ބްރައިޓަން (ޖޫން 17) - ޖަރުމަނުގެ ބޮޮރޫޝިއާ ޑޯޓްމަންޑަށް ކުޅުނު މަހުމޫދު ދާހޫދު، އިނގިރޭސި ޕްރިމިއާ ލީގުގެ ބްރައިޓަން އަށް ބަދަލުވާ ގޮތަށް ހުރިހާ ކަމެއް ހަމަޖެހިއްޖެ އެވެ.
އުމުރުން 27 އަހަރުގެ ދާހޫދު، ރަސްމީކޮށް ބްރައިޓަން އަށް ބަދަލުވާނީ ޖުލައި އެއް ވަނަ ދުވަހު އެވެ. އެއީ މި މަހުގެ ނިޔަލަށް އޭނާ ބޮރޫޝިއާ ޑޯޓްމަންޑާ އެކު ހަދާފައިވާ އޮތް އެއްބަސްވުން ހަމަވުމުން ހިލޭ ޓްރާންސްފާއެއްގަ އެވެ. ދާހޫދުގެ އިތުރުން މިދިޔަ އަށް އަހަރު ލިވަޕޫލަށް ކުޅުނު ތަޖުރިބާކާރު މިޑްފީލްޑަރު، ޖޭމްސް މިލްނާ ވެސް ހިލޭ ޓްރާންސްފާއެއްގައި ބްރައިޓަން އަށް ބަދަލުވާ ގޮތަށް ވަނީ ހަމަޖެހިފަ އެވެ.
ބްރައިޓަންގެ ކޯޗު ރޮބާޓޯ ޑި ޒާބީ ވަނީ ދާހޫދުގެ ސޮއި ލިބުމުން އެކަމާ ހިތްހަމަޖެހުން ފާޅުކޮށްފަ އެވެ. ޑި ޒާބީ ބުނީ އޭނާ އިޓަލީގެ ސަސުއޯލޯ އަށް ކޯޗުކޮށްދިންއިރު ވެސް ދާހޫދު ގަންނަން ބޭނުންވި ކަމަށެވެ.
ޑޯޓްމަންޑަށް 2017 ވަނަ އަހަރު ބަދަލުވުމުގެ ކުރިން، ދާހޫދު ކުޅެފައިވަނީ ބޮރޫޝިއާ މުންޗެންގްލަޑްބެކް އަށެވެ.
ބްރައިޓަން އަށް ކުޅެމުން އައި އާޖެންޓީނާގެ މިޑްފީލްޑަރު އަލެކްސިސް މެކް އަލިސްޓާ ވަނީ 50 މިލިއަން ޑޮލަރުގެ ފީ އަކަށް ލިވަޕޫލަށް ސޮއިކޮށްފަ އެވެ. މީގެ އިތުރުން، ބްރައިޓަން ޓީމުގައި ހިމެނޭ އެކުއެޑޯގެ މިޑްފީލްޑަރު، މޮއިސަސް ކައެސޭޑޯ އަންނަނީ ޗެލްސީ އަށް ބަދަލުވާން އެ ޓީމާ މަޝްވަރާ ކުރަމުންނެވެ.
