ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ނައިބު ރައީސް އީވާ އަބްދުﷲގެ އިތުބާރު ނެތް ކަމުގެ މައްސަލަ ނަގަން އެއްވެސް މަޝްވަރާއެއް ނުކުރެވޭ ކަމަށް އެމްޑީޕީގެ ޕާލިމެންޓަރީ ގްރޫޕުގެ ލީޑަރު ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް އިއްޔެ ވިދާޅުވި އެވެ.
އެމްޑީޕީގެ ޕާލިމެންޓަރީ ގްރޫޕުން މަޖިލީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިޔަކު ކުރި ސުވާލަކާ ގުޅިގެން ޕީޖީ ލީޑަރު އަސްލަމް ވިދާޅުވީ، މަޖިލީހުގެ ރައީސް ކަމުގައި ނަޝީދަށް ހުރެވޭ ގޮތަކަށް ކުރިއަށްދިޔުމާ މެދު މެމްބަރުންގެ މެދުގައި ވަރަށް ބޮޑެތި ކަންބޮޑުވުންތަކެއް އެބަ ހުރި ކަމަށެވެ.
އޭނާ ވިދާޅުވި ގޮތުގައި ނަޝީދާ އީވާގެ އިތުބާރު ނެތް ކަމުގެ މައްސަލަތައް އަނބުރާ ނެގުމުގެ މަޝްވަރާ ޕީޖީ ގްރޫޕުގައި ނުކުރެވެ އެވެ. އަދި އެފަދަ ކަމެއް ނިންމޭނީ ޕީޖީ ގްރޫޕުގެ ނިންމުމަކުން ކަަމަށް ވިދާޅުވި އެވެ.
"އަޅުގަނޑަށް ޕާލިމެންޓަރީ ގްރޫޕުގެ އެއްވެސް ބޭފުޅަކު އަދި މިވީ ހިސާބަށް އެކަމާ ގުޅޭ ގޮތުން، މިއިން އެއްވެސް މައްސަލައެއް ނެގުމާ ގުޅޭ ގޮތުން މަޝްވަރާދީފައި ނުވޭ،" އަސްލަމް ވިދާޅުވި އެވެ.
އަސްލަމް ވިދާޅުވި ގޮތުގައި އެހާ ހިސާބަށް ދިޔަ އެއް ސަބަބަކީ ނަޝީދަށް ބައެއް މެމްބަރުންނާ ޒާތީ ގޮތުން މުއާމަލާތް ކުރެވިފައި ހުރުމެވެ. އަދި ބައެއް ބޭފުޅުންނާ ގުޅޭ ގޮތުން ފުރައްސާރައަށް ވާ ގޮތަށް ވެސް މުއާމަލާތްކޮށްފައިވާ ކަމަށް މައުލޫމާތު ލިބިފައިވާ ކަމަށް އަސްލަމް ވިދާޅުވި އެވެ.
އެހެންވެ، ނަޝީދު މަޖިލީހުގެ ރައީސްގެ ގޮތުގައި ބަހައްޓަން ބައެއް މެމްބަރުންގެ ވަރަށް ބޮޑެތި ކަންބޮޑުތަކެއް އެބަ ހުރި ކަމަށް އަސްލަމް ވިދާޅުވި އެވެ.
"އަޅުގަނޑު ވެސް ހަމަ ޕާސަނަލީ ދެކޭ ގޮތުގައި މި ގައުމު، މި ދައުލަތަށް ވަރަށް ބޮޑު ގެއްލުމެއް ކުރިމަތިވާނެ ކަމެއް ރައީސް ނަޝީދު އިތުރަށް މަޖިލީހުގެ ރައީސް ކަމުގައި އިންނަވައިގެން ކުރިއަށްދާން އަޅުގަނޑުމެން ނިންމާ ނިންމުމަކީ ދިވެހި ރައްޔިތުންނަށް ރަނގަަޅު ގޮތެއް ކަމުގައި އަޅުގަނޑެއް ގަބޫލެއް ނުކުރަން،" އަސްލަމް ވިދާޅުވި އެވެ.
ރައްޔިތުންގެ މަޖިލީހުގެ މިއަހަރުގެ ދެވަނަ ދައުރު ނިމެން 10 ވަރަކަށް ދުވަހަށް ވެފައި ވަނިކޮށް، މަޖިލީހުގެ މަސައްކަތް ވަނީ މުޅިން ހުއްޓިފަ އެވެ. މަޖިލިސް ހުއްޓުނީ މަޖިލީހުގެ ރައީސް މުހައްމަދު ނަޝީދާއި ނައިބުރައީސް އީވާ ވަކިކުރުމުގެ މައްސަލަ އެމްޑީޕީން ހުށަހެޅުމާ ގުޅިގެން ނަޝީދު ނިންމެވި ނިންމެވުމެއްގެ ސަބަބުންނެވެ. އެމަނިކުފާނު ނިންމެވީ މަޖިލީހުގެ ރިޔާސަތު ބެލަހައްޓަވަން އުޒުރުވެރިވެވަޑައިގަންނަވާ ކަމަށެވެ. މަޖިލީހުގައި އެންމެ ފަހުން ބޭއްވި ތިން ޖަލްސާގެ ރިޔާސަތު ބެލެހެއްޓެވީ ނަޝީދު ކަނޑައެޅުއްވި ގޮތަށް، ވިލުފުށި ދާއިރާގެ މެމްބަރު ހަސަން އަފީފެވެ.
އެހެން ނަމަވެސް އެގޮތަށް ރިޔާސަތު ހަވާލުކުރާ މެމްބަރަކަށް ވިދިވިދިގެން ތިން ޖަލްްސާއަށް ވުރެ އިތުރަށް ރިޔާސަތު ނުބެލެހެއްޓޭނެ ކަމަށް މަޖިލީހުގެ ގަވައިދުގައި އޮވެ އެވެ. އެކަން އެހެން އޮތް އިރު ރިޔާސަތު ބަލަހައްޓަވާނެ މެމްބަރަކާ ގުޅޭ ގޮތުން ނަަޝީދު އާ ނިންމެވުމެއް ނުނިންމަވަ އެވެ. އެހެންވެ މަޖިލީހުގައި އެއްވެސް މަސައްކަތެއް ނުހިނގަ އެވެ.
މުހިންމު ބައެއް ހަބަރު
ދުވަހުގެ ކޯޓޭޝަން
މަޖިލީހުގެ މަސައްކަތް ހުއްޓިފައިވާ މައްސަލައިގައި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވިދާޅުވީ؛
މީހަކު އޭނާގެ މަސްއޫލިއްޔަތު އަދާ ނުކުރީ. ދެން އޭނާ ހިފައި ހައްޔަރުކޮށްގެން ގެންގޮސްފަ އެތާ ބައިންދާކަށެއް އެއްވެސް ގާނޫނަކު ނެތް. ދެން ކީއްތޯ ކުރާނީ؟ މަސައްކަތް އަލުން ފެށޭނީ މަޖިލީހުގެ ރައީސް އެކަން ކުރީމަ،"
ދުވަހުގެ ފޮޓޯ
އިއްޔެ ބޭއްވި ބުރުުނު ޝިކާރު 2023 ގެ ބޮޑީބޯޑިން މުބާރާތުގެ ފައިނަލްގެ ތެރެއިން. -- ފޮޓޯ: މުހައްމަދު ޝާބިން/އަދަދު
