ބަންޑާރަ ނައިބު އިބްރާހިމް ރިފްއަތުގެ އިތުބާރު ނެތްކަމުގެ މައްސަލަ ތިން ދުވަސް މަތިން ވެސް ރައްޔިތުންގެ މަޖިލީހުގައި ކުރިއަށްނުގެންދިޔުމުން ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ މެމްބަރުން ރިޔާސަތުގެ މޭޒު ކައިރިއަށް ވަޑައިގެން މިއަދު އިހުތިޖާޖުކޮށްފި އެވެ.
ރާއްޖޭގެ ދެކުނުން އީއީޒެޑް ބައިނަލްއަގްވާމީ ކޯޓުން ކަނޑައެޅިއިރު، ދައުލަތަށް ގެއްލުންވާ ގޮތަށް އެ މައްސަލައިގައި ވަކާލާތުކޮށްފައިވާ ކަމަށް ބުނެ ހުށަހެޅި އޭޖީގެ އިތުބާރު ނެތްކަމުގެ މައްސަލައިގައި އޭނާ ފުރަތަމަ ލިޔުމުން ޖަވާބު ދެއްވުމުން އެ ދުވަހު ރިޔާސަތުން ނިންމީ ވޯޓަށް ނޭހުމަށެވެ.
އެހެން އޮއްވައި، ރިފްއަތު އިއްޔެ ހާޒިރުވެ ދިފާއުވެވަޑައިގަތުމަށް މަސައްކަތް ކުރެއްވުމުން މެމްބަރުން ވަނީ އިންތިހާއަށް ނިޒާމީ ނުކުތާ ނަގައި ވާހަކަ މެދުކަނޑާލައިފަ އެވެ. ރިޔާސަތުން މަޖިލީހުގެ ރައީސް މުހައްމަދު ނަޝީދު ވަރަށް ގިނަ ނިޒާމީ ނުކުތާއަށް ފުރުސަތު ދެއްވި އެވެ.
އެހެން އެކަން އޮއްވައި މިއަދުގެ ޖަލްސާ ފެށުމާއެކު ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފު ވަނީ ރިފްއަތުގެ އިމްތިޔާޒުގެ މައްސަލައެއް ހުށަހަޅުއްވައިފަ އެވެ. އިމްތިޔާޒުގެ މައްސަލައަށް ބަހުސް ކުރަން ފާސްނުވި ނަމަވެސް އެ މައްސަލައިގައި ގޮތެއް ނުނިންމާ އިތުބާރު ނެތްކަމުގެ މައްސަލަ ކުރިއަށް ނުގެންދެވޭނެ ކަމަށް އިދިކޮޅުން ވަކާލާތު ކުރި އެވެ. ރިޔާސަތުން ނިންމެވީ އިތުބާރުގެ ނެތްކަމުގެ މައްސަލަ ބާއްވާފައި އެޖެންޑާގައި ދެން އޮތް މައްސަލައަށް ދިޔުމަށެވެ.
އެޖެންޑާގައި ދެން އޮތީ ހެންވެއިރު ހުޅަނގު ދާއިރާގެ މެމްބަރު ހަސަން ލަތީފު މައްސަލައެއް ހުށަހެޅުއްވުމެވެ. ނަމަވެސް, އެމްޑީޕީ މެމްބަރުން ވަނީ އެ ފުރުސަތު ނުދީ ރިޔާސަތުގެ މޭޒު ކައިރިއަށް ގޮސް އިހުތިޖާޖުކޮށްފަ އެވެ. ގާތްގަނޑަކަށް 15 ވަރަކަށް މެމްބަރުން އެތަނަށް ވަޑައިގެން އެ ޕާޓީގެ ވެސް ރައީސް ނަޝީދަށް އަމާޒުކޮށް ފާޑުވިދާޅުވަމުން ގެންދެވި އެވެ.
"މުގާބޭ، މުގާބޭ، މުގާބޭ، މުގާބޭ،" ނަޝީދަށް އަމާޒުކޮށް އެމްޑީޕީ މެމްބަރުން ގޮވާ އަޑު ޓީވީގެ ލައިވްސްޓްރީމަށް އިވުނެވެ.
މަޖިލީހުގެ މަސައްކަތް ކުރިއަށް ނުގެންދެވި އެހެން އޮއްވައި ނަޝީދު ނިންމެވީ ސަޔަށް މަޖިލިސް މެދުކަނޑައިލުމަށެވެ. ސަޔަށްފަހު ރިޔާސަތާ ހަވާލުވެވަޑައިގަންނަވާނީ ވިލުފުށީ ދާއިރާގެ މެމްބަރު ހަސަން އަފީފު ކަމަށް ނަޝީދު ވިދާޅުވި އެވެ. ހަސަން އަފީފު ރިޔާސަތު ބެލެހެއްޓުމާ އެމްޑީޕީ މެމްބަރުން ދެކޮޅު ހަދާތީ ސަޔަށްފަހު މަޖިލިސް ކުރިއަށްގެންދެވޭނެ ކަމަށް ނުބެލެވެ އެވެ.
