މަޖިލީހުގެ ދާއިިމީ ކޮމިޓީތަކަށް އެމްޑީޕީން އައްޔަންކޮށްފައިވާ މެމްބަރުންނަށް ބަދަލުތަކެއް ގެނެސްދިނުން އެދި އެ ޕާޓީން މަޖިލީހަށް މިއަދު ހުށަހަޅައިފި އެވެ.
މަޖިލީހުގެ ދާއިމީ ކޮމިޓީތަކުގައި އެމްޑީޕީ ތަމްސީލުކުރައްވާ މެމްބަރުންނަށް ބަދަލުތަކެއް ގަނައުމަށް އެޕާޓީން ހުށަހަޅައިފައި މިވަނީ ފިކުރެއްގެ ދިރުމުގެ ނަމުގައި ޕާޓީގައި އިތުރު ފެކްޝަނެއް އުފައްދައި އިދިކޮޅު ޕާޓީތަކާ ގުޅިގެން މަސައްކަތްތަކެއް ކުރުމަށް ތައްޔާރުވަމުން ދަނިކޮށެވެ.
"އަދަދު" އަށް އެނގިފައިވާ ގޮތުގައި އެމްޑީޕީގެ ޕާލިމަންޓަރީ ގުރޫޕުގެ ލީޑަރު، މުހައްމަދު އަސްލަމް ސޮއި ކުރައްވައި މަޖިލީހުގެ ރައީސް، މުހައްމަދު ނަޝީދަށް މިއަދު ފޮނުވި ސިޓީއެއްގައި ވަނީ އަށް ކޮމިޓީއެއްގައި އެ ޕާޓީ ތަމްސީލު ކުރައްވާ މެމްބަރުންނަށް ބަދަލުތަކެއް ގެނެސްދިނުމަށް އެދިފަ އެވެ. މި ނޫހަށް ކަށަވަރުވެފައި ވާގޮތުގައި އެ ސިޓީގައި ވަނީ:
- ހާރިޖީ ގުޅުންތަކުގެ ކޮމިޓީގައި ހިމެނިވަޑައިގަންނަވާ ވިލުފުށި ދާއިރާގެ މެމްބަރު، ހަސަން އަފީފުގެ ބަދަލުގައި އެ ކޮމިޓީގައި ހެންވޭރު ދެކުނު ދާއިރާގެ މެންބަރު، ހުސެއިން ޝަހީމް ހިމެނުން
- އާންމު ކޮމިޓީގައި ހިމެނިވަޑައިގަންނަވާ ހެންވޭރު ހުޅަނގު ދާއިރާގެ މެމްބަރުގެ ބަދަލުގައި އެ ކޮމިޓީގައި ގަލޮޅު ދެކުނު ދާއިރާގެ މެމްބަރު، މީކާއިލް އަހުމަދު ނަސީމް ހިމެނުމާއި ހަމައެކޮމިޓީގައި ހިމެނިވަޑައިގަންނަވާ އަލިފުށި ދާއިރާގެ މެމްބަރު، މުހައްމަދު ރަޝީދު ހުސެއިންގެ ބަދަލުގައި އެ ކޮމިޓީގައި ކުޅުދުއްފުށި އުތުރު ދާއިރާގެ މެމްބަރު، ޔާސިރު އަބްދުއްލަތީފް ހިމެނުން
- ޕެޓިޝަން ކޮމިޓީގައި ހިމެނިވަޑައިގަންނަވާ ކެލާ ދާއިރާގެ މެމްބަރު، އިބްރާހިމް ޝަރީފުގެ ބަދަލުގައި އެ ކޮމިޓީގައި ވިލުފުށި ދާއިރާގެ މެމްބަރު، ހަސަން އަފީފު ހިމެނުމާއި ހަމަ އެ ކޮމިޓީގައި ހިމެނިވަޑައިގަންނަވާ އިހަވަންދޫ ދާއިރާގެ މެމްބަރު، މުހައްމަދު ޝިފާއުގެ ބަދަލުގައި އެ ކޮމިޓީގައި ހެންވޭރު ހުޅަނގު ދާއިރާގެ މެމްބަރު، ހަސަން ލަތީފު ހިމެނުން
- އިމްތިޔާޒާއި ސުލޫކު ކޮމިޓީގައި ހިމެނިވަޑައިގަންނަވާ ކުޅުދުއްފުށި އުތުރު ދާއިރާގެ މެންބަރު، ޔާސިރު އަބްދުއްލަތީފްގެ ބަދަލުގައި އެ ކޮމިޓީގައި ކެލާ ދާއިރާގެ މެމްބަރު، އިބްރާހިމް ޝަރީފް ހިމެނުން
- ސްޓޭޓް އޯންޑު އެންޓަޕުރައިޒަސް ކޮމިޓީގައި ހިމެނިވަޑައިގަންނަވާ ހުޅުދޫ ދާއިރާގެ މެމްބަރު، އިލްޔާސް ލަބީބުގެ ބަދަލުގައި އެ ކޮމިޓީގައި ކެނދިކުޅުދޫ ދާއިރާގެ މެމްބަރު، އަހުމަދު އީސާ ހިމެނުމާއި ހަމައެކޮމިޓީގައި ހިމެނިވަޑައިގަންނަވާ ތޮއްޑޫ ދާއިރާގެ މެމްބަރު، ހަސަން ޝިޔާންގެ ބަދަލުގައި އެ ކޮމިޓީގައި ދާންދޫ ދާއިރާގެ މެންބަރު، ޔައުގޫބު އަބްދﷲ ހިމެނުން
- ޖުޑިޝަރީ ކޮމިޓީގައި ހިމެނިވަޑައިގަންނަވާ ހެންވޭރު ހުޅަނގު ދާއިރާގެ ދާއިރާގެ މެމްބަރު، ހަސަން ލަތީފުގެ ބަދަލުގައި އެ ކޮމިޓީގައި އިހަވަންދޫ ދާއިރާގެ މެމްބަރު، މުހައްމަދު ޝިފާއު ހިމެނުމާއި ހަމަ އެ ކޮމިޓީގައި ހިމެނިވަޑައިގަންނަވާ މާފަންނު އުތުރު ދާއިރާގެ މެމްބަރު، އިމްތިޔާޒް ފަހުމީގެ ބަދަލުގައި އެ ކޮމިޓީގައި މަރަދޫ ދާއިރާގެ މެމްބަރު، އިބްރާހިމް ޝަރީފް ހިމެނުން
- އިޖްތިމާއީ ކޮމިޓީގައި ހިމެނިވަޑައިގަންނަވާ ކެނދިކުޅުދޫ ދާއިރާގެ މެމްބަރު، އަހުމަދު އީސާގެ ބަދަލުގައި އެ ކޮމިޓީގައި މާފަންނު އުތުރު ދާއިރާގެ މެމްބަރު، އިމްތިޔާޒް ފަހުމީ ހިމެނުން
- ސަލާމަތީ ހިދުމަތްތަކާ ބެހޭ ކޮމިޓީގައި ހިމެނިވަޑައިގަންނަވާ ހުޅުދޫ ދާއިރާގެ މެމްބަރު، އިލްޔާސް ލަބީބުގެ ބަދަލުގައި އެ ކޮމިޓީގައި ބާރަށު ދާއިރާގެ މެމްބަރު، އަހުމަދު އަބްދުﷲ ހިމެނުމާއި ހަމަ އެކޮމިޓީގައި ހިމެނިވަޑައިގަންނަވާ މެދު ހެންވޭރު ދާއިރާގެ މެމްބަރު، އަލީ އާޒިމްގެ ބަދަލުގައި އެ ކޮމިޓީގައި ފުވައްމުލަކު މެދު ދާއިރާގެ މެމްބަރު، ހުސެއިން މުހައްމަދު ހިމެނުން
މަޖިލީހުގެ ކޮމިޓީތަކުގައި އެމްޑީޕީ ތަމްސީލު ކުރައްވާ މެމްބަރުންނަށް ބަދަލުތަކެއް ގެނެސްދިނުން އެދި އެޕާޓީން މަޖިލީހަށް ހުށަހަޅާފައި ވާއިރު، ފޯޅަވަހި ކޯލިޝަނާ ގުޅިގެން ފިކުރެއްގެ ދިރުން ފެކްޝަނުން ދަނީ ރައީސުލްޖުމްހޫރިއްޔާ އާއި ފޮރިން މިނިސްޓަރު، އަބްދުﷲ ޝާހިދު އަދި އެޓާނީ ޖެނެރަލް، އިބްރާހިމް ރިއްފަތު މަގާމުން އަޒުލުކުރުމުގެ މަސައްކަތް ކުރަމުންނެވެ.
އެ މަސައްކަތުގެ ތެރެއިން ފޯޅަވަހި ކޯލިޝަނުން ވަނީ ރިއްފަތުގެ އިތުބާރު ނެތް ކަމުގެ މައްސަލަ މަޖިލީހަށް ވައްދައިފަ އެވެ. އެ މައްސަލަ ވެއްދުމަށް ފިކުރެއްގެ ދިރުން ފެކްޝަނުން ސޮއި ކުރެއްވީ، ހަމައެކަނި މެދު ހެންވޭރު ދާއިރާގެ މެންބަރު، އަލީ އާޒިމް އެވެ. އެ މައްސަލަ ވަނީ އެމްޑީޕީގެ ޕާލަމަންޓަރީ ގުރޫޕުން އެ ޕާޓީގެ ޗެއާޕާސަންގެ ސަމާލު ކަމަށް ވެސް ގެނެސްފަ އެވެ.
އޭގެ އިތުރުން ފޯޅަވަހި ކޯލިޝަނުން މިއަދު ވަނީ މިނިސްޓަރު އަބްދުﷲ ޝާހިދުގެ އިތުބާރު ނެތްތަކުމުގެ މައްސަލަ މަޖިލީހަށް ވެއްދުމަށްފަހު ކުޑަ ވަގުތުކޮޅެއްގެ ތެރޭގައި އަނބުރާ މައްސަލަ ނަގައިފަ އެވެ. އެހެންނަމަވެސް އެ މައްސަލަ މަޖިލީހަށް ވެއްދިއިރު، ފިކުރެއްގެ ދިރުން ކޯލިޝަނުން ސޮއިކޮށްފައި ނުވާކަން "އަދަދު" ނޫހަށް ވަނީ ކަށަވަރު ވެފަ އެވެ.
