ލަންޑަން (ޖޫން 18) - ވުލްވްސް ކެޕްޓަންކަން ކުރަމުން އަންނަ ޕޯޗުގީސް ގައުމީ ޓީމުގެ މިޑްފީލްޑަރު، ރުބެން ނެވޭސް، 55 މިލިއަން ޑޮލަރުގެ ފީ އަކަށް ސައުދީ އަރަބިއްޔާގެ އަލް ހިލާލް އަށް ބަދަލުވާން ހުރިހާ ކަމެއް ނިމިއްޖެ އެވެ.
ކުޅިވަރު ހަބަރުތައް ގެނެސްދޭ އެންމެ އިތުބާރު ހިފޭ ދެ މަސްދަރު ކަމަށްވާ، ސްކައި ސްޕޯޓްސް އާއި ބީބީސީން ރިޕޯޓްކުރާ ގޮތުގައި ނެވޭސް، 26، ވުލްވްސް ދޫކޮށްލާނީ އެ ކްލަބުން މިހާތަނަށް ކުޅުންތެރިއަކު ވިއްކާލާ އެންމެ އަގުބޮޑުކޮށެވެ. އެ ގޮތުން، ނެވޭސްގެ ކޮންޓްރެކްޓްގައި ބާކީ އެއް އަހަރު އޮއްވައި، ވުލްވްސް އިން އޭނާ ވިއްކާލަން ކީ އަގު ޖުމްލަ އެކު، 55 މިލިއަން ޑޮލަރަށް އަރާނެ އެވެ.
ސައުދީ އަރަބިއްޔާގެ ޕްރޮފެޝަނަލް ލީގުން އަންނަނީ ޔޫރަޕްގެ ނަން މަޝްހޫރު ގިނަ ކުޅުންތެރިންތަކެއްގެ ސޮއި ހޯދަމުންނެވެ. އެ ގޮތުން ޖެނުއަރީ މަހު ކްރިސްޓިއާނޯ ރޮނާލްޑޯ ވަނީ ސައުދީގެ އަލް ނަސްރަށް ސޮއިކޮށްފަ އެވެ. މި މަހު، ރެއާލް މެޑްރިޑްގެ ކަރިމް ބެންޒެމާ، ސައުދީގެ އަލް އިއްތިފާގަށް ސޮއިކުރިއިރު، އެ ޓީމުން ޗެލްސީގެ އެންގޯލޯ ކާންޓޭ ވެސް ގެންދާނެކަން ވަނީ ވަރަށް ބޮޑަށް ޔަގީންވެފަ އެވެ.
ނެވޭސް، އަލް ހިލާލް އަށް ސޮއިކުރިއިރު، އެ ޓީމުން އަންނަނީ ޔޫރަޕްގެ އެހެން ކުޅުންތެރިންތަކެއް ހޯދަން ވެސް މަސައްކަތް ކުރަމުންނެވެ. އޭގެ ތެރޭގައި ރެއާލްގެ ލޫކަ މޮޑްރިޗާއި ލެސްޓާ ސިޓީގެ ރިޔާދު މާރޭޒް ހިމެނެ އެވެ.
ޕޯޓޯ ދޫކޮށް 2017 ވަނަ އަހަރު ވުލްވްސް އަށް ބަދަލުވެ، ނެވޭސް ވަނީ އެ ޓީމު ޕްރިމިއާ ލީގަށް ޕްރޮމޯޓްކޮށްދިނުމުގެ އިތުރުން، ލީގުގައި ވުލްވްސް އަކީ ފައިތިލަ ސާބިތުކޮށްދެވޭނެ ޓީމަކަށް ހަދައިދީ ޔޫރޮޕާ ލީގުުގައި ވެސް ރަނގަޅު ވާދައެއް ކޮށްފަ އެވެ.
ވުލްވްސް އަށް 253 މެޗުން 30 ގޯލު ޖަހައިދިން، ނެވޭސް ހޯދަން މިދިޔަ އަހަރުތަކުގައި މެންޗެސްޓާ ޔުނައިޓެޑާއި ބާސެލޯނާ، ލިވަޕޫލް އަދި ބޮރޫޝިއާ މުންޗެންގްލަޑްބެކް އިން ވެސް މަސައްކަތް ކުރި އެވެ. އެކަމަކު، ނެވޭސް ނިންމީ އޭރު ވުލްވްސްގައި މަޑުކުރާށެވެ.
