ރައްޔިތުން މަޖިލީހަށް ސަރުކާރުގެ ފަރާތުން ހުށަހަޅާފައިވާ މަސައްކަތްތެރިންގެ ހައްގުތަކާ ގުޅޭ މުހިންމު ދެ ބިލެއް މަޖިލީހުގައި އެޖެންޑާކޮށް ބަހުސްކުރުން ލަސްވާތީ މަޖިލީހުގެ ރައީސް މުހައްމަދު ނަޝީދަށް، އިކޮނޮމިކް މިނިސްޓަރު ފައްޔާޒު އިސްމާއިލް ފާޑުވިދާޅުވެއްޖެ އެވެ.
ފައްޔާޒު މިއަދު ކުރެއްވި ޓުވީޓެއްގައި ވިދާޅުވީ ސަރުކާރުން ހުށަހަޅާފައިވާ އިންޑަސްޓްރިއަލް ރިލޭޝަންސް ބިލު އަދި އޮކިއުޕޭޝަނަލް ސޭފްޓީ ބިލަކީ މަސައްކަތްތެރިންގެ ހައްގުތައް ހިމާޔަތް ކުރުމަށާއި އިގުތިސޯދުގެ ކުރިއެރުމަށް ވަރަށް މުހިންމު ބިލުތަކެއް ކަމަށެވެ.
"މި އެޖެންޑާކޮއް ބަހުސްކޮއް ފާސްކުރުން އެއީ ކޮންމެހެން ކުރަންޖެހޭ ކަމެއް. ގަރާރުތަކެކޭ އެއްފަދައިން މުހިއްމު" ނަޝީދު ޓެގް ކުރައްވާ ފައްޔާޒު ލިޔުއްވާފައިވެ އެވެ.
ފައްޔާޒު މިފަދައިން ނަޝީދަށް ފާޑުވިދާޅުވެފައި މިވަނީ ރައްޔިތުން މަޖިލީހުގެ ތެރެއިން ސަރުކާރުގެ އެކި މަސައްކަތަކަށް ނަޝީދު އިސްވެ ހުންނަވާ ޖެއްސުން ކުރައްވާ ކަމަށް ސަރުކާރުގެ އެކި ފަރާތްތަކާއި ސަރުކާރު ހިންގާ މައި ޕާޓީ އެމްޑީޕީގެ މެމްބަރުން ތުހުމަތު ކުރައްވަމުން ގެންދަވާ ވަގުތެއްގަ އެވެ.
ރައްޔިތުން މަޖިލީހުގައި ސަރުކާރުން ހުށަހަޅާ ބިލުތަކަށް އިސްކަން ނުދީ އިދިކޮޅު ފަރާތްތަކުން ހުށަހަޅާ ގަރާރުތަކަށް އިސްކަންދޭ ކަމަށް މީގެ ކުރިން ވެސް ސަރުކާރުގެ އެކި ފަރާތްތަކުން ވަނީ ނަޝީދަށް ތުހުމަތުކޮށްފަ އެވެ.
އެމްޑީޕީ ތެރޭގައި އުފެދުނު ސިޔާސީ ކޯޅުމަށްފަހު ނަޝީދު މިހާރު ވަނީ އެމަނިކުފާނު އިސްވެ ހުންނަވާ އާ ސިޔާސީ ޕާޓީއެއް ވެސް އުފައްދަވާފަ އެވެ. ނަޝީދު، އަދިވެސް އެމްޑީޕީގައި ހުންނެވި ނަމަވެސް، ޖެނުއަރީ މަހު ބޭއްވި އެމްޑީޕީގެ ރިޔާސީ އިންތިހާބަށްފަހު ޕާޓީ ތެރޭގައި އުފެއްދެވި 'ފިކުރެއްގެ ދިރުން' ފެކްޝަނުގެ ގިނަ މެމްބަރުން ދަނީ އަލަށް އުފެއްދި ދަ ޑިމޮކްރެޓްސްއާ ގުޅެމުންނެވެ. އޭގެ ތެރޭގައި މަޖިލީހުގެ ނައިބު ރައީސް އީވާ އަބްދުﷲ ހިމެނޭހެން 13 މެމްބަރަކު ވެސް ހިމެނެ އެވެ.
މަޖިލީހުގެ ރިޔާސަތުގައި އިންނަވާ ނަޝީދު ވަނީ މީގެ ކުރިންވެސް ސަރުކާރުގެ އެކި ސިޔާސަތުތަކަށް ފާޑުވިދާޅުވެ ރައީސް އިބްރާހިމް މުހައްމަދު ސޯލިހަށް އަދި ސަރުކާރުގެ އެކި ނިންމުންތަކަށް ސީދާގޮތުން އަދި ނުސީދާގޮތުން ވެސް ފާޑުވިދާޅުވެފަ އެވެ.
