މްޕޮންޑްވޭ، ޔުގެންޑާ (ޖޫން 17) - އިސްލާމިކް ސްޓޭޓް (އައިއެސް) އާ ގުޅުން ހުރި ޓެރަރިސްޓުންތަކެއް ޔުގެންޑާގެ ހުޅަނގުގެ ސަރަހައްދެއްގައި 37 މީހުން މަރާލައި، ހަ މީހުން ރަހީނުކޮށްފި އެވެ.
ސިފައިން ބުނީ ހަމަލާ ދިނީ އެލައިޑް ޑިމޮކްރެޓިކް ފޯސާޒް (އޭޑީއެފް) އަށް ނިސްބަތްވާ މެމްބަރުން ކަމަށާއި އެ މީހުންނާ ދެކޮޅަށް ބޮޑު އޮޕަރޭޝަނެއް ހިންގަމުންދާ ކަމަށެވެ.
އެ މީހުން ހަމަލާ ދިނީ ޑިމޮކްރެޓިކް ރިޕަބްލިކް އޮފް ކޮންގޯއާ ގުޅޭ ބޯޑަރު ކައިރީގައި ހިންގާ ސްކޫލަކަށެވެ. ސްކޫލްގެ ބައެއް ކޮޓަރިތައް ތަޅުލައި، ހުޅުޖެހި ކަމަށާއި ކުދިންނަށް ވަޅިން ހަމަލާ ދިން ކަމަށް އޮފިޝަލުން ބުނެ އެވެ.
އޭޑީއެފްއަކީ ފަގީރުކަން ކުރިމަތިވެފައިވާ ޑީއާރް ކޮންގޯގެ އިރުމަތީގައި އުޅޭ ހަނގުރާމަވެރި ގްރޫޕެކެވެ. އައިއެސްއިން ބުނީ އޭޑީއެފް ހިންގަނީ އެ ގްރޫޕްގެ ދަށުން ކަމަށެވެ.
މަރުވި 37 މީހުންގެ ތެރޭގައި ސްކޫލް ކުދިން ހިމެނެ އެވެ. ނަމަވެސް ސީދާ އަދަދެއް ފުލުހުން ނުބުނެ އެވެ. އަށް މީހުންނަށް އަނިޔާވެފައިވާ އިރު، ހަ މީހުން ރަހީނުކޮށްގެން ގެންދިޔަ އެވެ.
މިއީ 2010 ވަނަ އަހަރު ސޯމާލިއާގެ އަލް ޝަބާބުން ޔުގެންޑާގެ ކަމްޕާލާގައި ދިން ދެ ބޮމުގެ ހަމަލާގައި 76 މީހުން މަރުވި ފަހުން އެ ގައުމުގެ ދިން އެންމެ ބޮޑު ހަމަލާ އެވެ.
