ރައްޔިތުންގެ މަޖިލީހުގެ ޖަލްސާތައް ހައްދުން ނެއްޓި ދައްކާ ވާހަކަތައް އިޖްތިމާއީ މިންގަނޑާ ހިލާފުވާ ކަމަށް ބުނެ އެ ޖަލްސާތައް ވަގުތުން ދެއްކުން ހުއްޓާލަން ޕަބްލިކް ސާވިސް މީޑިއާއިން ނިންމި ނިންމުން އެ ކުންފުނިން ބަދަލުކޮށްފި އެވެ.
ޕީއެސްއެމްގެ ތަރުޖަމާނު ޒީކް މުހައްމަދު ރިޒާ މި ނޫހާ ވާހަކަ ދައްކަމުން ބުނީ މަޖިލީހުގެ ޖަލްސާތައް ކުރިއެކޭ އެއްފަދައިން ވަގުތުން ދައްކަން އަލުން އެ ކުންފުނިން ނިންމާފައިވާ ކަމަށެވެ. ޖަލްސާތައް ވަގުތުން ނުދައްކަން ނިންމި ނިންމުން ބަދަލު ކުރި ސަބަބު ޕީއެސްއެމުން ހާމައެއް ނުކުރެ އެވެ.
"ކުރިއަށް އޮތް ތަނުގައި ޕީއެސްއެމްއިން ހަމަ ލައިވް ކަވަރޭޖް ގެނެސްދޭނެ،" ޒީކް މައުލޫމާތު ދިނެވެ.
އެ މައްސަލައިގައި ރާއްޖޭގެ ނޫހަކަށް ދިން އިންޓަވިއުއެއްގައި ޕީއެސްއެމްގެ ވެރިޔާ އަލީ ހާލިދު ވިދާޅުވީ ޖަލްސާތައް ވަގުތުން ނުދައްކަން ނިންމީ ދައްކާ ވާހަކަތައް އިޖްތިމާއީ މިންގަނޑާ ހިލާފުވާތީ ކަމަށެވެ.
"މަޖިލިސް ލައިވް ކުރާއިރު އަޅުގަނޑުމެންނަށް އޭގެ ކޮންޓްރޯލެއް ނޯންނާނެ އެ ދައްކާ ވާހަކައަކަށް. އަޅުގަނޑުމެން އެންމެން މަޝްވަރާކޮށްފައި ނިންމީ މި ވަގުތަށް ލައިވް ކުރުން ހުއްޓާލަން. މަޖިލީހުގެ ބަހުސްތައް މާ ހޫނު ވީމަ، ބޭނުންކުރާ ބަސްތަކާ މިކަހަލަ ކަންކަމަށް ބަލާފައި،" ހާލިދު ވިދާޅުވެފައިވެ އެވެ.
މަޖިލީހުގެ ޖަލްސާ ލައިވް ނުކުރާނެކަން ޕީއެސްއެމްއިން މިއަދު އިއުލާނުކުރި އިރު، މަޖިލީހުގެ ޖަލްސާތައް މިއަށްވުރެ ހޫނުކޮށް ދިޔަ ދުވަސްވަރު ވެސް މިފަދަ ނިންމުމެއް ނުނިންމަ އެވެ. މަޖިލީހުގެ ތަޅުމުގައި ކަންކަން ހޫނުވެ ޖަލްސާ ކުރިއަށް ނުގެންދެވޭ ނަމަ މަޖިލީހުގެ އިދާރާއިން ދޫކުރާ ފީޑު މެދުކަނޑާލަ އެވެ.
