ސްޓޮކްހޯމް، ސްވިޑަން (ޖޫން 12) - ކީރިތި ގުރުއާން އަަންދަން ރާވައި މި އަހަރުގެ ކުރީކޮޅު ބާއްވަން އުޅުނު ދެ އެއްވުން މަނާކުރަން ފުލުހުން ނިންމީ އެއްވެސް ގާނޫނީ ސަބަބެއް ނެތި ކަމަށް ސްވިޑަންގެ ކޯޓަކުން ނިންމައިފި އެވެ.
ޖެނުއަރީ މަހު ތުރުކީ އެމްބަސީ ބޭރުގައި ގުރުއާން އެންދުމުން މުސްލިމް ގައުމުތަކުގެ ނުރުހުން އަމާޒުވި އެވެ. ބައެއް ގަައުމުތަކުގައި މުޒާހަރާކޮށް ސްވިޑަންގެ އުފެއްދުންތައް ބޮއިކޮޓް ކުރި އިރު، ނޭޓޯގެ މެމްބަރުކަން ހޯދަން ސްވިޑަންއިން ކުރާ މަސައްކަތަށް ވެސް ހުރަސް އެޅުނެވެ.
އޭގެ ފަހުން ވެސް އެފަދަ ދެ އެއްވުން ބާއްވަން މަސައްކަތް ކުރި އެވެ. އެއީ ތުރުކީ އަދި އިރާގު އެމްބަސީ ބޭރުގައި ގުރުއާން އެންދުމުގެ ބޭނުމުގަ އެވެ. އެހެން ނަމަވެސް، އެ ދެ އެއްވުމަށް ވެސް ފުލުހުން ހުއްދައެއް ނުދިނެވެ.
ފުލުހުން ބުނީ ޖެނުއަރީ މަހު ބޭއްވި އެއްވުމުގެ ސަބަބުން ސްވިޑަންއަަށް ހަމަލާއެއް އައުމުގެ ނުރައްކާ ބޮޑުވި ކަމަށެވެ.
އެކަމަކު އެއްވުން އިންތިޒާމް ކުރި ފަރާތުން ސްޓޮކްހޯމް އެޑްމިނިސްޓްރޭޓިވް ކޯޓަށް ހުށަހެޅި މައްސަލައިގައި ނިންމީ ފުލުހުންނާ ދެކޮޅަށެވެ. އޭރު ކޯޓުން ބުނީ ފުލުހުން ފާހަގަކުރި ސަލާމަތީ ސަބަބަކީ އެއްވެ އުޅުމުގެ ހައްގު ހަނިކުރެވޭނެ ވަރުގެ ސަބަބެއް ނޫން ކަމަށެވެ.
ފުލުހުން ވަނީ އެ ނިންމުން އިސްތިއުނާފްކޮށްފަ އެވެ. އެހެން ނަމަވެސް، ހޯމަ ދުވަހު އިސްތިއުނާފް ކޯޓުން ވެސް ނިންމީ ފުލުހުންނާ ދެކޮޅަށެވެ. ދެން ނިންމުން އިސްތިއުނާފް ކުރަަން ދާން ޖެހޭނީ ސުޕްރީމް އެޑްމިނިސްޓްރޭޓިވް ކޯޓަށެވެ.
ގުރުއާން އެންދުމާ ދެކޮޅަށް ސްވިޑަންގެ ސިޔާސީ ފަރާތްތަކުން އަޑުއުފުލި ނަމަވެސް، ހިޔާލު ފާޅުކުރުމުގެ މިނިވަންކަން ހަނި ނުކުރެވޭނެ ކަމަށް ބުނެފައިވެ އެވެ.
