މެޑްރިޑް (ޖޫން 4) - ރެއާލް މެޑްރިޑަށް ކުޅެމުންދިޔަ ބެލްޖިއަމްގެ މިޑްފީލްޑަރު އެޑެން ހަޒާޑާ އެކު ހަދާފައިވާ ކޮންޓުރެކްޓް ދެ ފަރާތް އެއްބަސްވެގެން ބާތިލްކޮށް އޭނާ ދޫކޮށްލަން ނިންމައިފި އެވެ.
ޗެލްސީން 2019 ވަނަ އަހަރު ރެއާލަށް ހަޒާޑް ،32، ބަދަލުވީ 123 މިލިއަން ޑޮލަރު ޓްރާންސްފާ ފީއެއްގަ އެވެ. ރެއާލަށް ބަދަލުވިއިރު، އާދަޔާ ހިލާފު ފޯމެއްގައި ހަޒާޑް ހުރި ނަމަވެސް، ރެއާލްގައި އޭނާ އަށް "ޖާދޫ" ދެއްކޭ ގޮތެއްނުވި އެވެ. ރެއާލްގައި އޭނާ ހޭދަކުރި ހަތަރު ސީޒަނުގައި ވެސް އަނިޔާގެ މައްސަލަތަކާ ހެދި އޭނާގެ ބޭނުންހިފަން ރެއާލަށް ދަތިވިި އެވެ.
ހަތަރު ސީޒަންގެ ތެރޭގައި ރެއާލަށް ހަޒާޑް ކުޅުނީ 54 މެޗެވެ. ރެއާލްގެ އެންމެ މުސާރަ ބޮޑު އެއް ކުޅުންތެރިޔާ ކަމަށްވާ ހަޒާޑް މި ސީޒަންގައި އޭނާ ކުޅުނީ އެންމެ ހަ މެޗެވެ.
ރެއާލާ އެކު ހަޒާޑް ހަދާފައިވާ ކޮންޓުރެކްޓްގައި ބާކީ 12 މަސް އޮތް ނަމަވެސް، ދެ ފަރާތުން އެއްބަސްވެގެން މި މަސް ނިމުން ކޮންޓުރެކްޓް ބާތިލްކުރަން ވަނީ ނިންމައިފަ އެވެ. އެހެންކަމުން، ހަޒާޑަށް ހިލޭ ޓްރާންސްފާއެއްގައި އެހެން ކްލަބަކަށް ބަދަލުވެވޭނެ އެވެ.
"ރެއާލް މެޑްރިޑް އިން ހަޒާޑާ މެދު ގާތްކޮށް ދެކެން. އެދެނީ ކުރިއަށް އޮތް ތަނުގައި ވެސް އޭނާ އަށް ކާމިޔާބު ލިބުން،" ރެއާލް އިން ނެރުނު ބަޔާނުގައި ބުނެފައިވެ އެވެ.
ހަޒާޑްގެ އިތުރުން ރެއާލްގެ މިޑްފީލްޑަރު މާކޮސް އަސެންސިއޯ އާއި ތަޖުރިބާކާރު ފޯވަޑް ކަރީމް ބެންޒެމާ ވެސް ވަނީ މި ސީޒަނަށް ފަހު އެ ކްލަބު ދޫކޮށްލާނެކަން ކަށަވަރުކޮށްދީފަ އެވެ.
މިދިޔަ އަހަރުގެ ފީފާ ވޯލްޑް ކަޕަށް ފަހު، ބެލްޖިއަމް ޓީމުން ރިޓަޔާކުރި ހަޒާޑް، މީގެ ދެތިން އަހަރު ކުރިން، ކެރިއަރުގެ އެންމެ އުހުގައި ހުރެ ރެއާލަށް ހަޒާޑް ބަދަލުވިއިރު، ގިނަ ބަޔަކު އުންމީދުކުރީ މޮޅު ކުޅުމެއް އޭނާ ދައްކާނެ ކަމަށެވެ. ނަމަވެސް އަނިޔާގެ މައްސަލަތަކާއި ހުރެ އޭނާ އަށް ޓީމުން ޖާގަ ލިބުމުގައި އުނދަގޫތަކާއި ކުރިމަތިލާން ޖެހުނެވެ.
