މިހާރު ކުރިއަށްދާ ލިނިން މޯލްޑިވްސް އިންޓަނޭޝަނަލް ޗެލެންޖް ބެޑްމިންޓަން މުބާރާތުގެ ގަދަ 16 ބުރުން ރާއްޖޭގެ އެއް ވަނަ އަންހެން ޑަބަލްސް އާއި މިކްސް ޑަބަލްސް ޕެއާ އަށް މުބާރާތް ނިމިއްޖެ އެވެ.
މި ފަަހަރުގެ އިންޓަނޭޝަނަލް ޗެލެންޖްގައި ރާއްޖޭން އެންމެ ދުރަށް ދަތުރުކުރީ ވެސް މި ދެ އިވެންޓްގަ އެވެ.
އެ ގޮތުން، ރާއްޖޭގެ އެއް ވަނަ އަންހެން ޑަބަލްސް ޕެއާ، ފާތިމަތު ނަބާހާ އާއި އައިމިނަތު ނަބީހާ އަދި ރާއްޖޭގެ އެއް ވަނަ މިކްސް ޑަބަލްސް ޕެއާ، ނަބާހާ އާއި ޒަޔާން ޒަކީ ވަނީ މިއަދު ގަދަ 16 ބުރުގެ މެޗުތައް ކުޅެފަ އެވެ.
މި ފަހަރުގެ އިންޓަނޭޝަނަލް ޗެލެންޖްގެ މެޗެއްގެ ތެރެއިން ރާއްޖޭގެ ޒަޔާން ބޯޅަ ފޮނުވާލަނީ.--- ފޮޓޯ: މުހައްމަދު ޝާބިން/ އަދަދު
ކުޅިވަރު އެކުވެނި އިންޑޯ ބެޑްމިންޓަން ކޯޓުގައި މިއަދު ކުޅުނު ގަދަ 16 ބުރުގެ މެޗުގައި ޒަޔާން އާއި ނަބާހާގެ ޕެއާ ވާދަކުރީ އިންޑިއާގެ އިންޑިއާގެ ދީޕް ރަމްބިއާ އާއި އަނާގާ އަރަވިންދާ ޕެއާއާ އެވެ. އެ މެޗުން، ދީޕް އާއި އަނާގާގެ ޕެއާ ސެޓުތައް ގެންދިޔައީ 21-15، 21-19 އިންނެވެ.
އަންހެން ޑަބަލްސްގެ ގަދަ 16 ބުރުގެ މެޗުގައި ނަބާހާ އާއި ނަބީހާގެ ޕެއާ ވަނީ އަނާގާ އާއި ރިދީ ކޯރްގެ ޕެއާ އަތުން 21-18، 21-08 އިންނެވެ. އަދި އަންހެން ޑަބަލްސްގައި ރާއްޖޭގެ ޝުބާ މުހައްމަދު ޝަރީފް އާއި އައިޝަތު ޒޯޔާ ހުސެއިންގެ ޕެއާ ވަނީ 21-09، 21-10 އިން އިންޑިއާގެ ނިކީ ރަޕްރިއާ އާއި ނިޝޫ ރަޕްރިއާގެ ޕެއާ އަތުން ބަލިވެފަ އެވެ.
އަންހެން ސިންގަލްސް މެޗެއްގެ ތެރެއިން ނަބީހާ ބޯޅަ ފޮނުވާލަނީ.--- ފޮޓޯ: އަބްދުﷲ އިޔާން/ އަދަދު
އަންހެން ސިންގަލްސްގެ ގަދަ 32 ކުޅުންތެރިންގެ ބުރުގައި ނަބީހާ ވަނީ ހަތް ވަނަ އަށް ސީޑުކޮށްފައިވާ މިޔަންމާގެ ތޭ ހޫތާ ހިޒާރްއާ ވާދަކޮށް، 21-05، 21-08 އިން ބަލިވެފަ އެވެ. މި ބުރުގައި އިންޑޮނީޝިއާގެ ޔޫލިއާ ޔޯސެފީން ސުސާންޓޯ އަތުން ރާއްޖޭގެ ޝުބާ މުހައްމަދު ޝަރީފް ބަލިވީ 21-05، 21-08 އިންނެވެ.
މި ފަހަރުގެ ލިނިން އިންޓަނޭޝަނަލް ބެޑްމިންޓަން ޗެލެންޖްގައި މި އަހަރު 33 ގައުމަކުން 300 އަށް ވުރެ ގިނަ ކުޅުންތެރިން ވާދަކުރާނެ އެވެ. އޭގެ ތެރޭގައި ރާއްޖޭގެ 30 އަށް ވުރެ ގިނަ ކުޅުންތެރިން ހިމެނެ އެވެ.
ރާއްޖޭގައި އެންމެ ފުރަތަމަ އިންޓަނޭޝަނަލް ޗެލެންްޖް މުބާރާތެއް ބޭއްވީ 2011 ވަނަ އަހަރު އެވެ. އޭގެ ފަހުން، 2012 އާއި 2013 ވަނަ އަހަރު ވެސް ބޭއްވުމަށް ފަހު، 2014 ވަނަ އަހަރު ކުޅިވަރު އެކުވެނި އިމާރާތަށް ލިބުނު ގެއްލުމަކާ ހެދި އިންޓަނޭޝަނަލް ޗެލެންޖް މުބާރާތް ހުއްޓުނެވެ. ހަ ވަރަކަށް އަހަރުގެ މެދުކެނޑުމަކަށް ފަހު އިންޓަނޭޝަނަލް ޗެލެންޖާއި ބެޑްމިންޓަން ފިއުޗާ ސީރީސްގެ ނަމުގައި މުބާރާތްތަކެއް 2019 ވަނަ އަހަރު ބޭއްވި އެވެ. އެކަަމަކު، އޭގެ ފަހުން ކޮވިޑް-19އާ ހެދި ދެ އަހަރު މުބާރާތް ނުބޭއްވުނެވެ. އަލުން މޯލްޑިވްސް އިންޓަނޭޝަނަލް ޗެލެންޖް ފެށީ މިދިޔަ އަހަރު އެވެ.
