ޕެރިސް (މެއި 15) - ޕީއެސްޖީ އަށް ކުޅެމުން އަންނަ މޮރޮކޯގެ ފުލްބެކް، އަޝްރަފް ހަކީމީ، ސީނިއާ ކެރިއަރުގެ ފުރަތަމަ ކްލަބް، ރެއާލް މެޑްރިޑަށް ބަދަލުވާން ބޭނުންވާ ކަމަށް ރިޕޯޓްތައް ބުނެފި އެވެ.
ހަކީމީ، 24، މި ވަގުތު ޕީއެސްޖީ ކޮންޓްރެކްޓްގައި ހުރީ 2026 ވަނަ އަހަރުގެ ނިޔަލަށެވެ. އެކަމަކު، ރިޕޯޓްތައް ބުނާގޮތުން ޕީއެސްޖީގައި މި ވަގުތު ހަކީމީ ހުރީ އެންމެ ހިތްހަަމަޖެހިގެން ނޫން ކަމަށް ފްރާންސްގެ ނޫސް، ލެކިއުޕޭ އިން ވަނީ ރިޕޯޓްކޮށްފަ އެވެ. މި ސީޒަނުގައި ހަކީމީ އަށް ދެ މެޗުގައި ރަތް ކާޑު ދައްކާފައިވާއިރު، އޭނާގެ ޑިސިޕްލިން މައްސަލަތަކެއް ހުރި ކަމަށް ޕީއެސްޖީގެ ކޯޗު ކްރިސްޓޮފް ގަލްޓިއޭ ވަނީ މީޑިއާގައި ބުނެފަ އެވެ.
މި ސީޒަނަށް ފަހު ރެއާލުން އާ ފުލްބެކެއް އެ ޓީމަށް ހޯދަން މަސައްކަތް ކުރާނެ ކަމަށް ރިޕޯޓްތައް ބުނެ އެވެ. އެއީ، ޑެނީ ކާވަހާލްގެ ލޯންގް ޓާމް ރިޕްލޭސްމަންޓަކަށެވެ.
މޮރޮކޯ އަށް އުފަން ނަމަވެސް ހަކީމީ ސީނިއާ ކެރިއަރު ފެށީ 2016 ވަނަ އަހަރު ރެއާލް މެޑްރިޑް ކަސްޓީއާ ޓީމުންނެވެ. ރެއާލް ސީނިއާ ޓީމަށް 2017 ވަނަ އަހަރު ކުޅެން ފަށައި، 2020 ވަނަ އަހަރާ ހަމައަށް ކުޅުނެވެ. އެ މުއްދަތުގެ ތެރޭގައި އެއް ސީޒަނުގެ ލޯނެއްގައި ޖަރުމަނުގެ ބޮރޫޝިއާ ޑޯޓްމަންޑަށް ވެސް ހަކީމީ ކުޅުނެވެ. އޭގެ ފަހުން، 2020-2021 ވަނަ ސީޒަނުގައި އިންޓަ މިލާނަށް ކުޅުމަށް ފަހު، ހަކީމީ މީގެ ދެ އަހަރު ކުރިން ޕީއެސްޖީ އަށް ބަދަލުވީ 45 މިލިއަން ޑޮލަރުގެ ފީ އަކަށެވެ.
ރެއާލުން ހަކީމީގެ ސޮއި ހޯދަން ގާތްގަނޑަކަށް 50 މިލިއަން ޑޮލަރު ހޭދަކުރަން ޖެހޭނެ ކަމަށް ފްރާންސްގެ ލަ ޕެރީސިއަން ނޫހުން ވަނީ ރިޕޯޓްކޮށްފަ އެވެ.
