަކު ހުންނެވުމަށް ފަހު މިއަދު ރިޔާސަތަށް ވަޑައިގެންނެވި އިރު މިއަދަށް އެޖެންޑާ ކުރެއްވީ އެންމެ މައްސަލަ އެކެެވެ. އެއީ މަޖިލީހުގެ ކޮމިޓީތަކަށް މެމްބަރުން ލުމާ މެދު މެމްބަރުންގެ ހިޔާލުފާޅުކުރުމުގެ ބަހުސެކެވެ.
ދައުރު ދަންމައިލަން އެމްޑީޕީން އެދުނު
ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ފޮނުއްވި ސިޓީއެއްގައި ވިދާޅުވީ ރައްޔިތުންގެ މަޖިލީހުގެ ޖަލްސާތަކުގެ ރިޔާސަތު ބަލަހައްޓަވަން ނަޝީދު އުޒުރުވެރިވެވަޑައިގެންނެވި ޔަސް، މަޖިލީހުގެ ޖަލްސާތައް ކުރިއަށް ގެންދެވޭނެ ގޮތް، މަޖިލީހުގެ ގަވައިދުގެ 44 ވަނަ މާއްދާގެ (ހ)ގެ ދަށުން ހެއްދެވުމަކީ އެމަނިކުފާނުގެ ޒިންމާއެއް ކަމަށެވެ.
އެހެން ނަމަވެސް މަޖިލީހުގެ ޖަލްސާތައް ނުބާއްވަވައި ހުންނަވާފައި 22 ޖޫން ، 2023 ގައި (މިއަދު) ޖަލްސާއެއް ބާއްވަން ނިންމަވައި ހަަމަ އެކަނި މަޖިލީހުގެ ދާއިމީ ކޮމިޓީތަކުގައި ސިޔާސީ ޕާޓީތަކުގެ މެމްބަރުންނާއި ވަކި ޕާޓީއަކަށް ނިސްބަތްނުވާ މެމްބަރުން ހިމެނޭނެނެ ގޮތް ކަނޑައެޅުމުގެ މައްސަލަ އެޖެންޑާ ކުރުމަކީ އަސް ލަމް ވިދާޅުވި ގޮތުގައި މަޖިލީހުގެ ގަވައިދާ ހިލާފަށް ނަޝީދު ކުރެއްވި ކަމެކެވެ.
"...ޖަލްސާގެ އެޖެންޑާގައި އަންނަނިވި މައްސަލަތަކާއި ވަކިން ހާއްސަކޮށް މަޖިލީހުގެ ދާއިމީ ކޮމިޓީތައް އަލުން އެކުލަވައިލުމާ ގުޅޭ ގޮތުން ގޮތެއް ނިންމުމަށް ހިމަނުއްވައި، މިމައްސަލަތަކަށް ގޮތެއް ނިމެންދެން ރައްޔިތުންގެ މަޖިލީހުގެ މިދައުރު ދަންމައިލުމުގެ ފުރުސަތު ދިނުމަށް އެދި ދަންނަވަމެވެ،" ސިޓީގައި އަސްލަމް ވިދާޅުވި އެވެ.
ނިންމަން އެދުނު މައްސަލަތައް
- ކޮމިޓީތައް އެކުލަވައިލުމުގެ މައްސަލަ
- އޭޖީ އިބްރާހީމް ރިފްއަތާއި ފޮރިން މިނިސްޓަރު އަބްދުﷲ ޝާހިދު ވަކިކުރުމުގެ މައްސަލަ
- މަޖިލީހުގެ ގަވައިދު ބަދަލުކުރުމުގެ މައްސަލަ
- އިލެކްޝަންސް ކޮމިޝަނަށް މެމްބަރަކު އައްޔަން ކުރުން
- މަޖިލީހުގެ ރައީސާއި ނައިބުރައީސް ވަކިކުރުމުގެ މައްސަލަ
މީގެ ތެރެއިން ރިފްއަތާއި ޝާހިދު ވަކިކުރުމުގެ މައްސަލަ ފިޔަވައި އެހެން މައްސަލަތަކަކީ އެމްޑީޕީން ހުށަހެޅި މައްސަލަތަކެވެ.
