ލަންޑަން (މެއި 20) - އަނިޔާގެ މައްސަލަތަކާއި، ފޯމް ދަށްވުމުގެ ސަބަބުން އުނދަގޫ އަހަރުތަކެއް ހޭދަކޮށްފައިވާ މެންޗެސްޓާ ޔުނައިޓެޑްގެ ޑިފެންޑަރު ފިލް ޖޯންސް މި ސީޒަނަށް ފަހު އެ ކްލަބާ ދުރަށް ވަކިވާނެ އެވެ.
ޔުނައިޓެޑާ އެކު ޖޯންސް ހަދާފައިވާ ކޮންޓުރެކްޓް މި ސީޒަންގެ ނިޔަލަށް ހަމަވާއިރު، ކޮންޓުރެކްޓް އާނުކުރާނެ ކަމަށް ކްލަބުން ވެސް ވަނީ ކަށަވަރުކޮށްދީފަ އެވެ.
ބްލެކްބާން ދޫކޮށް ޖޯންސް ،31، ޔުނައިޓަޑާ ގުޅުނީ 2011 ވަނަ އަހަރެވެ. އޭރު އޭނާ އަކީ އިންގްލެންޑްގައި ހުރި އެންމެ އުންމީދީ އެއް ޑިފެންޑަރެވެ.
ޔުނައިޓަޑަށް ޖޯންސް 229 މެޗު ކުޅެ، ހަ ލަނޑު ޖަހާފައިވާއިރު، އިންގްލެންޑްގެ ގައުމީ ޓީމަށް ވެސް 27 މެޗު ކުޅުނެވެ.
ޖޯންސް ޔުނައިޓެޑަށް އެންމެ ފަހުން ކުޅުނު މެޗަކީ މިދިޔަ ސީޒަންގަ އެވެ. މި ސީޒަންގެ ވެސް ބޮޑު ބައި އޭނާ ކުޅުމާ ދުރުގައި ހޭދަކުރީ އަނިޔާގެ މައްސަލަތަކާ ގުޅިގެންނެެވެ.
"އަހަންނަށް ކުރެވެން އޮތް ހުރިހާ މަސައްކަތެއް ކުރިން،" ޔުނައިޓަޑްގެ ސަޕޯޓަރުންނަށް ފޮނުވި ސިޓީއެއްގައި ޖޯންސް ބުންޏެވެ. "އަހަރެން ހިތަށް އަރާ މިއަށްވުރެ ގިނަ މެޗު ކުޅެވުނުނަމައޭ. އެކަމަކު އަހަރެން މި ކްލަބަށްޓަކައި ކުރެވެން އޮތް ހުރިހާ މަސައްކަތެއް ކުރިން."
ޖޯންސް ބުނީ އަނިޔާގެ ސަބަބުން ކުޅުމާ ދުރުގައި ހުންނަންޖެހުމުގެ ސަބަބުން، ޓީމުގެ އެހެން ކުޅުންތެރިންނާ ވާހަކަދައްކަން ވެސް "ލަދުގަތް" ދުވަސްތަކެއް ދިޔަ ކަމަށެވެ.
"އަހަރެން ހިތަށް އަރަނީ ޓީމަށް އަހަރެންގެ ފަރާތުން އެއްވެސް އެހީތެރިކަމެއް ނުލިބޭ. އެހެންވެ، ނުތަނަވަސްކަން އިހުސާސްކުރެވުނު،" ޖޯންސް ބުންޏެވެ.
ޔުނައިޓެޑްގައި ޖޯންސް ހޭދަކުރި 12 އަހަރުގެ ތެރޭގައި އޭނާ ވަނީ އެ ކްލަބާ އެކު ޕްރިމިއާ ލީގުގެ ޗެމްޕިއަންކަން ހޯދައިފަ އެވެ. މީގެ އިތުރުން އެފްއޭ ކަޕާއި ޔޫރޮޕާ ލީގު އަދި ކޮމިއުނިޓީ ޝީލްޑް ވެސް ކާމިޔާބުކުރިއެވެ.
