ބެއިޖިން، ޗައިނާ (ޖޫން 13) - އިޒްރޭލާއި ފަލަސްތީނުގެ ސުލްހައިގެ މަޝްވަރާގައި މެދުވެރިއެއްގެ ދައުރު އަދާކުރަން ޗައިނާއިން ޝައުގުވެރިކަން ފާޅުކޮށްފައި ވަނިކޮށް، ފަލަސްތީނުގެ ރައީސް މަހްމޫދް އައްބާސް އަންގާރަ ދުވަހު ބެއިޖިންއަށް ވަޑައިގެންފި އެވެ.
ޗައިނާ ސަރުކާރުން ބުނީ ހުކުރު ދުވަހާ ހަމައަށް އައްބާސް ހުންނަވާނީ އެ ގައުމުގައި ކަމަށެވެ. މިއީ އައްބާސް ޗައިނާއަށް ކުރައްވާ ފަސް ވަނަ ރަސްމީ ދަތުރެވެ.
ފަލަސްތީނުގެ ރަސްމީ ނިއުސް އެޖެންސީ ވަފާއިން ބުނީ އައްބާސް އާއި ޗައިނާގެ ރައީސް ޝީ ޖިންޕިން ބައްދަލުކުރައްވާނެ ކަމަށެވެ. އޭގެ އިތުރުން ޕްރިމިއާ ލީ ޗިއާންގްއާ ވެސް ބައްދަލުކުރައްވާނެ އެވެ.
މަހްމޫދް އައްބާސްއަކީ ޗައިނާ ރައްޔިތުންގެ ޒަމާންވީ ގާތް އެކުވެރިއެއްގެ ގޮތުގައި އެ ގައުމުގެ ފޮރިން މިނިސްޓްރީން ސިފަކުރި އެވެ.
"ފަލަސްތީން ރައްޔިތުންނަށް ގާނޫނީ ގޮތުން ލިބިދޭން ޖެހޭ ގައުމީ ހައްގުތައް އަނބުރާ ހޯދުމަށް ފަލަސްތީން ރައްޔިތުން ކުރާ މަސައްކަތަށް ޗައިނާއިން އަބަދުވެސް ފުރިހަމައަށް އެއްބާރުލުން ދީފައި ވާނެ."
މިދިޔަ އަހަރުގެ ޑިސެމްބަރު މަހު ޝީ ޖިންޕިން ސައުދީ އަރަބިއްޔާއަށް ކުރެއްވި ދަތުރުގެ ތެރެއިން ވެސް މަހްމޫދް އައްބާސްއާ ބައްދަލުކޮށް، ފަލަސްތީން ރައްޔިތުންގެ ހައްގުގައި މަސައްކަތް ކުރައްވާނެ ކަމަށް ވައުދުވެވަޑައިގެންނެވި އެވެ.
