ރައްޔިތުންގެ މަޖިލީހުގެ ރައީސް ކަމުން އެމްޑީޕީގެ ރައީސް މުހައްމަދު ނަޝީދު ވަކިކުރަން އެޕާޓީގެ ޕާލަމެންޓްރީ ގްރޫޕުން ދާދި ދެންމެއަކު ފާސްކޮށްފި އެވެ.
"އަދަދު" ނޫހަށް އެނގިފައިވާ ގޮތުގައި އެމްޑީޕީގެ ޕީޖީ ގްރޫޕުން ދާދި ދެންމެއަކު ބޭއްވި ބައްދަލުވުމުގައި ބައިވެރިވީ 42 މެމްބަރުންނެވެ. އަދި, އެ މައްސަލަ ފާސްކޮށްފައި ވަނީ 36 މެމްބަރުންގެ ވޯޓާއެކު އެވެ.
"ރައީސް ނަޝީދުގެ އިތުބާރު ނެތް ކަމުގެ މައްސަލަ ހުށަހަޅަން ނިންމީ ތަކުރާރުކޮށް މަޖިލިސް ގަވާއިދާ ހިލާފަށް ކުރިއަށް ގެންދާތީ," އެކަމާ ގުޅޭގޮތުން "އަދަދު" ނޫހާ މައުލޫމާތު ހިއްސާކުރި މަޖިލިސް މެމްބަރަކު ވިދާޅުވި އެވެ.
އަދި, މި މައްސަލަ ހުށަހެޅުމުގެ ގޮތުން މެމްބަރުންގެ ސޮއި ހޯދުމުގެ މަސައްކަތް ވެސް އެމްޑީޕީން ވަނީ ފަށާފަ އެވެ.
ނަޝީދުގެ އިތުބާރު ނެތް ކަމަށް ހުށަހަޅާ މައްސަލާގައި ސޮއިކުރަމުންދާ ލިސްޓު --- ފޮޓޯ: މުހައްމަދު ޝާބިން/އަދަދު
މަޖިލީހުގެ ރައީސް ނުވަތަ ނައިބު ރައީސްގެ މަގާމުގައި ހުންނަވާ ބޭފުޅަކު އެ މަގާމުން ވަކިކުރަން ހުށަހެޅޭނީ މަޖިލިހުގެ ޖުމުލަ މެމްބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ މެމްބަރުންގެ ސޮޔާއެކު ހުށަހަޅާ ގަރާރަކުންނެވެ. އެއީ މިހާރު ތިއްބެވި 87 މެންބަރުންގެ ތެރެއިން 22 މެމްބަރުންގެ ސޮޔެވެ.
ގާނޫނުއަސާސީގައިވާ ގޮތުން ނަމަ ރައްޔިތުންގެ މަޖިލީހުގެ ރައީސް ނުވަތަ ނައިބު ރައީސްގެ އިތުބާރު ނެތް ކަމަށް އެ ދުވަހުގެ ޖަލްސާއަށް ހާޒިރުވާ މެމްބަރުންގެ ދެބައިކުޅަ އެއްބައި މެންބަރުންގެ ވޯޓުން ފާސްވާނެ އެވެ.
ރާއްޖޭގެ ދެކުނުން އީއީޒެޑް ބައިނަލްއަގްވާމީ ކޯޓުން ކަނޑައެޅިއިރު، ދައުލަތަށް ގެއްލުންވާ ގޮތަށް އެ މައްސަލައިގައި ވަކާލާތުކޮށްފައިވާ ކަމަށް ބުނެ ހުށަހެޅި އޭޖީގެ އިތުބާރު ނެތްކަމުގެ މައްސަލަ ކުރިއަށް ނުގެންދިޔުމަށް ނަޝީދު ނިންމެވުމުން މިއަދުގެ ޖަލްސާގައި އެމްޑީޕީގެ މެމްބަރުން އިހުތިޖާޖު ވެސް ކުރި އެވެ.
މި މައްސަލާގައި އޭޖީ އެންމެ ފުރަތަމަ ޖަވާބުދާރީވެވަޑައިގެންނެވީ ލިޔުމުންނެވެ. އެހެން އޮއްވައި، ރިފްއަތު އިއްޔެ ހާޒިރުވެ ދިފާއުވެވަޑައިގަތުމަށް މަސައްކަތް ކުރެއްވުމުން މެމްބަރުން ވަނީ އިންތިހާއަށް ނިޒާމީ ނުކުތާ ނަގައި ވާހަކަ މެދުކަނޑާލައިފަ އެވެ. ރިޔާސަތުން މަޖިލީހުގެ ރައީސް މުހައްމަދު ނަޝީދު ވަރަށް ގިނަ ނިޒާމީ ނުކުތާއަށް ފުރުސަތު ދެއްވި އެވެ.
އެހެން އެކަން އޮއްވައި މިއަދުގެ ޖަލްސާ ފެށުމާއެކު ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފު ވަނީ ރިފްއަތުގެ އިމްތިޔާޒުގެ މައްސަލައެއް ހުށަހަޅުއްވައިފަ އެވެ. އިމްތިޔާޒުގެ މައްސަލައަށް ބަހުސް ކުރަން ފާސްނުވި ނަމަވެސް އެ މައްސަލައިގައި ގޮތެއް ނުނިންމާ އިތުބާރު ނެތްކަމުގެ މައްސަލަ ކުރިއަށް ނުގެންދެވޭނެ ކަމަށް އިދިކޮޅުން ވަކާލާތު ކުރި އެވެ. ރިޔާސަތުން ނިންމެވީ އިތުބާރުގެ ނެތްކަމުގެ މައްސަލަ ބާއްވާފައި އެޖެންޑާގައި ދެން އޮތް މައްސަލައަށް ދިޔުމަށެވެ.
އޭގެ އިތުރުން ވެސް, މަޖިލީހަށް އިދކޮޅުން ހުށަހަޅާ ގަރާރުތަކާއި ކުއްލި މައްސަލަތައް އެޖެންޑާގެ ކުރިއަށް ޖައްސަައި ސަރުކާރުން ހުށަހަޅާ ބިލުތައް ލަސްކުރާ ކަމަށް ބުނެ އެމްޑީޕީގެ ނުރުހުން ނަޝީދަށް އޮތީ އަމާޒުވެފަ އެވެ.
އޭގެ އިތުރުން, އެމްޑީޕީން ވަކިވި މަޖިލިސް ނައިބު ރައީސް އީވާ އަބްދުالله ގެ އިތުބާރު ނެތް ކަމުގެ މައްސަލައެއް ވެސް އެމްޑީޕީން ވަނީ ވައްދާފަ އެވެ. އެ މައްސަލަ އެޖެންޑާ ކޮށްފައި ވަނީ ޖޫން 11, އަށެވެ.
