ވޮޝިންޓަން، އެމެރިކާ (މޭ 22) - އެކްސިއޮމް ސްޕޭސްއިން ޗާޓަރުކޮށްގެން ޕްރައިވެޓް މިޝަނެއްގެ ދަށުން ސައުދީ އަރަބިއްޔާ ދެ މީހުން ސްޕޭސް އެކްސްގެ ކެޕްސޫލެއްގައި ޖައްވަށް ދަތުރުކޮށް ބައިނަލްއަގްވާމީ ޖައްވީ އިދާރާ (އައިއެސްއެސް) އަށް ފައިބައިފި އެވެ.
އެ މިޝަންގައި ހިމެނޭ ސައިންޓިސްޓް ރައްޔަނާ ބަރްނާވީއަކީ ޖައްވަށް ދަތުރު ކުރި ސައުދީ އަރަބިއްޔާގެ ފުރަތަމަ އަންހެން މީހާ އެވެ. އޭނާއާ އެކު ހިމެނެނީ އަސްކަރީ ޕައިލެޓެއްގެ ގޮތުގައި ތަމްރީންވެފައިވާ އަލީ އަލް ގަރްނީ އެވެ. އެއީ އައިއެސްއެސްއަށް ފޭބި ސައުދީގެ ފުރަތަމަ މީހުންނެވެ.
ދެން އެ މިޝަންގައި ހިމެނެނީ މީގެ ކުރިން ތިން ފަހަރު އައިއެސްއެސްއަށް ގޮސްފައިވާ ނާސާގެ އެސްޓްރޮނޯޓް ޕެގީ ވިޓްސަން އާއި އެމެރިކާގެ ވިޔަފާރިވެރިޔާ ޖޯން ޝޮފްނާ އެވެ. ވިޓްސަންއަކީ އެ މިޝަންގެ ކޮމާންޑަރެވެ.
އެ ހަތަރު މީހުން އައިއެސްއެސްއަށް ދަތުރު ކުރި އިރު، އެ ތަނުގައި ހަތް އެސްޓްރޮނޯޓުން އުޅެމުން އެބަަދެ އެވެ. އެއީ ރަޝިއާގެ ތިން މީހުންނާއި، އެމެރިކާގެ ތިން މީހުންނާއި ޔޫއޭއީގެ މީހެކެވެ.
އާދީއްތަ ދުވަހު ސްޕޭސް އެކްސްގެ ރޮކެޓް ނައްޓާލީ ފްލޮރިޑާއިންނެވެ. ދުނިޔޭގެ މަތިން 250 މޭލު ދުރުގައި ދައުރުވާ އައިއެސްއެސްއަށް ދާން ނެގީ ގާތްގަނޑަކަށް 16 ގަޑިއިރެވެ.
އޭއެކްސް-2 ގެ ނަން ދީފައިވާ މި މިޝަނަކީ އައިއެސްއެސްއަށް ދަތުރު ކުރާ ދެ ވަނަ ޕްރައިވެޓް މިޝަނެވެ. މިދިޔަ އަހަރުގެ އެޕްރީލް މަހު ވެސް ޕްރައިވެޓް މިޝަނެއްގައި ބަޔަކު އައިއެސްއެސްއަށް ދިޔަ އެވެ.
އޭއެކްސް-2 ގެ މެމްބަރުން އައިއެސްއެސްގައި 10 ވަރަކަށް ދުވަސް ހޭދަކުރާނެ އެވެ. އަދި އެ މުއްދަަތުގައި 20 ތަހުލީލު ކުރުމަށް ރާވާފައިވެ އެވެ.
