ޕެރިސް، ފްރާންސް (ޖޫން 17) - ލުބްނާނަށް ކުރިމަތިވެފައިވާ "ސިޔާސީ ހުސްކަމަށް" އަވަސް ހައްލެއް ހޯދަން ސައުދީ އަރަބިއްޔާގެ ވަލީ އަހުދު އަމީރު މުހައްމަދު ބިން ސަލްމާނާއި ފްރާންސްގެ ރައީސް އިމޭނުއެލް މެކްރޯން ގޮވާލައްވައިފި އެވެ.
ވަލީ އަހުދު ފްރާންސަށް ކުރެއްވި ރަސްމީ ދަތުރުގެ ތެރެއިން މެކްރޯން އެންމެ ބޮޑު އިސްކަމެއް ދެއްވި މައްސަލައަކީ ލުބްނާންގެ މައްސަލަ އެވެ. ލުބްނާންގެ ރައީސްކަމުގައި އަދިވެސް ހުންނެވީ ވަގުތީ ރައީސެކެވެ.
އާ ރައީސެއް ހޮވުމަށް ޕާލަމެންޓުން ކުރަމުންދާ މަސައްކަތް 12 ވަނަ ފަހަރަށް ފެއިލްވީ މިދިޔަ ބުދަ ދުވަހު އެވެ. އޭގެ ސަބަބުން ލުބްނާންގެ އިޖުތިމާއީ އިގުތިސާދީ ހާލަތު ދަނީ ގޯސްވަމުންނެވެ.
ވަލީ އަހުދާއި މެކްރޯންގެ ބައްދަލުވުމަށް ފަހު ފްރާންސްގެ ސަރުކާރުން ނެރުނު ބަޔާނުގައި ބުނީ ލުބްނާންގެ ކުރިއެރުމަށް އޮތް އެންމެ ބޮޑު ހުރަހަކީ "ސިޔާސީ ހުސްކަމުގެ" ގޮތުގައި ދެ ލީޑަރުން ދެކިވަޑައިގަންނަވާ ކަމަށެވެ.
އޭގެ އިތުރުން މެދުއިރުމަތީގެ ސެކިއުރިޓީ އާއި ހަމަޖެހުން ވަރުގަދަ ކުރުމަށް ދެ ގައުމު ގުޅިގެން މަސައްކަތް ކުރުމަށް ދެ ލީޑަރުން މަޝްވަރާ ކުރެއްވި އެވެ.
"ސައުދީ އަރަބިއްޔާގެ ދިފާއީ ގާބިލިއްޔަތުކަން ވަރުގަދަ ކުރަން އެހީވެދިނުމަށް ފްރާންސް ތައްޔާރު،" އެ ބަޔާނުގައި ބުންޏެވެ.
