ވޮޝިންޓަން، އެމެރިކާ (މޭ 24) - ބަންގްލަދޭޝްގެ އިންތިހާބުގެ މިނިވަން ކަމަށް ހުރަސް އަޅާ މީހުންނަށް ވިސާ ނުދޭނެ ކަމަށް ބުނެ އެމެރިކާއިން އިންޒާރު ދީފި އެވެ.
ސެކެޓްރީ އޮފް ސްޓޭޓް އެންޓޮނީ ބްލިންކެން ވިދާޅުވީ އެމެރިކާއިން ތާއީދު ކުރަނީ "މިނިވަން، ހަމަހަމަ އަދި ސުލްހަވެރި ގައުމީ އިންތިހާބަކަށް" ކަމަށާއި މިނިވަން ކަމަށް ހުރަސް އަޅާ ނަމަ ސަރުކާރު އަދި އިދިކޮޅު ފަރާތްތަކާ މެދު ވެސް ފިޔަވަޅު އަޅަން ފަސްނުޖެހޭނެ ކަމަށެވެ.
"އަޅުގަނޑު މި ސިޔާސަތު މި އިއުލާން ކުރަނީ ބަންގްލަދޭޝްގައި ޑިމޮކްރަސީ ކުރިއަރުވަން ބޭނުންވާ ހުރިހާ އެންމެންނަށް އެއްބާރުލުން ދިނުމުގެ ގޮތުން،" ބްލިންކެން ވިދާޅުވި އެވެ.
"މިނިވަން އަދި ހަމަހަމަ އިންތިހާބެއް ބޭއްވުމަކީ ހުރިހާ އެންމެންގެ ޒިންމާއެއް. ވޯޓުލާ މީހުންނާއި، ސިޔާސީ ޕާޓީތަކާއި، ސަރުކާރާއި، ސަލާމަތީ ފައުޖުތަކާއި، މަދަނީ ޖަމިއްޔާތަކާއި މީޑިއާއަށް އޮތް ޒިންމާއެއް."
ބަންގްލަދޭޝްގެ އާއްމު އިންތިހާބު ތާވަލުކޮށްފައި ވަނީ އަންނެ ޖެނުއަރީ މަހަށެވެ. އިންތިހާބުގައި މަކަރު ހަދާނެ ކަމަށް ބުނެ އިދިކޮޅުން މިހާރު ވެސް ދަނީ ޝަކުވާ ކުރަމުންނެވެ.
މީގެ ކުރީގެ އިންތިހާބުތަކުގައި ވެސް ތަކުރާރުކޮށް މައްސަލަ ޖެހިފައިވާ ކަމަށާއި މި ފަހަރު އިންތިހާބުގެ ކުރިން ބޮޑު ވަޒީރު ޝެއިހް ހަސީނާ ދުރަށް ޖެހިވަޑައިގެން ވަގުތީ ސަރުކާރެއް އައްޔަން ކުރަަން އިދިކޮޅުން ވަނީ ގޮވާލައިފަ އެވެ.
ބަަންގްލަދޭޝްގެ ވެރިކަމުގައި 2009 އިން ފެށިގެން ހުންނަވަނީ ހަސީނާ އެވެ. އެކަމަނާއަކީ ހުޅަނގުގެ ގައުމުތަކާ އެކުވެރި، ގުޅުން ރަނގަޅު ލީޑަރެކެވެ.
