ޖިއްދާ، ސައުދީ އަަރަބިއްޔާ (މޭ 18) - ހުކުރު ދުވަހު ސައުދީ އަރަބިއްޔާގައި އޮންނަ އަރަބި ލީގުގެ ލީޑަރުންގެ ބައްދަލުވުމުގައި ބައިވެރިވުމަށް ސީރިއާގެ ރައީސް ބައްޝާރުލް އަސަދް ޖިއްދާއަށް ވަޑައިގެންފި އެވެ.
މިއީ މީގެ 12 އަހަރު ކުރިން ސީރިއާގެ ދާހިލީ ހަނގުރާމަ ފެށި ފަހުން އަސަދް ސައުދީއަށް ކުރައްވާ ފުރަތަމަ ދަތުރެވެ. މި ދަތުރު ކުރައްވަނީ ސައުދީ ރަސްގެފާނު ސަލްމާން ބިން އަބްދުލް އަޒީޒްގެ ދައުވަތަކަށެވެ.
ދިގު މުއްދަތަކަށް ފަހު ގިނަ އަރަބި ގައުމުތަކާއި ސީރިއާގެ ގުޅުން ރަނގަޅު ވާން ފެށި ނަމަވެސް، ބައެއް ގައުމުތަކުން އަދިވެސް އަސަދްގެ ސަރުކާރާ ގުޅުން ގާއިމްކުރަން ބޭނުމެއް ނުވެ އެވެ. އޭގެ ތެރޭގައި ގަތަރު ހިމެނެ އެވެ.
ބުރާސްފަތި ދުވަހު އަސަދް ކިންގް އަބްދުލްއަޒީޒް އިންޓަނޭޝަނަލް އެއާޕޯޓަށް ވަޑައިގެންނެވުމުން މަރުހަބާ ދެންނެވީ މައްކާ ސަރަހައްދުގެ ޑެޕިއުޓީ ގަވަރުނަރު އަމީރު ބަދްރް ބިން ސުލްތާން އެވެ.
ސީރިއާގެ ބައެއް ނޫސްތަކުން ބުނީ ބުރާސްފަތި ދުވަހުގެ ރެ އާއި ހުކުރު ދުވަހުގެ ހެނދުނު އަސަދް ގިނަ ގައުމުތަކުގެ ވެރިންނާ ބައްދަލުކުރައްވާނެ ކަމަށެވެ.
އޭގެ ފަހުން ދެން އޮންނާނީ އަރަބި ލީގު ސަމިޓުގެ ބައްދަލުވުމެވެ. އަސަދް އެންމެ ފަހުން އަރަބި ލީގު ސަމިޓެއްގައި ބައިވެރިވެވަޑައިގެންނެވީ 2010 ވަނަ އަހަރު ލީބިޔާގަ އެވެ.
