ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ މަގާމުން ވަކި ކުރަން ހުށަހަޅާފައިވާ މައްސަލައިގެ ގަރާރު މިއަދު މަޖިލީހުގައި އިއްވަން ޖެހުނު ނަމަވެސް އެ މައްސަލަ އެޖެންޑާނުކޮށް ޖަލްސާ ފަށައިފި އެވެ.
މިއަދު ރައްޔިތުންގެ މަޖިލީހުގެ ޖަލްސާގައި ރިޔާސަތު ބަލަހައްޓަވަނީ ވިލުފުށީ ދާއިރާގެ މެމްބަރު ހަސަން އަފީފެވެ. އެއީ ރިޔާސަތު ބަލަހައްޓަން އުޒުރުވެރިވެވަޑައިގަންނަވާ ކަމަށް މަޖިލީހުގެ ރައީސް މުހައްމަދު ނަޝީދު އަންގަވާފައިވާތީ އެވެ.
ނަމަވެސް ރައްޔިތުންގެ މަޖިލީހުގައި ތިއްބެވި ސަރުކާރަށް ތާއީދު ކުރާ މެމްބަރުން އަދި ބައެއް މިނިވަން މެމްބަރުން ނިޒާމީ ނުކުތާ ނަންގަވާތީ މަޖިލީހުގައި މިއަދު އެޖެންޑާކޮށްފައި އޮތް މަސައްކަތް ކުރިއަކަށްނުދެ އެވެ.
"އަޅުގަނޑު ހިތާމަ ކުރަނީ އިއްޒަތްތެރި ރައީސް ގާނޫނު އަސާސީއާ ތި ގޮނޑީގައި އިންނާތީ. ގާނޫނު އަސާސީއަށް ރުޖޫއަވެވަޑައިގަންނަވާ އަދި އަމީން އާންމު ވެސް [ކައުންސިލް ޖެނެރަލް ފާތިމަތު] ފިލްޒާ ވެސް [ގާނޫނު އަސާސީއަށް] ރުޖޫއަވެވަޑައިގަންނަވާށޭ،" ކާށިދޫ ދާއިރާގެ މެމްބަރު އަބްދުﷲ ޖާބިރު ނިޒާމީ ނުކުތާއެއް ނަންގަވައި އަފީފަށް ނިސްބަތް ކުރައްވާ ވިދާޅުވި އެވެ.
ރައްޔިތުންގެ މަޖިލީހުގެ ގަވާއިދުގެ 205 ވަނަ މާއްދާގެ ނ. ގައި ބުނެފައި އޮންނަ ގޮތުން މަޖިލީހުގެ ރައީސް ނުވަތަ ނައިބު ރައީސްގެ ވަކި ކުރަން ހުށަހެޅުމުން އެކަން އަމީން އާންމު ރައީސްއަށާއި މެމްބަރުންނަށް ރަސްމީ ތިން ދުވަހުގެ ތެރޭގައި އަންގައި ނޯޓިހެއް ފޮނުވަންޖެހެ އެވެ. އަދި, އެ ނޯޓިހުގެ ތާރީހުން ފެށިގެން 14 ދުވަސް ދިނުމަށްފަހު ދެން އެންމެ އަވަހަށްޖެހޭ ރަސްމީ ބަންދު ނޫން ދުވަހެއްގައި ރައީސް މަގާމުން ވަކި ކުރުމުގެ ޖަލްސާ ބާއްވަންޖެހެ އެވެ.
އިވާގެ މައްސަލައިގައި ނޯޓިސް ހަމަވެ، ޖަލްސާ ބާއްވަންޖެހޭ ތާރީހަކީ މިއަދެވެ.
ރައްޔިތުންގެ މަޖިލީހުގެ ނައިބު ރައީސް ވަކި ކުރުމުގެ އިޖުރާއަތުގެ ތެރެއިން ގަރާރު އިއްވަން ބާއްވާ ޖަލްސާ އެޖެންޑާާ ނުކުރެއްވުމަށްފަހު އެ މަޖިލީހުގެ އަމީން އާންމު ފާތިމަތު ނިޔުޝާ ވިދާޅުވީ އެ ޖަލްސާ އެޖެންޑާ ކުރެވޭނީ އާންމު ކޮމެޓީ އެކުލަވާލެވިގެން ކަމަށެވެ.
ކޮމެޓީތަކުގެ މަސައްކަތް ހުއްޓިފައި އޮތީ އެމްޑީޕީގެ 13 މެމްބަރަކު އެ ޕާޓީން ވަކިވުމުން ކޮމެޓީތަކުގެ ރޭޝިއޯއަށް ބަދަލު އައުމުންނެވެ. އިދިކޮޅު މެމްބަރުން އަދި އަމީން އާންމު ވިދާޅުވަނީ އީވާގެ މައްސަލަ އެޖެންޑާ ކުރެވޭނީ ކޮމެޓީގެ ފުރިހަމަވުމުން ކަމަށެވެ.
ނަމަވެސް އެމްޑީޕީގެ މެމްބަރުން ވިދާޅުވަނީ ކޮމެޓީތައް ދެމި އޮތް ކަމަށާއި ކޮމެޓީތަކުގެ މަސައްކަތަށް ގޮވާލުމަކީ އަމީން އާންމުގެ ޒިންމާއެއް ކަމަށެވެ. ނަމަވެސް މިދިޔަ ހަފުތާގައި ކުރެވުނު މަޝްވަރާއިން ވެސް ހުރިހާ ޕާޓީތައް އެއްބަސްނުވެގެން ކަމަށް ބުނެ ކޮމެޓީ އެކުލަވާނުލެވުނެވެ. ކޮމެޓީ އެކުލަވާލަންޖެހެނީ ރައްޔިތުންގެ މަޖިލީހުގެ މެޖޯރިޓީ އާއި މައިނޯރިޓީ ލީޑަރުންގެ މަޝްވަރާގެ މަތިން މަޖިލީހުގެ ރައީސް އެވެ.
