ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީގައި އޮތް އިދިކޮޅު ފެކްޝަން, "ފިކުރެއްގެ ދިރުން" އިން އާ ސިޔާސީ ޕާޓީއެއް އުފައްދައި ސިޔާސީ ހަރަކާތްތައް ވަރުގަދަކުރަން ނިންމާފައިވާކަން އެނގިއްޖެ އެވެ.
"އަދަދު" ނޫހަށް މައުލޫމާތު ލިބިފައިވާ ގޮތުގައި މިއަދު ހަވީރު އެ ފެކްޝަނުން ބާއްވާ ނޫސްވެރިންގެ ބައްދަލުވުމުގައި ކުރިއަށް އޮތް ދުވަސްތަކުގައި ސިޔާސީ ހަރަކާތްތައް އެ ބޭފުޅުން ކުރިއަށްގެންދަވާނެ ގޮތްތައް ހާމަކުރައްވާނެ އެވެ. އަދި, އޭގެ ތެރެއިން އެންމެ މުހިންމު ކަމެއްގެ ގޮތުގައި އާ ޕާޓީ އުފެއްދުމުގެ ކަންކަން ކުރިއަށްގެންދިޔުން ހިމެނޭ ކަން ވެސް ވަނީ އެނގިފަ އެވެ.
ނަޝީދު ފިޔަވައި އެމްޑީޕީގައި ތިއްބެވި އެ ފެކްޝަންގެ ހުރިހާ ލީޑަރުން ވެސް މިއަދު އެ ޕާޓީން އިސްތިއުފާ ދެއްވިއިރު އާ ޕާޓީގެ ލީޑާޝިޕުން މި ބޭފުޅުން ފެންނާނެ ކަމަށް ބެލެވެ އެވެ.
އެމަނިކުފާނަކީ އެމްޑީޕީ އުފެއްދުމުގައި އިސް ސަފުގައި ހަރަކާތްތެރިވެވަޑައިގެންނެވި ބޭފުޅެކެވެ. އެހެން ނަމަވެސް, ރައީސް އިބްރާހިމް މުހައްމަދު ސޯލިހުގެ ބައެއް ސިޔާސަތުތަކާއި ހިތްހަމަޖެހިވަޑައިނުގެން ސަރުކާރަށް އޮތް ތާއިދު ނަޝީދު އަނބުރާ ގެންދެވި އެވެ.
ދެ ރައީސުންގެ މެދުގައި އުފެދުނު ހިޔާލު ތަފާތުވުންތަކާ އެކު އުފަންވި ދެ ފެކްޝަނުން އެމްޑީޕީގެ ކޮންޓްރޯލް ހޯދުމަށް ވާދަކޮށް ކުރި ހޯއްދެވީ ރައީސް ސޯލިހުގެ ފެކްޝަނެވެ. އެމްޑީޕީގެ ޗެއާޕާސަންގެ މަގާމައި, ޕާޓީގެ އިދާރީ މަގާމުތަކުގެ އިތުރުން އެ ޕާޓީގެ ރިޔާސީ ޓިކެޓުގެ ވާދަވެރިކަމުގައި ވެސް ކުރި ހޯއްދެވީ އެމަނިކުފާނެވެ.
އޭގެ ސަބަބުން, ނަޝީދަށް އެމްޑީޕީގެ ތެރެއިން ސިޔާސީ ހަރަކާތްތައް އެމަނިކުފާނު ބޭނުންވެވަޑައިގަންނަވާ ގޮތަށް ކުރިއަށްގެންދިޔުމަށް ހުރަސްތައް ކުރިމަތިވެ ޕާޓީން ވަނީ އެކަހެރިވެފަ އެވެ.
"ފިކުރެއްގެ ދިރުން" އުފައްދަވައި ނަޝީދު މަސައްކަތްޕުޅު ފެއްޓެވީ އެމްޑީޕީ އަނބުރާ ހޯއްދެވުމަށެވެ. އެހެން ނަމަވެސް, އެމަނިކުފާނަށް އެ މަސައްކަތް ކާމިޔާބުވާ މަންޒަރު ފެނިފައި ނުވެ އެވެ.
މި ޕާޓީ އުފައްދައި ރަޖިސްޓްްރީ ކުރުމާއެކު ވެގެންދާނީ އޮޕޮޒިޝަން ޕާޓީއަށެވެ. އެގޮތުން, ރައްޔިތުންގެ މަޖިލީހުގެ 12 ގޮނޑިއެއްގައި އެ ޕާޓީގެ މެމްބަރުން ތިއްބަވާނެ އެވެ.
