ޓޯކިޔޯ، ޖަޕާން (މޭ 29) - ރަސްމީ ގެކޮޅުގައި "ސުލޫކީ މިންގަނޑާ ހިލާފުވުމުން" ޖަޕާނުގެ ބޮޑު ވަޒީރުގެ ދަރިކަލުން ސިޔާސީ ސެކެޓްރީގެ މަގާމުން ވަކިކުރަން ނިންމައިފި އެވެ.
ބޮޑު ވަޒީރު ފުމިއޯ ކިޝީޑާ ވިދާޅުވީ ދަރިކަލުން ޝޮތާރޯ ކިޝީޑާ ވަކިކުރައްވާނެ ކަމަށެވެ. އޭނާ ހުންނެވީ ކިޝީޑާގެ ސެކެޓްރީގެ މަގާމުގަ އެވެ.
މިދިޔަ ހަފުތާގައި ޖަޕާންގެ މަޖައްލާއަކުން ފަޅާ އަރުވާލި ގޮތުގައި ޝޮތާރޯ ވަނީ ރަސްމީ ގެކޮޅަށް އާއިލީ ބޭފުޅުންނަށް ދައުވަތު ދީ، ޕާޓީއެއް ބާއްވައިފަ އެވެ.
އެއީ 2022 ގައި އޮތް ޕާޓީއެއް ކަމަށާއި ޕާޓީގެ ތެރޭގައި ބައެއް މީހުން ޕްރެސް ކޮންފެރެންސް ބާއްވާ ކަމަށް ހެދި ފޮޓޯ ނެގުމާއި ރަތް ކާޕެޓް އަޅާފައިވާ ސިޑީގައި އޮށޯވެ ފޮޓޯ ނަގާފައިވާ ކަމަށް އެ މަޖައްލާއިން ބުންޏެވެ.
"އާއްމުންނަށް ނިސްބަތްވާ ތަނެއްގައި މިދިޔަ އަހަރު ޝޮތާރޯ އަމަލު ކުރެއްވީ ސިޔާސީ ސެކެޓްރީއެއްގެ ސުލޫކީ މިންގަނޑާ ހިލާފަށް. އެހެން ކަމުން، މަގާމުން ވަކިކުރަން ނިންމައިފިން،" ކިޝީޑާ ވިދާޅުވި އެވެ.
ޖޫން އެއް ވަނަ ދުވަހު އުމުރުން 32 އަހަރުގެ ޝޮތާރޯ އިސްތިއުފާ ހުށަހަޅުއްވާނެ ކަމަށް ވެސް އެމަނިކުފާނު ވިދާޅުވި އެވެ.
މީގެ ކުރިން ވެސް ޝޮތާރޯއާ ގުޅިގެން ފާޑުކިޔުން އަމާޒުވެފައިވެ އެވެ. އެގޮތުން ޔޫރަޕަށް ކުރައްވާ ދަތުރުތަކުގައި މިނިސްޓަރުންނަށް ހަދިޔާ ގަންނަން ރަސްމީ ކާރުތަކުގައި ދާތީ އިދިކޮޅުން ހިތްމަނުޖެހެ އެވެ.
