ސާފިން އެސޯސިއޭޝަން އޮފް މޯލްޑިވްސް އިން ބޭއްވި ގައުމީ ސާފިން ލީގުގެ ދެ ވަނަ މުބާރާތް "މުލީކޮޅު ރާޅުގަނޑު" ގެ ޗެމްޕިއަންކަން ގދ. ގައްދޫ އިސްމާއިލް ރަޝީދު (ސްމައިލީ) ހޯދައިފި އެވެ.
ސްމައިލީ ޗެމްޕިއަންކަން ހޯދީ ފައިނަލުގައި ޔޫސުފް ކަޔާން ހަމްދާން ރަޝީދު ދެ ޕޮއިންޓްގެ ތަފާތުން ބަލިކޮށްގެންނެވެ.
އިއްޔެ ކުރިއަށްދިޔަ ފައިނަލް ހީޓު ސްމައިލީ ކާމިޔާބުކުރީ 13.00 ސްކޯ ކޮށްގެންނެވެ. ކަޔާން އަށް ލިބުނީ 11.00 ސްކޯ އެކެވެ. ފައިނަލް ހީޓުގައި ސްމައިލީ އެންމެ ރަނގަޅަށް އެޅީ ދެ ވަނަ އަދި ތިން ވަނަ ރާޅުގަ އެވެ. އޭނާގެ ދެ ވަނަ ރާޅުން ވަނީ 7.50 ސްކޯ ކޮށްފަ އެވެ. އަދި ތިން ވަނަ ރާޅުގައި ވަނީ 5.50 ސްކޯކޮށްފަ އެވެ.
ކަޔާން އެންމެ ރަނގަޅަށް ސްކޯ ކުރީ ފުރަތަމަ އަދި ދެ ވަނަ ރާޅުގަ އެވެ. ފުރަތަމަ ރާޅުން އޭނާ ވަނީ 2.33 ސްކޯކޮށްފަ އެވެ. އަދި ދެވަނަ ރާޅުގައި 8.67 ސްކޯކުރި އެވެ.
މި މުބާރާތުގެ ޖޫނިއާ ކެޓަގަރީގެ ޗެމްޕިއަންކަން ހޯދީ މުހައްމަދު އިނާން އަބްދުލް ހަންނާން އެވެ. އޭނާ ފައިނަލް ކާމިޔާބުކުރީ ޔާސީން އަހުމަދު ނާޝިދު ބަލިކޮށްގެންނެވެ.
ފައިނަލުގައި އިނާން ވަނީ 10.50 ސްކޯކޮށްފަ އެވެ. ޔާސީން އަށް ސްކޯކުރެވުނީ 7.67 އެވެ.
އިނާން އެންމެ ރަނގަޅަށް ސްކޯކުރީ ދެ ވަނަ ރާޅު އަދި ފަސްވަނަ ރާޅުގަ އެވެ. ދެ ވަނަ ރާޅުގައި އޭނާ ވަނީ 5.00 ސްކޯކޮށްފަ އެވެ. އަދި ފަސް ވަނަ ރާޅުގައި 5.50 ސްކޯކުރި އެވެ. ޔާސީން އެންމެ ރަނގަޅަށް ސްކޯކުރީ ދޭއް އަދި ތިން ވަނަ ރާޅުގަ އެވެ. ދެވަނަ ރާޅުގައި އޭނާ ވަނީ 3.50 ސްކޯ ކޮށްފަ އެވެ. އަދި ތިންވަނަ ރާޅުގައި 4.17 ސްކޯކުރި އެވެ.
