މެންޗެސްޓާ (މެއި 17) - އިނގިރޭސި ފުޓްބޯޅައިގެ ގަދަބާރު، މެންޗެސްޓާ ޔުނައިޓެޑް ގަންނަން ގަތަރުގެ ބޭންކް، ކިއުއައިބީގެ ޗެއާމަން، ޝެއިހް ޖަސީމް ބިން ހަމަދު އަލް ތާނީ ކުރައްވަމުން އަންނަ މަސައްކަތް ހުއްޓާނުލައި، އިތުރު ބިޑެއް ކޮށްފައިވާ ކަމަށް ރިޕޯޓްތައް ބުނެފި އެވެ.
ޔުނައިޓެޑް ގަންނަން ބިޑް ކުރަން ދިން ފުރުސަތުގައި އެކަން ކޮށްފައިވަނީ ޝައުގުވެރިވާ ދެ ފަރާތް ކަމަށްވާ، އިނގިރޭސި ބިލިއަނަރު ޖިމް ރެޓްކްލިފް އާއި ޝެއިހް ޖަސީމް އެވެ. ރެޓްކްލިފް އާއި ޝެއިހް ޖަސީމް ވެސް ވަނީ މިދިޔަ މަހުގެ ނިޔަލަށް ޔުނައިޓެޑް ގަންނަން ތިން ބިޑެއް ކޮށްފަ އެވެ.
ރެޓްކްލިފާ ހިލާފަށް ޝެއިހް ޖަސީމްގެ ބިޑްގައިވާ ގޮތުން ޔުނައިޓެޑްގެ 100 ޕަސެންޓް ކޮންޓްރޯލް ނަގާނީ އެ ފަރާތުންނެވެ. ޔުނައިޓެޑް ހިންގަމުން އަންނަ އެމެރިކާގެ މަހުޖަނު އާއިލާ، ގްލޭޒާސް އިން ބޭނުންވަނީ ދެ ކްލަބްގެ ކޮންމެވެސް ޕަސެންޓެއްގެ ހިއްސާއެއް އޮތްގޮތަށް އާ ބަޔަކާ ކްލަބް ހިންގުން ހަވާލުކުރާށެވެ. ގްލޭޒާ އާއިލާ އިން ބޭނުންވާ ގޮތަށް، އެ ޑީލް ގެންދަން ރެޓްކްލިފް ހުރީ ތައްޔާރަށެވެ. އެކަމަކު، އެ އަށް ޔުނައިޓެޑްގެ ބޯޑުގެ މެޖޯރިޓީ ނުލިބޭތީ ޑީލް އޮތީ އަދި ނުހިނގަ އެވެ.
ގްލޭޒާ އާއިލާ އިން ޔުނައިޓެޑް ވިއްކާލަން ކިޔާ އަގަކީ 7.3 ބިލިއަން ޑޮލަރެވެ. ގްލޭޒާ އާއިލާ އިން 2005 ވަނަ އަހަރު ޔުނައިޓެޑް ގަތީ 790 މިލިއަން ޕައުންޑް (840 މިލިއަން ޑޮލަރު) އަށެވެ.
ގަތަރުގެ ނުފޫޒު ގަދަ ފަރާތްތަކުގެ ތެރޭގައި ހިމެނޭ، ޝެއިހް ޖަސީމް ބިޑް ކޮށްފައިވަނީ އޭނާގެ ނައިންޓޫ ފައުންޑޭޝަން ކުންފުނީގެ ފަރާތުންނެވެ. ޔުނައިޓެޑްގެ ގިނަ އަދަދެއްގެ ސަޕޯޓަރުން އެދެނީ އެ ކްލަބަށް އާ ވެރިއަކު ހަވާލުވުމަށެވެ. އެ ގޮތުން، މުޅި ދުނިޔޭގެ އެކި ހިސާބުތަކަށް ބަލާއިރު، އެދެނީ ޝެއިހް ޖަސީމް އަށް ޔުނައިޓެޑް ހިންގަން ލިބުމެވެ.
ޝެއިހް ޖަސީމްގެ ވިސްނުމަކީ ޔުނައިޓެޑްގެ ދަރަނީގެ ގޮތުގައި މި ވަގުތު އޮތް 620-950 މިލިއަން ޑޮލަރު އެއްކޮށް އަދާކުރުމަށް ފަހު، އެ ކްލަބް ކުރިން އޮތް ލެވަލަށް ދެވޭނެ ވަރަށް ކްލަބަށް އިންވެސްޓް ކުރުމެވެ.
ރިޕޯޓްތައް ބުނާގޮތުން ޝެއިހް ޖަސީމް އެންމެ ފަހުން ކުރި ބިޑްގެ ޖުމްލަ އަގަކީ 5.8 ބިލިއަން ޑޮލަރު ކަމަށްވާއިރު، އޭނާ ބޭނުންވަނީ މެޖޯރިޓީ ހިއްސާދާރަކަށް ވުމަށެވެ. އަދި އެ އަށް ފަހު، ޔުނައިޓެޑްގެ އަންހެން އަދި ފިރިހެން ޓީމު ވެސް އެންމެ މަތީ ލެވަލްގައި ބޭއްވޭ ވަަރަށް އިންވެސްޓް ކުރުމަކީ ޝެއިހް ޖަސީމްގެ ޕްލޭން އެވެ.
