ރައްޔިތުންގެ މަޖިިލީހުގެ އާއްމު ކޮމިޓީގެ ބައްދަލުވުމެއް އިންތިޒާމު ނުކުރައްވާތީ އަމީން އާއްމު ފާތިމަތު ނިއުޝާއަށާއި ކައުންސެލް ޖެނެރަލަށް އެމްޑީޕީން ފާޑު ކިޔައި، އެޕާޓީގެ ސޯޝަލް މީޑިއާ އެކްޓިވިސްޓުން އެ ދެބޭފުޅުންނަށް ފުރައްސާރަކުރަން ފެށުމުން މަޖިލީހުގެ ރައީސް މުހައްމަދު ނަޝީދު އެކަމާ ކަންބޮޑުވުން ފާޅުކުރައްވައިފި އެވެ.
ރައްޔިތުންގެ މަޖިލީހުގެ ނައިބުރައީސް އީވާ އަބްދުﷲ ވަކިކުރަން އެމްޑީޕީން ހުށަހެޅި މައްސަލައިގެ ނޯޓިސް މިއަދު ވަނީ ހަމަ ވެފަ އެވެ. އެހެން ނަމަވެސް އެ މައްސަލަ މަޖިލީހަށް އެޖެންޑާ ނުކުރަނީ އާއްމު ކޮމިޓީން އެ މައްސަލަައިގެ ބަހުސްގެ ވަގުތު ކަނޑަނާޅާތީ އެވެ. އެ ކޮމިޓީގެ ބައްދަލުވުމެއް ނުބާއްވަނީ ، އެމްޑީޕީގެ މެމްބަރުންތަކެއް އެޕާޓީން ވަކިވެވަޑައިގެންނެވުމުން ކޮމިޓީތައް އަލުން އެކުލަވައިލަން ޖެހޭ ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވާތީ އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު ޖަލްސާއެއްގެ ރިޔާސަތު ބަލަހައްޓަވަނީ. ފޮޓޯ:މަޖިލީހުގެ އިދާރާ
އެމްޑީޕީން ދެކެނީ ކޮމިޓީތައް އަލުން އެކުލަވާލައި މަޖިލީހުގެ ތަޅުމުން ފާސްކުރުމާ ހަމައަށް މިހާރު އޮތް ގޮތަށް ކޮމިޓީތައް ހިންގޭނެ ކަމަށެވެ. އަމީން އާއްމު ނިއުޝާއަށާއި ކައުންސެލް ޖެނެރަލަށް އެމްޑީޕީގެ އެކްޓިވިސްޓުން ފާޑުކިޔަނީ ނަޝީދުގެ ރައުޔާ އެއްގޮތަށް އާއްމު ކޮމިޓީ ހުއްޓުވާފައި ބާއްވާތީ އެވެ.
ރައްޔިތުންގެ މަޖިލީހުގެ ރައީސްގެ ރަސްމީ ލެޑަހެޑްގައި ނަޝީދު މިއަދު ނެރުއްވި ބަޔާނުގައި ވިދާޅުވީ މަޖިލީހުގެ ގަވައިދު ބުނާ ގޮތުން އަމީންއާއްމާއި ކައުންސެލް ޖެނެރަލަކީ މުސްތަގިއްލު ދެ މަގާމު ކަމަށެވެ. މަޖިލީހުގެ ގަދަރާއި ޝަރަފު އަމީންއާއްމު ހިފަހައްޓަވަން ޖެހޭ ހާއްސަ ވަގުތުތަކެއް މަޖިލީހުގެ ގަވައިދުގައި ކަނޑައަޅާފައިވާ ކަމަށް ވެސް އެމަނިކުފާނު ވިދާޅުވި އެވެ.
"...ހާއްސަ ގޮތެއްގައި ރައްޔިތުންގެ މަޖިލީހުގެ ރައީސެއް ނުހުންނަ ހާލަތުގަ އެވެ،" ބަޔާނުގައި ނަޝީދު ވިދާޅުވި އެވެ.
މަޖިލީހުގެ ރައީސާއި ނައިބުރައީސް ވެސް ވަކިކުރަން ހުށަހަޅާފައިވާ ކަން ފާހަގަކުރައްވަމުން އެމަނިކުފާނު ވިދާޅުވީ އެފަދަ މައްސަލަތަކުގައި ހިންގަން ޖެހޭ އިޖުރާއަތްތައް މަޖިލީހުގެ ގަވައިދުގައި ސާފުކޮށް ބަޔާންކޮށްފައިވާ ކަމަށެވެ. އެ އިޖުރާއަތްތައް މަޖިލީހުގެ މެމްބަރުންނަށް ބުނެދިނުމުގައި ގާނޫނީ އެހީތެރިކަން ފޯރުކޮށްދެއްވެން އޮތީ ގަވައިދު ބުނާ ގޮތުން ހަމަ އެކަނި ކައުންސެލް ޖެނެރަލަށް ކަމަށް ވެސް އެމަނިކުފާނު ވިދާޅުވި އެވެ.
"...ވީމާ ރައްޔިތުންގެ މަޖިލީހުގެ އަމީންއާއްމާއި އެހެނިހެން އޮފިޝަލުންގެ ގަދަރާއި އިއްޒަތަށް އަރައިގަތުމުގެ ޖާގަ އެއްވެސް މިންވަރަކަށް ދެވިގެން ނުވާނެ އެވެ،" ބަޔާނުގައި ނަޝީދު ވިދާޅުވި އެވެ.
ނަޝީދު މިފަދަ ބަޔާނެއް ނެރުއްވާފައި މިވަނީ އިތުބާރުނެތް ކަމަށް ކަނޑައަޅަން ހުށަހަޅާފައި ވާތީ މަޖިލީހުގެ ޖަލްސާތަކުގެ ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާ ކަމަށް ވިދާޅުވުމަށް ފަހުގަ އެވެ.
މަޖިލީހުގެ ޖަލްސާއެއް މާދަމާއަށް އެޖެންޑާކުރި ނަަމެވެސް މަޖިލީހުގެ ނައިބު ރައީސް އީވާ ވަކިކުރުމުގެ މައްސަލަ އެ ޖަލްސާއަކަށް އެޖެންޑާއެއް ނުކުރެ އެވެ.
