ރައްޔިތުންގެ މަޖިލީހުގެ ރައީސްކަމުން ރައީސް މުހައްމަދު ނަޝީދު ވަކިކުރަން، މަޖިލީހުގެ މެޖޯރިޓީ އޮންނަ އެމްޑީޕީން ކުރާ މަސައްކަތް ނިންމާނެ އިރަކަށް ކެތްމަދުވެފައި ހުންނެވި ކަމަށް އެމަނިކުފާނު އިއްޔެ ވިދާޅުވެއްޖެ އެވެ.
ރައްޔިތުންގެ މަޖިލީހުގެ އިއްޔެގެ ޖަލްސާގައި ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ދެއްކެވި ވާހަކައަކަށް ފަހު ރިޔާސަތުން ނަޝީދު ވިދާޅުވީ މައްޗަންގޮޅި މެދު ދާއިރާގެ މެމްބަރުގެ ހައިސިއްޔަތުން މަޖިލީހުގެ ބަހުސްގައި ބައިވެރިވެވަޑައިގެންނެވޭނެ ކަމަށް އުއްމީދުކުރައްވާ ކަމަށެވެ.
ނަޝީދު މިހެން ވިދާޅުވުމުގެ ކުރިން ހަސަން ލަތީފު ދެއްކެވި ވާހަކަ އަކީ ނަޝީދުގެ އަރިސްބޭފުޅުން އުފައްދަވާ އާ ޕާޓީ 'ދަ ޑިމޮކްރެޓްސް' އިން ގެންގުޅޭނެ ސިޔާސަތުތަކުގެ ވާހަކަ އެވެ. އެ ޕާޓީން ގެންގުޅޭނީ ރައްޔިތުންނަށް ވަރަށް ފައިދާހުރި ސިޔާސަތު ތަކެއް ކަަމަށް އޭނާ ވިދާޅުވި އެވެ.
"އިއްޒަތްތެރި މެމްބަރުންނަށް އެނގިވަޑައިގަންނަވާނެ އަޅުގަނޑު ކެތްމަދުވެފައި ހަގީގަތުގައި ރިޔާސަތުގައި މި އިންނަނީ. އުއްމީދުކުރެވެނީ [މައްޗަންގޮޅި] މެދު ދާއިރާގެ ބަހުސްގައި ބައިވެރިވެވޭނެ ކަމަށް," ހަސަން ލަތީފު ވާހަކަ ނިންމަވައިލެއްވުމާ އެކު ނަޝީދު ވިދާޅުވި އެވެ.
ނަޝީދުގެ އިތުބާރު ނެތް ކަމުގެ މައްސަލަ 54 މެމްބަރުންގެ ސޮޔާއެކު އިއްޔެ ވަނީ ހުށަހަޅައިފަ އެވެ.
އެމަނިކުފާނުގެ އިތުބާރު ނެތްކަމުގެ މައްސަލަ ހުށަހެޅަން ނިންމިކަން އިއުލާނުކުރީ އަންގާރަ ދުވަހު ބޭއްވި އެމްޑީޕީ ޕީޖީގެ ނޫސްވެރިންގެ ބައްދަލުވުމެއްގަ އެވެ. އެއީ އެމަނިކުފާނު ގާނޫނު އަސާސީ އާއި ގަވާއިދުތަކާ ހިލާފަށް މަޖިލިސް ހިންގަވާތީ ކަމަށް އެމްޑީޕީގެ ޕީޖީން ބުނެ އެވެ.
ނަޝީދުގެ އިތުބާރު ނެތް މައްސަލައިގައި ސޮއި ކުރެއްވި މެމްބަރުންގެ ތެރޭގައި ތެރޭގައި ހިމެނެނީ އެމްޑީޕީގެ 50 މެމްބަރުންނާއި ތުލުސްދޫ ދާއިރާގެ މެމްބަރު އިބްރާހިމް ނަސީމް, ނޮޅިވަރަމް ދާއިރާގެ މެމްބަރު މުހައްމަދު ނަޝީދު, ކާށިދޫ ދާއިރާގެ މެމްބަރު އަބްދުالله ޖާބިރު އަދި މީދޫ ދާއިރާގެ މެމްބަރު އަހްމަދު ސިޔާމް މުހައްމަދެވެ. އެމްޑީޕީގެ ޕާލިމެންޓަރީ ގްރޫޕުގައި ތިއްބަވަނީ 56 މެމްބަރުންނެވެ. އެ ޕާޓީގެ މެމްބަރުންގެ ތެރެއިން ސޮއިނުކުރާ މެމްބަރުންގެ ނަންތައް ހާމަކޮށްފައި ނުވެ އެވެ.
މަޖިލީހުގެ ރައީސް ނުވަތަ ނައިބު ރައީސްގެ މަގާމުގައި ހުންނަވާ ބޭފުޅަކު އެ މަގާމުން ވަކިކުރަން ހުށަހެޅޭނީ މަޖިލިހުގެ ޖުމުލަ މެމްބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ މެމްބަރުންގެ ސޮޔާއެކު ހުށަހަޅާ ގަރާރަކުންނެވެ. އެއީ މިހާރު ތިއްބެވި 87 މެންބަރުންގެ ތެރެއިން 22 މެމްބަރުންގެ ސޮޔެވެ.
ގާނޫނުއަސާސީގައިވާ ގޮތުން ނަމަ ރައްޔިތުންގެ މަޖިލީހުގެ ރައީސް ނުވަތަ ނައިބު ރައީސްގެ އިތުބާރު ނެތް ކަމަށް އެ ދުވަހުގެ ޖަލްސާއަށް ހާޒިރުވާ މެމްބަރުންގެ ދެބައިކުޅަ އެއްބައި މެންބަރުންގެ ވޯޓުން ފާސްވާނެ އެވެ.
މުހިންމު ބައެއް ހަބަރު
ދުވަހުގެ ކޯޓޭޝަން
އިތުބާރު ނެތް ކަމުގެ މައްސަލައާ ގުޅޭ ގޮތުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ،
އިއްޒަތްތެރި މެމްބަރުންނަށް އެނގިވަޑައިގަންނަވާނެ އަޅުގަނޑު ކެތްމަދުވެފައި ހަގީގަތުގައި ރިޔާސަތުގައި މި އިންނަނީ. އުއްމީދުކުރެވެނީ [މައްޗަންގޮޅި] މެދު ދާއިރާގެ ބަހުސްގައި ބައިވެރިވެވޭނެ ކަމަށް,"
ދުވަހުގެ ފޮޓޯ
ހޭންޑުބޯލް މުބާރާތުގައި ޒެފްރޯލް އާއި ފުއުޗާ ސްޕޯޓްސް އެކަޑެމީ ބައްދަލުކުރި މެޗުގެ ތެރެއިން. -- ފޮޓޯ : އަބްދުﷲ އިޔާން/ އަދަދު
