ރާއްޖޭގައި އެންމެ ފުރަތަމަ އުފެއްދި އަދި އެންމެ ބޮޑު ސިޔާސީ ޕާޓީ، އެމްޑީޕީގެ އެތެރޭގައި އުފެދިފައި އޮތް ސިޔާސީ ވާދައިގައި، އެ ޕާޓީގެ ރައީސް މުހައްމަދު ނަޝީދަށް ލިބިވަޑައިގަންނަވަމުން ދިޔަ ނާކާމިޔާބީތަކަށް ފަހު އުފެެއްދި، "ފިކުރެއްގެ ދިރުން" ހަރަކާތް, އެންމެ ފަހުން ސިޔާސީ ޕާޓީއަކަށް ބަދަލުކޮށް، ރިޔާސީ އިންތިހާބުގައި ކެންޑިޑޭޓަކު ނެރޭނެ ކަމަށް އިއްޔެ އިއުލާނު ކުރި އެވެ.
މެދުހެންވޭރު ދާއިރާގެ މެންބަރު އަލީ އާޒިމު އެމްޑީޕީގެ އަސާސީ ގަވާއިދާ ހިލާފުވެ، އިދިކޮޅު ފަރާތްތަކާއެކު ސިޔާސީ ހަރަކާތްތަކުގައި ބައިވެރިވުމާ ގުޅިގެން އޭނާ ޕާޓީން ވަކިކޮށްފައި ވަނިކޮށް، ފިކުރެއްގެ ދިރުން ޕާޓީ އުފެއްދުމުގެ ބޭނުމުގައި ނަޝީދަށް ތާއިދު ކުރައްވާ ރައްޔިތުންގެ މަޖިލީހުގެ 12 މެންބަރަކު އިއްޔެ އެމްޑީޕީން ވަކިވި އެވެ. އެ އަށް ފަހު ޕާޓީ އުފައްދާކަން އިއުލާނު ކުރެއްވީ އިއްޔެ ހަވީރު ބޭއްވި ނޫސްވެރިންގެ ބައްދަލުވުމުގަ އެވެ.
އެމްޑީޕީގެ ރިޔާސީ ޕްރައިމަރީން ލިބިވަޑައިގެންނެވި ނާކާމިޔާބަށް ފަހު ސަޕޯޓަރުންނާއެކު ބޭއްވި ބައްދަލުވުމުގައި ނަޝީދު ވިދާޅުވީ ފިކުރެއްގެ ދިރުމުގެ ގޮފިތައް އުފައްދައި، އެ ގޮފިތަކުން ތާއިދުކުރާނެ ކެންޑިޑޭޓެއް ކަނޑައަޅާނީ ކަމަށެވެ. އެއަށް ފަހު މެންބަރުންގެ ސޮއި ހޯދުމުގެ މަސައްކަތް ވަރަށް ބާރަށް ގެންދިޔަ ނަމަވެސް، ގޮފި އުފެއްދުމުގެ މަސައްކަތް ކުރެއްވުމުގެ ބަދަލުގައި އިއްޔެ ފެށީ ޕާޓީ އުފެއްދުމުގެ މަސައްކަތެވެ. އިއްޔެ އަކީ ނަޝީދުގެ 56 ވަނަ އުފަން ދުވަހެވެ.
ދެން ފެނިގެން ދިޔައީ ޖުމްހޫރީ ޕާޓީގެ ލީޑަރު ގާސިމް އިބްރާހީމް ކުރިއަށް ނެރުއްވައިގެން ރިޔާސީ އިންތިހާބުގައި ރައީސް ސޯލިހު ބަލިކުރެއްވުމުގެ މަސައްކަތް ފެއްޓެވި ތަނެވެ. ގާސިމަށް ވެސް ނަޝީދު ހުށަހެޅުއްވީ ބަރުލަމާނީ ނިޒާމެއް ގެނައުމަށް ތާއިދު ކުރެއްވުމަށެވެ. ނަމަވެސް ގާސިމަކީ ބަރުލަމާނީ ނިޒާމަށް ތާއިދު ކުރައްވާ ބޭފުޅެއް ނޫނެވެ.
ނަޝީދުގެ ކުރީގެ މިތުރު، ރައީސް އިބްރާހިމް މުހައްމަދު ސޯލިހު އަށް ރިޔާސީ އިންތިހާބު ކާމިޔާބު ނުކުރެއްވޭނެ ކަމާއި، އެމްޑީޕީ ބައިބައިކޮށް ނަޝީދު ބާކީ ކުރި ކަމަށް ފިކުރެއްގެ ދިރުމުން ބުނެ އެވެ. ނަޝީދު ބޭނުންފުޅުވީ، ރައީސް ސޯލިހު ބަރުލަމާނީ ނިޒާމަކަށް އެއްބަސްވެވަޑައިގަތުމަށެވެ. އަދި ވެރިކަން ހިންގުމުގެ ބާރުގެ ތެރޭގައި ހުންނެވުމަށް ބޭނުންފުޅުވާ ކަމަށް މީގެ ކުރިން އެތައް ފަހަރަކު ވިދާޅުވެފައިވެ އެވެ.
ނަޝީދުގެ ފިކުރެއްގެ ދިރުން ޕާޓީ އުފެއްދުމުގެ މަސައްކަތް ފެށި ނަމަވެސް، ނަޝީދު އަދި ހުންނެވީ އެމްޑީޕީގަ އެވެ. އެ މަނިކުފާނު ޕާޓީގައި ހުންނެވި ސަބަބެއް އަދި ވިދާޅެއް ނުވެ އެވެ. ނަމަވެސް ފިކުރެއްގެ ދިރުން ޕާޓީ އުފެއްދުމަށް، މަޖިލީހުގެ 12 މެންބަރުން އެމްޑީޕީން ވަކިވުމުގެ ސިޓީގައި ސޮއި ކުރެއްވީ ނަޝީދުގެ ހާޒިރުގަ އެވެ. އެހެންވެ، ވަކި ހިސާބަކުން ނަޝީދު އެމްޑީޕީން ވަކިވާނެ ކަމަށް ބެލެވެ އެވެ.
ފިކުރެއްގެ ދިރުން ހިންގާނީ ޑިމޮކްރެޓިކް އުސޫލުތަކާ އެއްގޮތަށް ކަމަށް އިއްޔެ ބޭއްވި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ ވިދާޅުވި އެވެ. ނަމަވެސް، ނަޝީދުއާ ގުޅޭ ގޮތުން ކުރެއްވި އެއްވެސް ސުވާލަކަށް ޖަވާބެއް ނުދެއްވަ އެވެ.
އެމްޑީޕީން ވަކިވި 12 މެންބަރުން
- ރައްޔިތުންގެ މަޖިލީހުގެ ނާއިބު ރައީސް އީވާ އަބްދުﷲ
- މާފަންނު މެދު ދާއިރާގެ މެންބަރު އިބްރާހީމް ރަޝީދު
- މައްޗަންގޮޅި އުތުރު ދާއިރާގެ މެންބަރު މުހައްމަދު ރަޝީދު
- ހުޅުދޫ ދާއިރާގެ މެންބަރު އިލްޔާސް ލަބީބް
- މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ
- ވިލުފުށީ ދާއިރާގެ މެންބަރު ހަސަން އަފީފް
- ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފް
- ތޮއްޑޫ ދާއިރާގެ މެންބަރު ހަސަން ޝިޔާން
- ހެންވޭރު ހުޅަނގު ދާއިރާގެ މެންބަރު ހަސަން ލަތީފް
- މަޑަވެލި ދާއިރާގެ މެންބަރު ހުސައިން ފިރުޝާން
- އުނގޫފާރު ދާއިރާގެ މެންބަރު މުހައްމަދު ވަހީދު
- ގައްދޫ ދާއިރާގެ މެންބަރު އަހުމަދު ޒާހިރު
މުހިންމު ބައެއް ހަބަރު
ދުވަހުގެ ކޯޓޭޝަން
ފިކުރެއްގެ ދިރުން ޕާޓީ އުފެއްދުމަށްޓަކައި ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ އެމްޑީޕީން ވަކިވި ނަމަވެސް، މަގާމުގައި ދެމިހުންނެވުމަށް ބޭނުންފުޅުވުމުން އެކަމަށް ފާޑުވިދާޅުވެ އެމްޑީޕީގެ ޕާލިމެންޓަރީ ގްރޫޕުގެ ލީޑަރު މުހައްމަދު އަސްލަމް ވިދާޅުވީ؛
ސިޔާސީ ޝަހުސިއްޔަތު ހަރުދަނާ ނަމަ އީވާ ޕާޓީން އިސްތިއުފާ ދޭއިރު، ޕާޓީ މެންބަރުން ވޯޓު ދީގެން ހޮވި މަގާމަކުން ވެސް އިސްތިއުފާ ދެއްވާނެ، އެ ރީތި ނަމޫނާ ނުފެނުމަކީ ދެރަ ކަމެއް،"
ދުވަހުގެ ފޮޓޯ
ފިކުރެއްގެ ދިރުން ޕާޓީ އުފެއްދުމަށްޓަކައި އެމްޑީޕީގެ ރައީސް މުހައްމަދު ނަޝީދަށް ތާއިދު ކުރައްވާ ރައްޔިތުންގެ މަޖިލީހުގެ 12 މެމްބަރަކު އެ ޕާޓީން ވަކިވެ، ފިކުރެއްގެ ދިރުން ޕާޓީ އުފައްދާނެކަން އިއުލާނުކުރަން އިއްޔެ ބޭއްވި ނޫސްވެރިންގެ ބައްދަލުވުމުގެ ތެރެއިން. -- ފޮޓޯ: މިރާން ނާޝިމް/އަދަދު
