އެމެރިކާގެ ވެރިރަށް ވޮޝިންޓަނުގައި ރާއްޖޭގެ އެމްބަސީއެއް ހުޅުވުމަށް ފޮރިން މިނިސްޓަރު އަބްދުﷲ ޝާހިދު އެ ގައުމަށް ވަޑައިގެންފި އެވެ.
ރާއްޖެ އަދި އެމެރިކާއިން ދެ ގައުމުގައި އެމްބަސީ ހުޅުވުމަށް ނިންމީ 2020 ގައި އެމެރިކާގެ ކުރީގެ ފޮރިން މިނިސްޓަރު މައިކް ޕޮމްޕެއޯ ރާއްޖެއަށް ކުރެއްވި ދަތުރުފުޅުގައި ކުރެވުނު މަޝްވަރާތަކަށްފަހެވެ.
މިހާރު އެމެރިކާއިން ރާއްޖެއާއެކު ހާރިޖީ މުއާމަލާތް ކުރަނީ ލަންކާގައި ހުންނަ އެ ގައުމުގެ އެމްބަސީ މެދުވެރިކޮށެވެ. ރާއްޖެއިން އެ ގައުމާއެކު ހާރިޖީ މުއާމަލާތް ކުރަނީ އދ. ގައި ހުންނަ ރާއްޖޭގެ މިޝަން މެދުވެރިކޮށެވެ.
އެމެރިކާއަށް ވަޑައިގެން ޝާހިދު ކުރެއްވި ޓުވީޓެއްގައި ވިދާޅުވީ އެމަނިކުފާނުގެ ދަތުރުފުޅުގައި ރާއްޖޭގެ އެމްބަސީ ހުޅުވުމުގެ އިތުރުން އެމެރިކާގެ ފޮރިން މިނިސްޓަރު އެންޓޮނީ ބްލިންކެން އާ ބައްދަލުކުރައްވާނެ ކަމަށެވެ. އަދި މި ދަތުރަކީ "ދެ ގައުމުގެ ގުޅުން މިހާރަށްވުރެ ބަދަހިވެ، މުހިންމު ދާއިރާތަކުން ދެ ގައުމުގެ ދެގެދުގައި މަޝްވަރާ ކުރެވިގެންދާނެ" ދަތުރަކަށް ވާނެ ކަމަށް ވެސް ޝާހިދު ވިދާޅުވި އެވެ.
މިއީ ރާއްޖެއިން އެމެރިކާއާ އެކު 1966 ގައި ޑިޕްލޮމެޓިކް ގުޅުން ގާއިމުކުރުމަށްފަހު އެ ގައުމުގައި އެމްބަސީއެއް ހުޅުވާ ދެ ވަނަ ފަހަރެވެ. މީގެ ކުރިން 2007 ގައި ވޮޝިންޓަނުގައި ހުޅުވި ދިވެހި އެމްބަސީ ޖެހިގެން އައި އަހަރު ބަންދުކުރީ މާލީ ދަތިތަކާހުރެ ކަމަށް އޭރުގެ ސަރުކާރުން ބުނެފައިވެ އެވެ.
