މި އަހަރަށް ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ދެ މިލިއަން ރުފިޔާގެ އަރަނި ބަޖެޓެއް ފާސްކޮށްފި އެވެ.
އެފްއޭއެމުން އެ އިދާރާގެ އަހަރީ ބަޖެޓު ފާސްކުރީ އިއްޔެ ބޭއްވި އަހަރީ އާންމު ޖަލްސާގަ އެވެ. މި ޖަލްސާގައި ބައިވެރިވީ ޖުމްލަ 13 ކުލަބަކުންނެވެ.
ކުލަބުތަކުގެ ވޯޓާ އެކު ފާސްކުރި ބަޖެޓުގައި މި އަހަރު އެފްއޭއެމްގެ ހަރަދުގެ ގޮތުގައި ލަފާކޮށްފައިވަނީ 83 މިލިއަން ރުފިޔާ އެވެ. ލިބޭނެކަމަށް ލަފާކޮށްފައިވަނީ 85 މިލިއަން ރުފިޔާ އެވެ.
އިއްޔެ ބޭއްވި އެފްއޭއެމްގެ ކޮންގްރެސްގެ ތެރެއިން.--- ފޮޓޯ: އަބްދުﷲ އިޔާން/ އަދަދު
އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ ބަޖެޓުގެ ބޮޑު ބަޔެއް ހަރަދުވާނެކަމަށް ލަފާކުރެވެނީ "ޓުވާޑްސް ފިއުޗާގެ" ދަށުން ޒުވާން ކުޅުންތެރިން ތަމްރީނު ކުރުމަށާއި، އެކެޑަމީތަކަށެވެ.
އެފްއޭއެމުން މިދިޔަ އަހަރު ފާސްކުރީ 8.6 މިލިއަން ރުފިޔާގެ ދަރަނި ބަޖެޓެކެވެ. މިދިޔަ އަހަރު ވެސް ލިބޭނެކަމަށް ލަފާކުރީ 80 މިލިއަން ރުފިޔާ އެވެ. ހަރަދުގެ ގޮތުގައި 88 މިލިއަން ރުފިޔާ މިދިޔަ އަހަރު އަންޒާދާކުރި އެވެ.
މިދިޔަ އަހަރުގެ ކޮންގްރެސްގައި އެފްއޭއެމްގެ ރައީސް ވަނީ އަހަރު ނިމޭއިރު އެފްއޭއެމްގެ ދަރަނިތައް ހަލާސްކުރަން މަސައްކަތް ކުރާނެ ކަމަށް ބުނެފަ އެވެ. ނަމަވެސް އަހަރު ނިމި ޖެހިގެން އައި އަހަރާ ކުރިމަތިލިއިރު ވެސް އެފްއޭއެމްގެ ދަރަނިތައް އޮތީ ބޮޑުވެފަ އެވެ.
އެފްއޭއެމުން މިދިޔަ އަހަރު ގިނަ ފައިސާތަކެއް ކުރީގެ ކޯޗުންނަށް ދޭން ޖެހުނެވެ. ކޯޗުން ވަކިކުރުމުގައި ގޯސްކަންތައްތަކެއް ހުރިކަން ފާހަގަކޮށް ފީފާ އިން ކޮށްފައިވާ ހުކުމްތަކަށް ގިނަ ކޯޗުންތަކަކަށް އެފްއޭއެމުން ބޮޑެތި އަދަދުތަކުން ހޭދަކުރަން ޖެހުނެވެ.
އެފްއޭއެމް ކޮންގްރެސްގެ ތެރެއިން ރައީސް ބައްސާމް ވާހަކަ ދައްކަވަނީ.--- ފޮޓޯ: އަބްދުﷲ އިޔާން/ އަދަދު
ރާއްޖޭގައި ހިންގަމުން އަންނަ 21 ގައުމީ ކުޅިވަރު އެސޯސިއޭޝަނުގެ ތެރެއިން އެންމެ ދަރަނި ބޮޑު އެސޯސިއޭޝަންގެ ގޮތުގައި ފާހަގަކުރެވެނީ އެފްއޭއެމް އެވެ.
ކޮންގްރެސްގައި ވާހަކަދައްކަވަމުން އެފްއޭއެމްގެ ރައީސް ބައްސާމް ވިދާޅުވީ ސްޕޮންސަރުންގެ އަތުން ލިބޭނެކަމަށް ލަފާކުރާ ފައިސާ މިދިޔަ ދެ އަަހަރަށް ބަލާއިރު ހޯދުމުގައި އުނދަގޫތަކެއް ހުރިކަމަށެވެ. ސަބަބަކީ ކޮވިޑަށްފަހު ކުންފުނިތަކުން ބޮޑެތި ހޭދަތައް ކުރުން މަދުކުރުމެވެ. ނަމަވެސް ސަރުކާރާ ގުޅިގެން ފުޓްބޯޅަ ކުރިއެރުވުމަށް ބޭނުންވާ ފައިސާ ހޯދުމުގައި ގޮތްތަކެއް ހޯދުމަށް މަސައްކަތް ކުރައްވަމުން އަންނަ ކަމަށް ވިދާޅުވި އެވެ.
"މިފަހަރުގެ ދިވެހި ޕްރިމިއާ ލީގު އެމްޑަބްލިއުއެސްސީ އިން ސްޕޮންސަ ކުރުމަކީ ސަރުކާރާ އެކު ކުރެވުނު މަޝްވަރާތަކަށް ފަހު އެޅުނު ރަނގަޅު ފިޔަވަޅެއް. ހެޔޮ ފާލެއްގެ ގޮތުގައި އަޅުގަނޑު މިކަން ދެކެނީ. ސަރުކާރު ކުންފުނިތަކުން އެހީތެރިކަން އަންނަނީ ލިބެމުން" ބައްސާމް ވިދާޅުވި އެވެ.
އަހަރީ ކޮންގްރެސްގައި އެފްއޭއެމްގެ ދަރަނިތައް ހުރިކަން އެފްއޭއެމްގެ ރައީސް ބައްސާމް ފާހަގަކުރެއްވި އެވެ. އެކަމުގެ މާ ބޮޑު ތަފްސީލެއް ނުދެއްވި ނަމަވެސް ބައްސާމް ވިދާޅުވީ މިދިޔަ އަހަރު ލަފާކުރި އަދަދަށް ވުރެ އެފްއޭއެމްގެ ދަރަނި ދެ މިލިއަން ރުފިޔާ މަދުވާނެ ކަމަށެވެ.
