މޮސްކޯ، ރަޝިއާ (މޭ 12) - ތުރުކީގެ ރިޔާސީ އިންތިހާބުގެ ކެމްޕެއިނަށް ނުފޫޒު ފޯރުވާކަމުގެ ތުހުމަތު ރަޝިއާއިން ދޮގުކޮށްފި އެވެ.
އިދިކޮޅު ކެންޑިޑޭޓް ކެމާލް ކިލިޗްދަރޯލޫ މި ހަފުތާގެ ކުރީކޮޅު ވިދާޅުވީ އެމަނިކުފާނު "ޑީޕްފޭކް" ފޮޓޯތައް ހަދައި އަގުވައްޓާލުމުގެ އޮންލައިން ކެމްޕެއިނެއް ހިންގަނީ ރަޝިއާއިން ކަމަށެވެ.
ރަޝިއާގެ އިންތިހާބުގެ ވޯޓުލުން ފަށާނީ އާދީއްތަ ދުވަހު އެވެ. ކިލިޗްދަރޯލޫއަކީ މިހާރުގެ ރައީސް ތައްޔިބް އުރުދުގާންއާ ދެކޮޅަށް ހުންނެވި މައި ކެންޑިޑޭޓެވެ.
"އެފަދަ ވާހަކަތައް އަޅުގަނޑުމެން ކުށްވެރި ކުރަން،" ކްރެމްލިންގެ ތަރުޖަމާނު ޑިމީޓްރީ ޕެސްކޯވް ހުކުރު ދުވަހު ވިދާޅުވި އެވެ.
"އިންތިހާބަށް ނުފޫޒު ފޯރުވާ ކަމަށް ބުނެ ބަޔަކު ކިލިޗްދަރޯލޫއަށް މައުލޫމާތު ދީފައިވާ ނަމަ، އެ ބަޔަކީ ދޮގު ހަދާ ބަޔެއް."
އޭގެ އިތުރުން ތުރުކީއާ އެކު އޮތް ގާތް ގުޅުމަކީ "ވަރަށް އަގުހުރި" އެއްޗެއްގެ ގޮތުގައި ރަޝިއާއިން ދެކޭ ކަމަށާއި އެ ގުޅުމަށް އަސަރު ކުރާނެ އެއްވެސް ކަމެއް ނުކުރާ ކަމަށް ޕެސްކޯވް ވިދާޅުވި އެވެ.
ކިލިޗްދަރޯލޫގެ ތުހުމަތުތައް ފެންމަތިވީ ތިން ވަނަ ޕާޓީއެއްގެ ފަރާތުން ވާދަކުރާ ކެންޑިޑޭޓަކު ކުއްލި ގޮތަކަށް ވާދަނުކުރާނެކަން އިއުލާން ކުރިތާ ގަޑިއިރުތަކެއް ފަހުންނެވެ. އެ ކެންޑިޑޭޓު ވާދަނުކުރަން ނިންމީ އަގުވައްޓާލުމުގެ އޮންލައިން ކެމްޕެއިނެއްގެ ސަބަބުން ކަމަށް ރިޕޯޓުތައް ބުނެ އެވެ.
ކިލިޗްދަރޯލޫއަކީ މައި އިދިކޮޅު ރިޕަބްލިކަން ޕީޕަލްސް ޕާޓީ (ސީއެޗްޕީ) ގެ ލީޑަރެވެ. ޕޯލްތައް ދައްކާ ގޮތުން އޭނާ އުޅުއްވަނީ ފާއިތުވި 20 އަހަރު ވެރިކަން ކުރެއްވި އުރުދުގާންއަށް ވުރެ ކުޑަ ތަންކޮޅެއް ކުރީގަ އެވެ.
