ދިމިޝްކު، ސީރިއާ (މޭ 10) - އަންނަ ހަފުތާގައި އޮންނަ އަރަބި ސަމިޓަށް ވަޑައިގެންނެވުމަށް ސައުދީ އަރަބިއްޔާގެ ރަސްގެފާނުގެ ހާއްސަ ދައުވަތެއް ސީރިއާގެ ރައީސް ބައްޝާރުލް އަސަދަށް ފޮނުއްވައިފި އެވެ.
މިއީ 2011 ގައި ސީރިއާގެ ދާހިލީ ހަނގުރާމަ ފެށި ފަހުން ސައުދީ ރަސްގެފާނެއްގެ ދައުވަތު އަސަދަށް ލިބިވަޑައިގެންނެވި ފުރަތަމަ ފަހަރެވެ.
ސީރިއާގެ ރައީސް އޮފީހުން ނެރުނު ބަޔާނެއްގައި ބުނީ ސައުދީ ރަސްގެފާނު ސަލްމާން ފޮނުއްވި ސިޓީފުޅުފައި ދައުވަތު އެރުއްވީ މޭ 19 ގައި ޖިއްދާގައި އޮންނަ 32 ވަނަ އަރަބި ލީގު ސަމިޓަށް ވަޑައިގެންނެވުމަށް ކަމަށެވެ.
އެ ސިޓީފުޅު އަސަދަށް އެރުއްވީ ސައުދީ އަރަބިއްޔާއިން އުރުދުންއަށް ކަނޑައަޅާފައި ހުންނަ ސަަފީރު ނާޔިފް ބިން ބަންދާރް އަލް ސުދައިރީ އެވެ.
ބާރަ އަހަރުގެ މެދުކަނޑުމަކަށް ފަހު ސީރިއާއަށް އަލުން އަރަބި ލީގުގެ މެމްބަރުކަން ދިނީ މި ހަފުތާގަ އެވެ.
އަރަބި ލީގުން 2011 ވަނަ އަހަރު ސީރިއާ އެކަހެރި ކުރީ އެ ގައުމުގެ އިދިކޮޅު ފަރާތްތަކާ ދެކޮޅަށް އަސަދް ކުރިއަށް ގެންދެވި ކެމްޕެއިނާ ގުޅިގެންނެވެ.
އެންމެ ފަހުން އަސަދް އަރަބި ލީގު ސަމިޓަކަށް ވަޑައިގެންނެވީ 2010 ވަނަ އަހަރު ލީބިޔާއަށެވެ.
އަރަބި ގައުމުތަކާއި ސީރިއާގެ ގުޅުން ރަނގަޅު ވާން ފަށާފައިވާ އިރު، ރިޔާދާއި ދިމިޝްކުގައި ހުންނަ ޑިޕްލޮމެޓިކް މިޝަންތައް ވެސް އަލުން ހުޅުވަން ވަނީ ނިންމައިފަ އެވެ.
ސީރިއާގެ ދާހިލީ ހަމަނުޖެހުމާ އެކު ހަނގުރާމަ ފެށުމުން، ބައްޝާރުލް އަސަދްގެ ސަރުކާރު އޮތީ އަރަބި ދުނިޔެއާ އެކަހެރިވެފަ އެވެ.
އެހެން ނަމަވެސް އިރާނާއި ސައުދީ އަރަބިއްޔާއިން ޑިޕްލޮމެޓިކް ގުޅުން ގާއިމްކުރި ފަހުން، އަރަބި ގައުމުތަކުން ސީރިއާއާ މެދު އަމަލުކުރާ ގޮތް ވެސް ވަނީ ބަދަލުވެފަ އެވެ.
ބައެއް އަރަބި ގައުމުތަކުން ސުލްހަ އިސްކޮށް، އެއްބައިވަންތަވަމުން ދިޔަ ނަމަވެސް، ގަތަރުން ބުނީ ސީރިއާއާ އެކު ގުޅުން ގާއިމް ނުކުރާނެ ކަމަށެވެ.
އޭގެ އިތުރުން ސީރިއާއާ އެކު ގުޅުން ގާއިމްކޮށް އަރަބި ލީގުގެ މެމްބަރުކަން ދޭން ނިންމުމުން، އެމެރިކާއިން ވަނީ ހިތްހަމަނުޖެހުން ފާޅުކޮށްފަ އެވެ.
