ރިޔާދް، ސައުދީ އަރަބިއްޔާ (މޭ 24) - ސައުދީ އަރަބިއްޔާ އާއި ކެނެޑާއިން ޑިޕްލޮމެޓިކް ގުޅުން ކަނޑާލިތާ ފަސް އަހަރު ފަހުން އަލުން ގުޅުން ގާއިމްކުރަން ނިންމައި އިއުލާންކޮށްފި އެވެ.
ދެ ގައުމުން ގުޅުން ކަނޑާލީ ސައުދީގައި އެކްޓިވިސްޓުން ޖަލަށް ލާ ކަމަށް ބުނެ ކެނެޑާއިން ހިތްހަމަނުޖެހުން ފާޅުކުރި ފަހުންނެވެ.
މިދިޔަ ނޮވެމްބަރު މަހު ސައުދީ ވަލީ އަހުދު އަމީރު މުހައްމަދު ބިން ސަލްމާން އާއި ކެނެޑާގެ ބޮޑު ވަޒީރު ޖަސްޓިން ޓްރޫޑޯ ވަނީ އޭޝިއާ ޕެސިފިކް އިކޮނޮމިކް ކޯޕޮރޭޝަން ސަމިޓުގެ ހަވާސާގެ ތެރެއިން ބެންކޮކްގައި ބައްދަލުކުރައްވައިފަ އެވެ.
ބުދަ ދުވަހު ދެ ގައުމުގެ ފޮރިން މިނިސްޓްރީން ނެރުނު ބަޔާންތަކުގައި ބުނީ މީގެ ފަސް އަހަރު ކުރިން ގުޅުން ގާއިމްކޮށްފައި އޮތް ހިސާބުން އަލުން ގުޅުން ކުރިއަށް ގެންދާނެ ކަމަށެވެ.
ކެނެޑާއިން ސައުދީއަށް ކަނޑައެޅި އާ ސަފީރަކީ ޖޯން ފިލިޕް ލިންޓޮއު އެވެ. ކެނެޑާ ސަރުކާރުން ބުނީ އަލުން ގުޅުން ގާއިމްކުރުމާ އެކު ދެ ގައުމުގެ ވިޔަފާރީގެ ގުޅުން ބަދަހިކޮށް، ކުރިން އަޅާފައި ހުރި ފިޔަވަޅުތައް ވެސް އުވިގެން ދާނެ ކަމަށެވެ.
ދުނިޔޭގެ މައިދާނުގައި ސައުދީއަކީ މިހާރު މުހިއްމު ގައުމެއް ކަމަށް ފާހަގަކޮށް ކެނެޑާ ސަރުކާރުން ބުނީ މިދިޔަ މަހު ސޫދާނުގައި ހަނގުރާމަ ފެށުމުން ކެނެޑާގެ ރައްޔިތުން ރައްކާތެރިކަމާ އެކު އިވެކުއޭޓް ކުރުމައި ސައުދީގެ އެހީ ލިބުނު ކަމަށެވެ.
