ދިވެހި ސާފް ލީގުގެ މި އަހަރުގެ ތިން ވަނަ އިވެންޓު ކަމަށްވާ "ގާމާދޫކޮޅު"ގެ އޯޕަން ބައިގެ ޗެމްޕިއަންކަން ހުސައިން އަރީފް (އިބޫ) ހޯދިއިރު ޖޫނިއާ ބައިގެ ޗެމްޕިއަންކަން ކަޔާން އަބްދުﷲ އަރީފް ހޯދައިފި އެވެ.
މޯލްޑިވްސް ސާފިން އެސޯސިއޭޝަން (އެމްއެސްއޭ) އިން މި މަހުގެ 14 ވަނަ ދުވަހު ކ. ހިންމަފުށީގައި ފެށި ގާމާދޫކޮޅު ސާފިން މުބާރާތުގެ އޯޕަން ބައިގެ ޗެމްޕިއަންކަން އީބޫ ހޯދީ ފައިނަލުގައި ހޫދު އަހުމަދު ބަލިކޮށްގެންނެވެ. ފައިނަލް ހީޓުގައި ޗެމްޕިއަން އިބޫ ވަނީ ދެ ރާޅުން 15.66ގެ ސްކޯއެއް ހޯދާފަ އެވެ. ހޫދު އަށް ހޯދުނީ 11.73ގެ ސްކޯއެކެވެ.
އިބޫ ފައިނަލަށް ދަތުރުކުރީ ސެމީ ފައިނަލުގައި އާދަމް މުއީން އިބްރާހީމްގެ މައްޗަށް ކުރި ހޯދައިގެންނެވެ. ސެމީ ފައިނަލުގައި އިބޫ 16.00ގެ ސްކޯއެއް ހޯދިއިރު، މުއީން އަށް ހޯދުނީ 11.00ގެ ސްކޯއެކެވެ. ކުއާޓާ ފައިނަލުގައި 12.83ގެ ސްކޯއަކާއިއެކު އިބޫ ވަނީ ހަސަން ނާސިހުގެ މައްޗަށް ކުރި ހޯދާފަ އެވެ. ނާސިހުއަށް މި ހީޓުގައި ލިބުނީ 11.50ގެ ސްކޯއެކެވެ.
ފައިނަލުގައި ދެން ވާދަކުރި ހޫދު ސެމީ ފައިނަލުގައި މޮޅުވީ އިސްމާއިލް މިގްލާލް އަތުންނެވެ. ސެމީގައި ހޫދު 17.17ގެ ސްކޯއެއް ހޯދިއިރު، އިސްމާއިލް އަށް ލިބުނީ 7.37ގެ ސްކޯއެކެވެ. ކުއާޓާ ފައިނަލުގައި ހޫދު މޮޅުވީ އިބްރާހިމް އައިމަން އާރިފް އަތުންނެވެ.
2022 ވަނަ އަހަރުގެ ގާމާދޫކޮޅު ރާޅުގަނޑުގެ ޗެމްޕިއަންކަން ހޯދީ އަހުމަދު އާގިލް (އައްމަޑޭ) އެވެ. މިއަހަރުގެ މުބާރާތުގެ ފަސްވަނަ ބުރުގައި ވާދަކޮށް އައްމަޑޭގެ ފަޔަށް ލިބުނު އަނިޔާއަކާ ގުޅިގެން ކުއާޓާ ފައިނަލުގައި އައްމަޑޭ ވާދައެއް ނުކުރެ އެވެ.
ގާމާދޫކޮޅުގެ ޖޫނިއާ ބައިގެ ޗެމްޕިއަންކަން ކަޔާން އަބްދުﷲ އަރީފް ހޯދީ ފައިނަލުގައި ޔަސީން އަހުމަދު ނާޝިދުގެ މައްޗަށް 5.27ގެ ތަފާތަކުން ކުރި ހޯދައިގެންްނެވެ. ފައިނަލް ހީޓުގައި ކަޔާން 12.77ގެ ސްކޯއެއް ހޯދިއިރު، ޔަސީން އަށް ހޯދުނީ 7.50ގެ ސްކޯއެކެވެ.
ޗެމްޕިއަންކަން ހޯދި ކަޔާން ފައިނަލުން ޖާގަ ހޯދީ މި މުބާރާތުގައި ރަނގަޅު ފޯމެއްގައި ހުރި މުހައްމަދު އިނާން އަބްދުލްހަންނާން ބަލިކޮށްގެންނެވެ. ސެމީ ފައިނަލް ހީީޓުގައި ކަޔާން 11.83ގެ ސްކޯއެއް ހޯދިއިރު، އިނާން އަށް ހޯދުނީ 10.06ގެ ސްކޯއެކެވެ.
ޔަސީން ފައިނަލުން ޖާގަ ހޯދީ ސެމީ ފައިނަލުގައި ޝާނިފް ޝަފީގް ބަލިކޮށްގެންނެވެ. ޔަސީން 11.84ގެ ސްކޯއެއް ހޯދިއިރު، ޝާނިފް އަށް ސެމީގައި ހޯދުނީ 8.53ގެ ސްކޯއެކެވެ.
ގައުމީ ސާފް ލީގުގައި ހިމެނެނީ ޖުމްލަ ފަސް އިވެންޓެވެ. ބާކީ އޮތީ އަންނަ ޖުލައި މަހުގެ 28 އިން އޮގަސްޓު 5އަށް ރ.ކިނޮޅަހުގައި އޮންނަ ހުރާކޮޅު ރާޅުގަނޑު އެވެ. އަދި މި އަހަރުގެ ވެސް އެންމެ ފަހު މުބާރާތް ކަމަށްވާ ރަންނަމާރި ޗެލެންޖް މާލޭގައި އޮންނާނީ އޮކްޓޫބަރު މަހުގެ 27 އިން ނޮވެމްބަރު މަހުގެ 25 ގެ ނިޔަލަށެވެ.
