ރާއްޖެއަށް މަކިޓާ ތައާރަފުކުރިތާ 25 އަހަރު ފުރުމާއި މަކިޓާ ޝޯރޫމަށް އެއް އަހަރު ފުރުން ފާހަގަ ކުރުމަށް ބޮޑެތި ޑިސްކައުންޓު ލިބޭ ޕްރޮމޯޝަނެއް އެސްޓީއޯއިން މިއަދު ފަށައިފި އެވެ.
އަންނަ ޖުލައި މަހުގެ ނިޔަލަށް ކުރިއަށް ގެންދިއުމަށް ނިންމާފައިވާ އެ ޕްރޮމޯޝަނުގައި މަކިޓާގެ އުފެއްދުންތަކުން 40 ޕަސެންޓާ ހަމައަށް ޑިސްކައުންޓު ލިބޭނެ ކަމަށް އެސްޓީއޯއިން ބުނެ އެވެ.
މަކިޓާ ޝޯރޫމަށް އެއް އަހަރު ފުރުން ފާހަގަ ކުރުމަށް މިއަދު ބޭއްވި ހަފުލާގައި އެ ޕްރޮމޯޝަން އިފުތިތާހު ކޮށްދެއްވީ އެސްޓީއޯގެ މެނޭޖިން ޑިރެކްޓަރު، އަބަދުﷲ ސައީދު އެވެ. އެ ހަފުލާގައި ވަނީ މިދިޔަ އަހަރުގެ ޖޫން މަހުން ފެށިގެން މިދިޔަ މަހާ ހަމައަށް މަކިޓާ ޝޯރޫމުން އެންމެ ގިނައިން ވިޔަފާރީ ކޮށްފައިވާ ފަސް ފަރާތައް ހާއްސަ ހަދިޔާއެއް ދީފަ އެވެ.
އޭގެއިތުރުން މިއަދު އެ ޝޯރޫމުން ވިޔަފާރި ކުރާ ހުރިހާ ކަސްޓަމަރުންނަށް ވެސް ހަދިޔާ ދިނުމަށް ހަމަޖެހިފައިވާ ކަމަށް އެސްޓީއޯގެ މީޑިއާ އޮފިޝަލް ވިދާޅުވި އެވެ.
އެސްޓީއޯގެ މަކިޓާ ޝޯރޫމުގެ އިތުރުން އެކުންފުނީގެ ރީޖަނަލް ފިހާރަތަކާއި އެސްޓީއޯ ސުޕަ މާކެޓުގައި ވެސް އެ ބްރޭންޑުގެ ސާމާނު ވިއްކަމުން ދެއެވެ. އެސްޓީއޯއިން ވިއްކާ މަކިޓާގެ އުފެއްދުންތަކުގެ ތެރޭގައި ލަކުޑި ވަޑާންކުރުމަށް ހާއްސަ ކަރަންޓު އާލާތްތަކާއި އައުޓްޑޯ އެކި މަސައްކަތްތަކަށް ބޭނުންކުރެވޭނެ ސާމާނުގެ އިތުރުން ގާޑެނިންއަށް ހާއްސަ އުފެއްދުންތަކާއި އިންޑޯ އަދި އާންމު ދިރިއުޅުމުގައި ބޭނުން ކުރެވޭނެ ވެކިއުމް ކްލީނާ ފަދަ އެތައް ސާމާނެއް ހިމެނެ އެވެ.
