އެޓާނީ ޖެނެރަލް އިބްރާހީމް ރިފްއަތުގެ އިތުބާރު ނެތްކަމަށް ކަނޑައަޅަން އިދިކޮޅުން ރައްޔިތުންގެ މަޖިލީހަށް ހުށަހެޅި މައްސަލާގައި މަޖިލީހަށް ލިޔުމުން ޖަބާދެއްވުމުން އުފެދުނު ހިޔާލުތަފާތުވުން ތަކަށް ސުޕްރީމް ކޯޓުގެ ލަފައެއް ހޯއްދަވަން މަޖިލީހުގެ ރައީސް މުހައްމަދު ނަޝީދު ނިންމަވައިފި އެވެ.
އެ މައްސަލާގައި އޭޖީ މަޖިލީހަށް ޖަވާބުދާރީ ވެވަޑައިގަންނަވަން ޖެހިވަޑައިގަންނަވާ އިރު އޭނާ ޖަވާބުދެއްވީ ލިޔުމުންނެވެ. އެގޮތަށް ޖަވާބު ދެއްވިދާނެ ކަމާ މެދު މަޖިލީހުގައި ހިޔާލުތަފާތުވުން އުފެދުމުން ސިޔާސީ ޕާޓީތަކުން މަޝްވަރާކޮށްގެން ގޮތެއް ނިންމަން މަޖިލިސް މެދުކަނޑައިލި އެވެ.
ފަހުން ޖަލްސާ އަލުން ފެއްޓެވުމަށް ފަހު ރިޔާސަތުން ނަޝީދު ވިދާޅުވީ އެ މަޝްވަރާއިން ގޮތެއް ނުނިންމުނު ކަމަށެވެ. އެމަނިކުފާނު ވިދާޅުވި ގޮތުން އެކަމާ އިންކާރުކުރީ އިދިކޮޅު ޕީޕީއެމް/ޕީއެންސީ އާއި އެމްއެންޕީންނެވެ.
"މިބާވަތުގެ ކަންތަކުގައި އަޅުގަނޑު ޖެހޭނީ [އިސްތިޝާރީ ލަފައެއް] ހޯދަން. ގާނޫނު އަސާސީ އެކުލަވައިލި އިރު [މާނަކޮށްފައި] އޮތް ގޮތާއި މިބާވަތުގެ ކަންތައް އަޅުގަނޑު އެދޭ ގޮތަކީ ސުޕްރީމްކޯޓުން ނިންމުން،" ނަޝީދު ވިދާޅުވި އެވެ.
ގާނޫނު އަސާސީގައި އޮތް ގޮތް
ގާނޫނު އަސާސީގެ 101 ވަނަ މާއްދާގެ (ހ) ގައި ބުނެފައި އޮތީ އިތުބާރު ނެތް ކަމަށް ހުށަހަޅާ މައްސަލައިގެ ބަހުސްގައި އަނގަބަހުންނާއި ލިއުމުން، އޭނާގެ ދިފާއުގައި މަސައްކަތް ކުރުމުގެ ހައްގު ލިބިގެންވާ ކަމަށެވެ.
އޭޖީ ޖަވާބުދާރީ ވެވަޑައިގަންނަވަން މަޖިލީހަށް ވަޑައިގަންނަވަން ޖެހިވަޑައިގަންނަވާނެ ކަމަށް ވިދާޅުވާ މެމްބަރުން ދެކެވަޑައިގަންނަވާ ގޮތުގައި، ލިޔުމުން ޖަވާބު ދެއްވުމާއި އަނގަބަހުން ޖަވާބުދެއްވުމާ ދެމެދުން ގޮތެއް އިހުތިޔާރު ކުރުމުގެ ފުރުސަތު ގަވައިދުގެ އެ މާއްދާ އަކުން ނުލިބެ އެވެ.
މައްސަލައިގެ ފަސްފަހަތް
އޭޖީގެ އިތުބާރު ނެތް ކަމަށް މައްސަލަ ހުށަހެޅީ ޗާގޯސް އަކީ މޮރިޝަސްގެ ބައެއް ކަމަށް ބަލައިގެން ރާއްޖެއާ އެ ޖަރީޒާތަކާ ދެމެދު ކަނޑުގެ އިން ވަކިކުރި އިރު ރާއްޖޭގެ ކަނޑުގެ ސަރަހައްދުން ބައެއް ގެއްލިފައިވާ ކަމަށް ބުނެ، އެ މައްސަަލައާ ގުޅުވައިގެންނެވެ.
އެ މައްސަލަ މަޖިލީހަށް މިއަދު އެޖެންޑާ ކުރި އިރު، މަޖިލީހުގެ ރިޔާސަތުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ އެ މައްސަލާގައި އެޓާނީ ޖެނެރަލްގެ ޖަވާބު ލިޔުމުން ފޮނުއްވާފައިވާ ކަމަށެވެ. އެހެން ނަމަވެސް, މަޖިލީހަށް ޖަވާބުދާރީ ވެވަޑައިގަންނަވާނެ ކަމަށް މަޖިލީހުގެ އާއްމު ކޮމިޓީން ރިޔާސަތަށް އަންގާފައިވާ ކަމަށް ވެސް އެމަނިކުފާނު ވިދާޅުވި އެވެ.
މައްސަލަ މަޖިލީހުގެ ތަޅުމަށް ހުށަހަޅައި ނިމުމުން އޭޖީގެ ޖަވާބު އިއްވަވަން ރިޔާސަތުން ނަޝީދު އަމީން އާންމަށް އަންގަވަނިކޮށް ނިޒާމާ ބެހޭ މައްސަަލައެއް ކަމަށް ވިދާޅުވެ ފުރުސަތެއް ހޯއްދަވައިގެން ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވީ ވަޒީރު ލިޔުމުން ޖަވާބު ދެއްވާ ހާލަތުގައި އަމަލުކުރާނެ ގޮތުގެ އުސޫލެއް މަޖިލީހުގައި ނެތް ކަމަށެވެ.
"އާއްމު ކޮމިޓީން ނިންމާފައި އޮންނާނީ ބަންޑާރަނައިބު މަޖިލީހަށް ވަޑައިގެން ޖަވާބުދާރީ ވެވަޑައިގަންނަވާ އިރު އަމަލުކުރާނެ އުސޫލެއް. އެއީ ބަހުސް ފެށުމުގެ ކުރިން 10 މިނެޓްގެ ވަގުތު، އަދި ބަހުސްގެ މެދުތެރެއިން ބޭނުންފުޅު ވަގުތެއްގައި 10 މިނެޓްގެ ވަގުތެއް އަދި ބަހުސް ނިމުމުގެ ކުރިން 10 މިނެޓްގެ ވަގުތެއް. ޖުމްލަ 30 މިނެޓްގެ ވަގުތެއް، އެއީ ޖަވާބުދާރީވާން މިތަނަށް ވަަޑައިގެން އަމަލުކުރައްވާނެ އުސޫލު. އާއްމު ކޮމިޓީން ނިންމާފައެއް ނެތް އިއްޒަތްތެރި ރައީސް، ޖަވާބުދާރީވާން ލިޔުމުން ހުށަހެޅުއްވީމާ އެ ލިއުން އިއްވާނެ ގޮތުގެ އުސޫލެއް،" ހަސަން ވިދާޅުވި އެވެ.
އެ މައްސަލާގައި އާއްމު ކޮމިޓީން ގޮތެއް ނިންމައިގެން ނޫނީ ކުރިއަށް ނުގެންދެވޭނެ ކަމަށް ވެސް އޭނާ ވިދާޅުވި އެވެ.
އެއީ ނިޒާމީ މައްސަލައެއް ކަަމަށް ރިޔާސަތުން ނަޝީދު ކަނޑައެޅުއްވި އެވެ. އެމަނިކުފާނު ވިދާޅުވީ ވަޒީރަށް ޖަވާބުދާރީ ވެވަޑައިނުގެންނެވޭނެ ގޮތަކަށް މައްސަލަަ ކުރިއަށް ނުގެންދަވާނެ ކަމަށް ވެސް އެމަނިކުފާނު ވިދާޅުވި އެވެ.
