ބާމިންހަމް (މާޗް 4) - އިނގިރޭސި ޕްރިމިއާ ލީގުގައި ރޭ ވުލްވްސް އިން އިތުރު ވަގުތުގެ ތެރޭގައި ޖެހި ގޯލުން 2-1 އިން ލިވަޕޫލް ބަލިކޮށްފި އެވެ.
މިއީ މި ފަހަރު ލީގުގައި އިތުުރު ވަގުތުގެ ތެރޭގައި ގޯލު ވަދެގެން ލިވަޕޫލަށް މެޗު ގެއްލުނު ފަސް ވަނަ ފަހަރެވެ. އަނެއްކޮޅުން ވުލްވްސް އިން މި ވަނީ އެންމެ ފަހުން އަމިއްލަ ދަނޑުގައި ކުޅުނު ތިން މެޗުގައި ވެސް ތަފާތު ހިތްވަރެއް ދައްކައި ނަތީޖާ ނެރެފަ އެވެ. އެ ގޮތުން، ލީގުގެ އެއް ވަނައިގައި އޮތް އާސެނަލާ ފަަހަތުން އަރައި 2-2 އިން އެއްވަރުކުރިއިރު، ހަތަރު ވަނައިގައި އޮތް އެސްޓަން ވިލާ އަތުން 2-0 އިން މޮޅުވި އެވެ.
ވުލްވްސްގެ މޮލިނެއުސް ސްޓޭޑިއަމްގައި ރޭ ކުޅުނު މެޗުގެ ފުރަތަމަ ހާފުގައި ލިވަޕޫލުން ގިނަ ވަގުތު ބޯޅަ ހިފަހައްޓައިގެން ކުޅުނު ނަމަވެސް ގޯލާ އަމާޒުކޮށް މާ ރަނގަޅު ހަމަލާތަކެއް ފޮނުވާލެވޭ ގޮތެއްނުވި އެވެ. ދެ ވަނަ ހާފުގައި ބަދަލަކަށް ކުޅެން އެރި ލިވަޕޫލްގެ ކާޓިސް ޖޯންސް، ގޯލުގެ ރޮނގުމަތިން ގޯލަށް ވާއްދާލަން މަސައްކަތްކުރި ބޯޅަ އެ ޓީމުގެ ކޯޑީ ގަކްޕޯ ފައިގައި ޖެހިފައި ގޯލަށް ވަންނަ ގޮތެއްނުވި އެވެ.
މެޗުގައި ވުލްވްސް އިން ގޯލާ ސީދާކޮށް ފޮނުވާލި ފުރަތަމަ ހަމަލާއިން ލީޑުނެގި އެވެ. މެޗުގެ 78 ވަަނަ މިނިޓްގައި މި ލަނޑު ޖެހީ ރޮޑްރީގޯ ގޯމޭސް އެވެ. އޭނާ ވަނީ ދާދި ފަހުން އެސްޓަން ވިލާ ކޮޅަށް ވެސް ލަނޑު ޖަހައިފަ އެވެ. ވުލްވްސް އިން ލީޑުނެގިތަނާ އިރުކޮޅެއްގެ ތެރޭގައި، ލިވަޕޫލަށް އެއްވަރުކޮށްދޭން ރިއޯ އެންގުމޯހާ ޖެހި ޝޮޓް ދަނޑީގައި ޖެހިފައި ބޭރުވީ ވުލްވްސް ކީޕަރު ޖޯސޭ ސާ އަތުގައި ޖެހިފަ އެވެ.
ލިވަޕޫލުން އެއްވަރުކުރީ، 83 ވަނަ މިނިޓްގައި މުހައްމަދު ސަލާހު ޖެހި ލަނޑުންނެވެ. މިއީ، ވުލްވްސްގެ ކުޅުންތެރިއަކު ހެދި ގޯހެއްގެ ފައިދާނަގައި، އޭރިއާތެރެއަށް ބޯޅަ ހިފައިގެން ވަދެ ސަލާހު ޖެހި ލަނޑެކެވެ. އޭގެ ފަހުން، ސަލާހަށް ކައުންޓަ އެޓޭކުގައި ރަނގަޅަށް ފައިނަލް ޕާސް ނުދެވިގެން ފުރުސަތެއް ގެއްލުނުއިރު، ލިވަޕޫލްގެ ކެޕްޓަން، ވާޖިލް ވެން ޑައިކް ބޮލުން ފޮނުވާލި ބޯޅަ އަމާޒުވީ ކީޕަރު ސާ އަތަށެެވެ.
އިތުރު ވަގުތުގެ ހަތަރު ވަނަ މިނިޓްގައި ވުލްވްސްގެ ބްރެޒިލް މިޑްފީލްޑަރު، އަންޑްރޭ ޖެހި ޝޮޓެއް ލިވަޕޫލްގެ ޖޯ ގޯމޭޒް ފައިގައި ޖެހިފައި ގޯލަށް ވަދެ، ވުލްވްސް އަށް މި ފަަހަރު ލީގުގައި ތިން ވަނަ މޮޅު ލިބުނީ އެވެ.
ވުލްވްސްގެ އޮތީ 30 މެޗުން 16 ޕޮއިންޓެވެ. ރޭގެ މެޗުން މޮޅުވެގެން ތިން ވަނަ އަށް އެރުމުގެ ފުރުސަތު އޮތް ލިވަޕޫލުން ބަލިވުމާ އެކު، ލީގުގެ ފަސް ވަނައިގައި އޮތީ 29 މެޗުން 48 ޕޮއިންޓާ އެކު އެވެ.
