މެންޗެސްޓާ (ޖޫން 17) - މި މަހުގެ ނިޔަލަށް މެންޗެސްޓާ ޔުނައިޓެޑްގެ ކޮންޓްރެކްޓްގައި ހުރި ސްޕެއިންގެ ގޯލްކީޕަރު، ޑޭވިޑް ޑެހެއާ، 12 އަހަރަށް ފަހު، ޔުނައިޓެޑް ދޫކޮށްލުމުގެ ފުރުސަތު ބޮޑު ކަމަށް މީޑިއާ ރިޕޯޓްތައް ބުނެފި އެވެ.
ޔުނައިޓެޑުން އިއްޔެ ނެރުނު އެ ކްލަބުން ކޮންޓްރެކްޓްގައި ދެމިތިބޭނެ ކުޅުންތެރިންގެ ލިސްޓުގައި ޑެހެއާ، 32، ގެ ނަމެއް ނެތެވެ. ލިސްޓް އާންމުވިތާ ކުޑަ އިރުކޮޅެއްގެ ތެރޭގައި ޔުނައިޓެޑުން ވަނީ ޑެހެއާގެ މުސްތަގުބަލާ ބެހޭގޮތުން ބަޔާނެއް ނެރެފަ އެވެ.
ޔުނައިޓެޑުން ބުނީ ޑެހެއާއާ އެކު އާ ކޮންޓްރެކްޓެއްގެ މަޝްވަރާތައް ކުރިއަށްދާ ކަމަށެެވެ. އެކަމަކު، މީޑިއާ ރިޕޯޓްތައް ބުނާގޮތުން އެއްބަސްވުން އާ ކުރިޔަސް ޔުނައިޓެޑްގެ އެއް ވަނަ ކީޕަރުގެ މަގާމު ޑެހެއާ އަށް ޔަގީންނުވާތީ އޭނާ އެ ކްލަބް ދޫކޮށްލުމުގެ ފުރުސަތު އެބައޮތެވެ.
ޑެހެއާ، ޔުނައިޓެޑަށް ބަދަލުވީ އެތުލެޓިކޯ މެޑްރިޑް ދޫކޮށް 2011 ވަނަ އަހަރު އެވެ. ޔުނައިޓެޑުން ވަނީ އޭރު ޑެހެއާ ގަންނަން އެތުލެޓިކޯ އަށް 18 މިލިއަން ޕައުންޑް (24 މިލިއަން ޑޮލަރު) ދީފަ އެވެ. ޑެހެއާ، ޔުނައިޓެޑް ދޫކޮށްލުމާ އެންމެ ގާތަށް ދިޔައީ 2015 ވަނަ އަހަރު އެވެ. އެ ފަހަރުގެ ޓްރާންސްފާ މާކެޓްގެ ފަހު ދުވަހު ޑެހެއާ އަށް ރެއާލް މެޑްރިޑަށް ސޮއިނުކުރެވުނީ ޔުނައިޓެޑުން ފަހު ވަގުތު ރެއާލަށް ބޭނުންވާ ލިޔެކިޔުންތައް ފެކްސް ނުކުރުމުންނެވެ. އޭގެ ފަހުން، ދޮޅު އަހަރެއްހާ ދުވަހުގެ މުއްދަތަށް ޔުނައިޓެޑާއި ޑެހެއާގެ ގުޅުން ހީނަރުވި އެވެ.
މިދިިޔަ ސީޒަނުގައި ޔުނައިޓެޑްގެ ކޯޗުކަމާ ނެދަލެންޑްސްގެ އެރިކް ޓެން ހާގް ހަވާލުވި ފަހުން، ޑެހެއާގެ މުސްތަގުބަލާ ބެހޭގޮތުން އެކި ފަހަރު މަތިން މީޑިއާގެ ސުވާލުތައް ކުރިމަތިވި އެވެ.
ޕްރިމިއާ ލީގުގެ މޮޅު ކީޕަރަށް ދޭ "ރަން އަންގި" މިދިޔަ ސީޒަނުގައި ހޯދި ޑެހެއާ އަށް ޔުނައިޓެޑްގެ އެއް ވަނަ ކީޕަރުގެ ގޮތުގައި އެ ކްލަބްގައި މުސްތަގުބަލެއް އޮތްކަމުގެ ޔަގީން ޖަވާބެއް ނުދީ ޓެން ހާގް ބުނީ ކުރިއަށް އޮތް ޓްރާންސްފާގައި ޔުނައިޓެޑުން އާ ކީޕަރެއް ހޯދާނެ ކަމަށެވެ.
އެއާ އެކު، މި ފަހަރުގެ ޓްރާންސްފާގައި ޑެހެއާ އެހެން ކްލަބަކާ ގުޅުމުގެ ފުރުސަތު އޮތީ ބޮޑުވެފަ އެވެ.
ޔުނައިޓެޑުން އާ ކީޕަރެއް ހޯދަން ފާރަލަމުން އަންނަނީ، ބަޔާން މިއުނިިކްގައި ހުރި ސްވިޒަލެންޑްގެ ޔެން ސޮމާ، އިންޓަ މިލާނަށް ކުޅެމުން އަންނަ ކެމަރޫންގެ އަންދްރޭ އޮނާނާގެ އިތުރުން ޕޯޗުގަލްގެ ޕޯޓޯ އަށް ކުޅެމުން އަންނަ ޑިއޮގޯ ކޮސްޓާ އަަށެވެ.
