ގައުމީ ސާފިން ލީގުގެ ފަހު މުބާރާތް، ރަންނަމާރި ޗެލެންޖްގެ އަންހެން ޑިވިޝަންގެ ޗެމްޕިއަންކަން ހޯދައި މި މުބާރާތް ޖެހިޖެހިގެން ހަތަރު ވަނަ ފަހަރަށް މަރިޔަމް ރާހިލް ނަސީމް (އާޔާ) ހޯދައިފި އެވެ.
ފުރަތަމަ ފަހަރަށް ގައުމީ މުބާރާތުގައި އަންހެން ޑިވިޝަން ހިމެނީ 2021 ގަ އެވެ. އެ އަހަރު އާޔާ ޗެމްޕިއަންކަން ހޯދައި ތާރީހުން ޖާގަ ހޯދިއިރު، އޭގެ ފަހުން ސާފިން މުބާރާތެއްގައި އަންހެން ޑިވިޝަން ހިމެނި ހުރިހާ ފަހަރަކު ޗެމްޕިއަންކަން ހޯދީ އާޔާ އެވެ.
ރާއްޖޭގައި އުފެދުނު އެންމެ ކުޅަދާނަ އަންހެން ސާފަރު، އާޔާ ވަނީ 2021 ގެ ރަންނަމާރި ޗެލެންޖު ހޯދުމުގެ އިތުރުން 2022 ގައި ގދ. ގައްދޫގައި އޮތް ކަޅެގަލެކޮޑާ މުބާރާތާއި ކ. ހިންމަފުށީގައި އޮތް ގާމާދޫކޮޅު ރާޅުގަނޑު މުބާރާތުގެ ޗެމްޕިއަންކަން ވެސް ހޯދައިފަ އެވެ.
މޯލްޑިވްސް ސްޕޯޓްސް އެވޯޑްސް އިން ހޮވި އެންމެ މޮޅު އަންހެން ސާފިން އެތުލީޓު، އާޔާ މި ފަހަރު ގައުމީ ޓްރޮފީ ހޯދީ ފަސް ސާފަރުންނާ ވާދަކޮށްފަ އެވެ. ސާފިންގެ އަންހެން ޑިވިޝަނުގައި ނަމްބަރު އިތުރު ފަހަރެއްގެ ގޮތުގައި ފާހަގަކުރެވުނު މި މުބާރާތުގެ ފައިނަލުގައި އާޔާ ކުރިހޯދީ ތަޖުރިބާކާރު ސާފަރު، ޝާޒިޔާ ސައީދު (ޝާޒު) ބަލިކޮށްފަ އެވެ. ފައިނަލް ހީޓަށް ބަލާއިރު، އާޔާ އެޅި ތިން ރާޅުގެ ތެރެއިން ރަނގަޅު ދެ ރާޅުގެ ސްކޯ އިން ނަތީޖާ ބެލިއިރު، ޖުމްލަ 10.25 ޕޮއިންޓް ސްކޯކުރި އެވެ. ޝާޒު، ހަ ރާޅު ސްކޯކުރިއިރު، ރަނގަޅު ދެ ރާޅަށް ޖުމްލަ އެކު ލިބުނީ، 6.50 ޕޮއިންޓެވެެ.
މި އަހަރު ތުލުސްދޫގައި ކުރިއަށްދިޔަ އޭޝިއަން ސާފިން ޗެމްޕިއަންޝިޕްގައި ރާއްޖޭން ނެރުނު ނަތީޖާ އަށް ބަލައިފައި، ޖަޕާނުގައި 2026 ވަނަ އަހަރު ކުރިއަށްދާ އޭޝިއަން ގޭމްސްގެ އަންހެން ސާފިންގައި ސައުތު އޭޝިއާ އަށް ލިބޭ ސްލޮޓް ރާއްޖެ އަށް ކަށަވަރުވަރުވި އެވެ. ޖަޕާނުގައި 2026 ވަނަ އަހަރު އޮންނަ އޭޝިއަން ގޭމްސް އަކީ ސާފިން އިވެންޓް ހިމެނޭ ފުރަތަމަ އޭޝިއަން ގޭމްސް އެެވެ. އެ ތާރީހީ ގޭމްސް އަށް ރާއްޖެއިން ދާނެ އަންހެން ސާފަރަކު ނިންމާނީ ރާއްޖޭގެ ސާފިން އެސޯސިއޭޝަނުންނެވެ. މި ވަގުުތު ފެންނަމުން އަންނަ މަންޒަރަށް ބަލާއިރު، އެ ޖާގަ އާުޔާ އަށް ލިބުމުގެ ފުރުސަތު ވަރަށް ބޮޑެވެ.
ރަންނަމާރި ޗެލެންޖްގައި މި ފަހަރު އަންހެން ޑިވިޝަނުގެ ތިން ވަނަ ހޯދީ ރިޝްތާ ސުޖާއު އެވެ. އޭނާ ވަނީ އެ ހީޓުގައި، 6.25 ޕޮއިންޓް ސްކޯކޮށްފަ އެވެ. އެއީ، ހަ ރާޅުގައި އެޅިއިރު، އެންމެ ފަހު ރާޅުން ސްކޯ ރަނގަޅުކޮށްގެން ހެދި ޖުމްލަ އެކެވެ. އެ ހީޓުގައި ދެން ވާދަކުރި، އަލަށް ވާދަވެރި މުބާރާތެއްގައި ވާދަކޮށް ތިން ވަނަ ހޯދި ރައުފާ އަހުމަދުގެ ސްކޯ އަކީ 4.80 ޕޮއިންޓެވެ. އޭނާ ވަނީ ޖުމްލަ، ހަތަރު ރާޅު އަޅައިފަ އެވެ.
އަންހެން ޑިވިޝަންގައި ދެން ވާދަކުރީ އަލަށް ފެނިގެންދިޔަ، އައިމިނަތު ތާނީސް ޝިރާންގެ އިތުރުން، މީގެ ކުރިން ވެސް މުބާރާތުން ފެނިފައިވާ ނަހާ ނަސްރުﷲ އެވެ.
